IzEnzo
3 Nje-ke uPitrosi noJwanisi bebakhuphukela ethempelini ngesikhathi sokuthandaza, pheze ngesimbi yesithathu ntambama,* 2 begodu bekunabantu ebebaguge indoda ethileko eyabelethwa isirhole. Qobe langa bebayibeka ethempelini eduze nesango elibizwa ngokuthi liSango eLihle, ukwenzela bona ibawe izipho kilabo abangena ngethempelini. 3 Nayibona uPitrosi noJwanisi bazokungena ngethempelini, yababawa izipho. 4 Kodwana uPitrosi noJwanisi, bayiqala ngokunqophileko, bathi: “Siqala.” 5 Yabaqala, ilindele ukufumana okuthileko kibo. 6 UPitrosi wathi: “Isiliva negolide anginalo, kodwana enginakho ngilokho engizokupha khona. Ebizweni lakaJesu Krestu umNazaretha, sikima ukhambe!” 7 Wayibamba ngesandla sangesidleni, wayisikimisa. Khonokho iinyawo neengogoriyana zayo zaqina; 8 yeqayeqa ngeenyawo zayo, yathoma ukukhamba, yaya nabo ethempelini, ikhamba begodu yeqayeqa idumisa uZimu. 9 Abantu boke bayibona ikhamba, idumisa uZimu. 10 Bakhumbula ukuthi yindoda leya egade ithanda ukuhlala ilindele izipho eSangweni eLihle lethempeli, barareka khulu begodu bathaba ngalokho okwenzeke kiyo.
11 Indoda le nayisabambelele kuPitrosi noJwanisi, abantu boke bagijimela kibo endaweni ebizwa ngokuthi maThuri kaSolomoni, barareke kwamambala. 12 UPitrosi nakabona lokhu, wathi ebantwini: “Bantu bakwa-Israyeli, kubayini nirarwe ngilokhu, kubayini nisirhudulele amehlo ngasuthi simenze wakhamba ngamandlethu namkha ngokuzinikela kwethu kuZimu? 13 UZimu ka-Abrahama, u-Isaka noJakopo, uZimu wabokhokho bethu, uphazimulise iNcekwakhe, uJesu, loyo enamthengisa namlandula phambi kwakaPilatu, ngitjho nalokha aqunte ukumtjhaphulula. 14 Kwamambala, nilandule ocwengileko nolungileko, nabawa ukunikelwa indoda ebeyimbulali, 15 nabulala uMjameli omKhulu wokuphila. Kodwana uZimu wamvusa kwabafileko, ngilokho esikufakazelako. 16 Ngebizo lakhe, nangokukholelwa kwethu ebizweni lakhe, indoda eniyibonako neniyaziko le yenziwe yaqina. Ukukholwa kwayo kuyenze yaphila kuhle phambi kwenu noke. 17 Nje-ke bafowethu, ngiyazi ukuthi nenze lokhu ngokungazi, njengombana kwenze nababusi benu. 18 Kodwana ngendlela le uZimu uzalise izinto azibikezela ngaphambili ngemilomo yabo boke abaphorofidi, ukuthi uKrestu wakhe uzokutlhaga.
19 “Tjhugulukani, nibuye ukwenzela bona izono zenu zisulwe, khona kuzakuthi iinkhathi zokuvuseleleka zivele kuJehova ngokwakhe 20 begodu yena anithumele uKrestu anikhethele yena, uJesu. 21 Izulu kufuze limamukele bekube sikhathi sokubuyiselwa kwazo zoke izinto uZimu azikhuluma ngomlomo wabaphorofidi bakhe abacwengileko bekadeni. 22 Eqinisweni, uMosi wathi: ‘UJehova uZimu uzonivusela umphorofidi onjengami hlangana nabafowenu. Kufuze nilalele koke anitjela khona. 23 Kwamambala, nanyana ngubani ongalaleli umPhorofidi loyo uzokutjhatjalaliswa ngokupheleleko phakathi kwabantu.’ 24 Begodu boke abaphorofidi kusukela kuSamyela nalabo abamlandeleko, njengombana babanengi abakhulumileko, nabo bafakaze ngokukhanyako ngamalanga la. 25 Nimadodana wabaphorofidi newesivumelwano uZimu asenza nabokhokho benu, nakathi ku-Abrahama: ‘Ngesizukulwana sakho* yoke imindeni yephasi izokubusiswa.’ 26 Ngemva kokuvusa iNcekwakhe, uZimu wathoma ngokuyithumela kini bona inibusise ngokwenza ngamunye wenu asuke ezenzweni ezimbi.”