Wenza Okwaphorofidwa Ngu-Isaya

Nakezwa ukuthi abaFarisi nabalandeli behlangano kaHerode benza iriyadlhana lokumbulala, uJesu nabafundi bakhe batjhinga eLwandle leGalile. Iinqubuthu ezikulu ziza kuye zivela eendaweni ezihlukahlukeneko—zivela eGalile, eTire neSidoni okumadorobho amagega nelwandle, epumalanga yoMlambo iJordani, eJerusalema, ne-Idumiya esesewula. UJesu ulapha abanengi. Ngebanga lalokho, labo abagula khulu balwela ukuya ngaphambili. Abalindi bona kube nguye obathintako, kodwana balinga ngamandla ukufikelela kuye bamthinte.—Markosi 3:9, 10.

Abantu banengi kangangobana uJesu utjela abafundi bakhe ukuthi bamlungiselele isikepe esincani, bona angene ngelwandle ukuze iinqubuthu zingamminyezeli. Godu angakghona ukubafundisa asesikepeni, namkha atjhidele kwenye indawo magega nelwandle bona akghone ukusiza abantu abangeziweko.

Umfundi uMatewu utlola ukuthi okwenziwa nguJesu kuzalisa “okwatjhiwo ngomphorofidi u-Isaya.” (Matewu 12:17) Wathini umphorofidi u-Isaya?

“Nasi isisebenzi sami engisikhethileko, engisithandako, engithabileko ngaso! Ngizokubeka ummoyami phezu kwaso, sizokwenza iintjhaba zazi bona ubulungiswa buyini. Angeze siphikisane namuntu namkha sirhuwelele, akunamuntu ozokuzwa iphimbo laso eendleleni ezikulu. Angeze siwuqedelele umhlanga otshinyekileko, nesibani esififiyelako asizusicima, bekube kulapho siletha ubulungiswa ngepumelelo. Kwamambala, iintjhaba zizokuthembela ebizweni laso.”—Matewu 12:18-21; Isaya 42:1-4.

UJesu usisebenzi esikhethekileko esithandwa nguZimu. Uveza ubulungiswa bamambala, obugubuzeswe masiko wekolo yamala. Basebenzisa umThetho kaZimu ngendlelabo enganabulungiswa, abaFarisi abamsizi ngitjho nokumsiza umuntu ogulako ngeSabatha! UJesu wembula ubulungiswa bakaZimu, begodu utjengisa ukuthi ummoya kaZimu uphezu kwakhe ngokuthi athule abantu umthwalo wamasiko anganabulungiswa. Ngilokho-ke abadosiphambili bezekolo abafuna ukumbulalela khona. Uthi bakhohlakele na!

Kutjho ukuthini ukuthi, ‘angeze aphikisane namuntu namkha arhuwelele, akunamuntu ozokuzwa iphimbo lakhe eendleleni ezikulu’? Nakalaphako, uJesu akavumeli muntu [namkha idimoni] ‘bona akhulume ukuthi ungubani.’ (Markosi 3:12) Akafuni abantu bamazi ngezwangobatjho abayidobha eendleleni namkha ngemibiko efederisweko edluliswa babantu.

Godu, umlayezo kaJesu ududuza labo abanjengomhlanga otshinyekileko, ogobekileko nongasenamsebenzi. Banjengesibani esififiyelako, esingacima noma kunini. UJesu akawuqedeleli umhlanga otshinyekileko namkha acime isibani esififiyelako. Kunalokho, ngomusa nangethando, ubaphakamisa ngesineke abantu abathobekileko. Kwamambala, zoke iintjhaba zingabeka amathembazo kuJesu!