ISAHLUKO 7
Amadoda Athukula Ngeenkwekwezi Avakatjhela UJesu
AMADODA ATHUKULA NGEENKWEKWEZI ALANDELA “IKWEKWEZI” UKUYA EJERUSALEMA BESE IWASA KUJESU
Kufika amadoda athileko avela ePumalanga. Athukula ngeenkwekwezi—labo babantu abafunda ubujamo beenkwekwezi, abathi bangakghona ukuphengula abantu ngazo. (Isaya 47:13) Nawasekhaya ePumalanga, abona “ikwekwezi” ayilandela ibanga elide ukuya eJerusalema.
Amadoda la nakafika eJerusalema ayabuza: “Uphi loyo obelethiweko oyikosi yamaJuda? Ngombana sibone ikwekwezakhe sisePumalanga, yeke size ukuzomkhothamela.”—Matewu 2:1, 2.
IKosi uHerode yeJerusalema nayizwa ngalokhu, isilingeka khulu. Nje-ke ibiza abaphristi abakhulu nabanye abadosiphambili bekolo yamaJuda ibabuza ukuthi uKrestu uzokubelethelwaphi. Basekela ipendulwabo emiTlolweni, bathi: “EBhetlehema.” (Matewu 2:5; Mikha 5:2) Khonokho uHerode ubizela ngerhorhomejeni amadoda athukula ngeenkwekwezi, uthi kiwo: “Khambani niyomfunisisa umntwana loyo, nithi ningamfumana, nibuye nizongitjela, ukwenzela bona nami ngiyomkhothamela.” (Matewu 2:8) Eqinisweni, uHerode ufuna ukufumana umntwana loyo bona ambulale!
Ngemva kobana amadoda la akhambile, kwenzeka okuthileko okurarako. Abona “ikwekwezi” leya ayibona nawasePumalanga, ikhamba phambi kwawo. Kusemtarini ukuthi le akusiyikwekwezi ejayelekileko, kodwana yenziwe ngokukhethekileko bona iwanqophise. Amadoda athukula ngeenkwekwezi la ayayilandela beyijame poro ngaphezu komuzi lapha uJosefa noMariya nendodanabo sebahlala khona.
Amadoda la nakangena ngendlini, afumana uMariya nomntwana—uJesu. Khonokho ayamkhothamela. Amupha izipho zegolide, ipepho emhlophe nemire. Nasele afuna ukubuyela kuHerode, uZimu uwanqophisa ngebhudango bona angabuyeli kuHerode. Nje-ke abuyela enarhenawo ngenye indlela.
Ucabanga ukuthi ngubani owenza bona kube ‘nekwekwezi’ eyanqophisa amadoda athukula ngeenkwekwezi? Khumbula bona akhenge iwase ngokunqophileko kuJesu eBhetlehema. Kunalokho yawasa eJerusalema, lapho ahlangana khona neKosi uHerode, obekafuna ukubulala uJesu. Bekazombulala ngathana uZimu khenge angenele ngokuthi ayelelise amadoda athukula ngeenkwekwezi bona angatjeli uHerode ukuthi uJesu ukuphi. Linaba lakaZimu, uSathana, ebelifuna ukubulala uJesu, begodu lenza yoke imizamo le bona kuzaliseke umnqophwalo.