Isifundo 11
Yale Ikolo Yamanga!
USathana namadimonakhe abafuni bonyana ukhulekele uZimu. Nabangakghona, bafuna ukususa woke umuntu kuZimu. Balinga bunjani ukwenza lokhu? Enye indlela kungekolo yamanga. (2 kwebeKorinte 11:13-15) Ikolo engafundisi iqiniso eliphuma eBhayibhilini ngeyamanga. Ikolo yamanga injengesingamali—ingabonakala njengemali yamambala, kodwana ayinamberego. Ingakubangela imiraro eminengi.
Amanga wekolo ngeze amthabisa uJehova, uZimu weqiniso. Negade uJesu asephasinapha, bekunesiqhema sekolo esifuna ukumbulala. Besidlumbanyana indlela yaso yokukhulekela ngiyo egade ilungile. Bathi: “SinoBaba oyedwa, nguZimu.” Wakuvuma lokho uJesu? Awa! Wathi kibo: “nibantwana bakayihlo uSathana.” (Jwanisi 8:41, 44) Namhlanjesi abantu abanengi badlumbanyana bakhulekela uZimu, kodwana eqinisweni bakhulekela uSathana namadimonakhe!—1 kwebeKorinte 10:20.
Njengombana umuthi obolileko uveza iinthelo ezimbi, ikolo yamanga iveza abantu abenza izinto ezimbi. Ngebanga lezinto ezimbi ezenziwa babantu, iphasi lizele imiraro. Kunokuziphatha okumbi, ipi, ukweba, ukugandelelwa, ukubulala, begodu nokukata. Abanengi abenza iintwezi banekolo, kodwana ikolwabo ayibarhelebhi bonyana benze okuhle. Ngaphandle kokobanyana balise ukwenza izinto ezimbi, ngeze baba bangani bakaZimu.—Matewu 7:17, 18.
Ikolo yamanga ifundisa abantu ukuthandaza kibosingazimu. UZimu uthi singathandazi kibosingazimu. Lokhu kuyinto ezwakalako. Ungathaba nekunomuntu ongazange akhulume nawe kodwana okhuluma nesithombe sakho kwaphela? Umuntu loyo angaba mnganakho wamambala? Awa, angeze. UJehova ufuna abantu bakhulume naye, bangakhulumi nesithombe esingaphiliko.—Eksodosi 20:4, 5.
Ikolo yamanga ifundisa bona kulungile ukubulala abanye ngesikhathi sepi. UJesu wathi iinceku zakaZimu zizakuba nethando phakathi kwazo. Asibabulali abantu esibathandako. (Jwanisi 13:35) Kumbi kithi ngitjho nokubulala abantu abambi. UJesu akhenge avumele abafundi bakhe bonyana bamlwele negade amanabakhe azombamba.—Matewu 26:51, 52.
Ikolo yamanga ifundisa bonyana abambi bazakutlhaga esirhogweni somlilo. Nokho, iBhayibhili ifundisa bonyana isono sidosela ekufeni. (KwebeRoma 6:23) UJehova nguZimu onethando. UZimu onethando angatlhagisa abantu ngokungapheliko? Awa, angeze! EPharadeyisini kuzakuba nekolo eyodwa kwaphela, leyo emukelwa nguJehova. (ISambulo 15:4) Zoke iinkolo ezisekelwe emangeni kaSathana zizabe zingasekho.