UJehova Uyabavuza Labo Abamfuna Ngokuthembeka

1, 2. (a) Ukukholwa kuhlobana njani nethando? (b) Ngimiphi imibuzo esizokucoca ngayo?

SIYAMTHANDA uJehova “ngombana yena wasithanda qangi.” (1 Jwa. 4: 19) UJehova uthethe igadango lokubusisa iinkhonzi zakhe ezithembekileko ngombana afuna ukuzitjengisa ukuthi uzithanda kwamambala. Nasiragela phambili nokuthanda uZimu ukukholwa kwethu kuzokukhula, ingasi ukukholelwa bonyana ukhona kwaphela kodwana nokuthi uyabavuza labo abamthandako.—Funda yebeHebheru 11:6.

² Ukubusisa kububuntu bakaJehova begodu ubabusisa qobe abantu bakhe. Ukukholwa kwethu kuzabe kungakapheleli nange singaqiniseki bonyana uZimu uyabavuza labo abamfunako ngombana, “ukukholwa kukuqiniseka ngezinto esinethemba ngazo.” (Heb. 11:1) Kwamambala, ukukholwa kubandakanya ukuqiniseka ngeenthembiso zakaZimu. Ukwazi bonyana uJehova uyasibusisa kusisiza njani? UJehova wazibusisa njani iinkhonzi zakhe zekadeni, begodu uzibusisa njani zanamhlanjesi? Akhesizwe.

UJEHOVA UTHEMBISE UKUZIBUSISA IINKHONZI ZAKHE

3. UJehova usithembisani emtlolweni kaMalaki 3:10?

³ UJehova uzibophezele ekubusiseni iinkhonzi zakhe, kungebangelo asimema bonyana khesitjhidele kuye sizizwele ubumnandi beembusiso zakhe. Siyafunda: “‘Ngilingani ngalokhu, . . . ’ Kutjho [uJehova] uSomandla. ‘Nibone nangingazukunivulela izulu liwuluke, nginithululele iimbusiso ezizakuba mhlumba.’” (Mal. 3:10) Akhesithokoze umusa uJehova asitjengise wona ngokwamukela isimemo sakhe.

4. Kubayini sisithemba isithembiso sakaJesu esitlolwe kuMatewu 6:33?

⁴ UJesu waqinisekisa abafundi bakhe bonyana nabenza imisebenzi yokulotjha uZimu izeqangi uJehova uzobasekela. (Funda uMatewu 6:33.) UJesu bekaqiniseka ngesithembiswesi ngombana azikuhle bonyana uJehova uthembekile. Bekazi ukuthi isithembiso sakaJehova asiweli phasi. (Isa. 55:11) Nathi singaqiniseka bonyana nange singathembela kuJehova ngeenhliziyo zethu zoke, naye uzosizalisekisa isithembiso sakhe esithi: “Angekhe nganitjhiya namkha nganilahla.” (Heb. 13:5) Isithembiso esikhuthazakwesi sihlangana kamnandi nalokho uJesu akutjho ngokwenza umsebenzi wokulotjha uZimu uzeqangi.

5. Kubayini sithi ipendulo uJesu ayinikela uPitrosi iqinisa ukukholwa?

⁵ Umpostoli uPitrosi khewabuza uJesu wathi: “Sitjhiye koke kobana sikulandele. Alo, sizakuzuzani ngalokho na?” (Mat. 19:27) Kunokobana akhalimele uPitrosi kabuhlungu, uJesu watjela abafundi bakhe bonyana bazokubusiswa ngokuzidela kwabo. Abapostoli abathembekileko nabanye abakhethiweko bazokubusa naye ezulwini. Ngitjho nanje bayazifunyana iimbusiso. UJesu wathi: “Loyo naloyo otjhiye iinkumba namkha abafowabo namkha abodadwabo namkha uyise namkha unina namkha abantwana namkha amasimu ngebanga lami, uzakwamukela ngokubuyelelwe kalikhulu abe azuze nokuphila okungapheliko.” (Mat. 19:29) Abafundi bakhe begade bazokufunyana iimbusiso ezidlula kude ukuzidela kwabo. Akhuthi uyaqala bonyana sibusiswe kangangani! Sifunyene abobaba, abomma, abafowethu, abodadwethu nabentwana ehlanganweni kaZimu ngebanga lokubeka umsebenzakhe qangi emaphilwenethu. Kghani akusi njalo?

“UBUDZIMELELO BOMPHEFUMULO”

6. Kubayini uJehova athembisa ukubusisa iinkhonzi zakhe?

⁶ UJehova ubusisa iinkhonzi zakhe ngombana afuna ukuzivikela eenlingweni. Nanyana uJehova azibusisa iinkhonzi zakhe, kodwana ziqale phambili eembusisweni ezikulu esikhathini esizako. (1 Thim. 4:8) Iye siyaqiniseka bonyana uJehova “uyabavuza labo abamfunako” lokho kuzokuqinisa ukukholwa kwethu.—Heb. 11:6.

7. Kubayini ithemba lifana ne-ankere?

⁷ ETjumayelweni yeNtabeni uJesu wathi: “Thabani nithokoze ngombana umvuzo wenu mkhulu ezulwini. Nabaphorofidi ababakhona ngaphambi kwenu babazuma ngayo indlela le.” (Mat. 5:12) Ngaphandle kwesibusiso sokuphila ezulwini, isithembiso sokuphila ephasini eliyipharadesi sisinikela ibanga lokuthi ‘sithabe besithokoze.’ (Rhu. 37:11; Luk. 18:30) Akunandaba bonyana siyokuphila ezulwini namkha ephasini kodwana ithemba esinalo “liliqiniso nobudzimelelo bomphefumulo.” (Heb. 6:17-20) Njengombana i-ankera ibamba isikepe bonyana singakhambi neewuruwuru, ithemba lethu ngeembusiso zakaZimu lisisiza bonyana sikwazi ukulawula amazizwethu begodu nokukholwa kwethu kuhlale kuqinile. Lokho kungasisiza bonyana sikwazi ukuqalana namatshwenyeko.

8. Kubayini ithemba linamandla wokwehlisa ukutshwenyeka?

⁸ Ithembalethu elisekelwe eBhayibhelini lisisiza bonyana sikwazi ukulwisana namatshwenyeko. Ithemba uZimu asiphelona lifana namafutha wokuqeda ubuhlungu eenhlizyweni zethu. Qala bonyana kuthabisa kangangani ‘ukuphosela umthwalwakho kuJehova, wazi bonyana uzakusekela.’ (Rhu. 55:23, [55:22, NW]) Singaba nethemba eliqinileko kuZimu bonyana angenza “okukhulu ngokungalinganisekiko ukudlula lokho esikukhombelako.” (Efe. 3:20) Cabanga nje ingasi ngokulinganiswako kwaphela kodwana “ngokungalinganisekiko”!

9. Kubayini siqiniseka ngeenthembiso zakaJehova?

⁹ Kobanyana sikwazi ukufunyana iimbusiswezi kufuze sibe nokukholwa okuqinileko kuJehova begodu silalele nemiyalwakhe. UMosi watjela ama-Israyeli wathi: “[uJehova] uzonibusisa enarheni aniphe yona kobana ibe lilifa lenu, kwaphela nakube nilalela ilizwi [lakaJehova] uZimenu, niyelele ukwenza yoke imiyalo enginiyala ngayo namhlanje. Ngambala uJehova uZimenu uzanibusisa njengombana anithembisa.” (Dut. 15: 4-6) Inga-kghani uyaqiniseka bonyana uJehova uzokuvuza nawuragela phambili nokumlotjha ngokuthembeka? Eqinisweni unazo zoke iinzathu ezizwakalako zokwenza njalo.

UJEHOVA BEKAMVUZI WABO

10, 11. UJehova wambusisa njani uJosefa?

¹⁰ IBhayibheli latlolelwa ukusifundisa. Yeke lisitjela ngeembonelo ezinengi ezisitjengisa indlela uZimu abusisa ngayo iinkhonzi zakhe. (Rom. 15:4) UJosefa usibonelo esihle sendaba le. Ngebanga lamaqhinga amambi wabafowabo nokungathembeki komfazi womphathakhe wazifunyana sele asibotjhwa seGibhide. Inga-kghani lokho kwamenza walahla uZimakhe? Awa! “UJehova waba nesisa kuJosefa . . . gade anoJosefa begodu amphumelelisa kinanyana yini agade ayenza.” (Gen. 39:21-23) Nanyana uJosefa aqalana neentjhijilo ezibuhlungu kangaka wahlala athembekile kuZimu.

¹¹ Ngemva kweminyaka, uFaro watjhaphulula uJosefa ngejele wamenza umengameli wesibili wenarha yoke yeGibhide. (Gen. 41:1, 37-43) Kwathi lokha umkaJosefa nakabeletha amadodanabo amabili, ‘uJosefa wathiya izibulo bona nguManase wathi: “Kungebanga lokobana uZimu ungenze ngakhohlwa boke ubudisi bami kanye nawo woke umuzi kababa.” Indodana yesibili wayithiya bona ngu-Efrayimu wathi: “Kungebanga lokobana uZimu ungiphumelelisile enarheni yokurhubutjhwa kwami. ”’ (Gen. 41:51, 52) Ngebanga lokobana uJosefa wahlala athembekile kuZimu, wabusiswa ngokuthi asindise ama-Israyeli namaGibhide endlaleni. Iphuzu esilifunyana endabeni le kukuthi uJosefa watjheja bonyana nguJehova owambusisako.—Gen. 45: 5-9.

12. Khuyini eyasiza uJesu bonyana ahlale athembekile nakalingwako?

¹² Ngokufanako uJesu Krestu naye wahlala athembekile kuZimu ngitjho nalokha aqalene neenlingo, begodu wabusiswa. Wasizwa yini? IBhayibheli lithi: “Okwathi esikhundleni setokozo ebe ibekwe phambi kwakhe, wanyamezelela [ukubethelwa esigodweni] angakhathaleli ukurhubutjhwa.” (Heb. 12:2) Abe akubuzwa bonyana uJesu wakuthabela kwamambala ukuphazimulisa ibizo lakaZimu. UJehova wamamukela bewambusisa ngamanye amalungelo amanengi. IBhayibheli libika ukuthi “uhlezi ngesidleni sesihlalo sobukhosi sakaZimu.” Libuye lithi: “Ngalokho uZimu wamphakamisa, wamnikela ibizo elingaphezu kwamabizo woke.”—Flp. 2:9.

UJEHOVA AKAYIKHOHLWA IMISEBENZETHU

13, 14. UJehova uzizwa njani ngomsebenzi esimenzela wona?

¹³ Singaqiniseka bonyana uJehova uyayithokozela imizamo esiyenzako yokumkhonza. Uyazwisisa nokobana ngezinye iinkhathi sizizwa singafaneleki. Uzwelana nathi lokha sizizwa siphela amandla ngebanga lokuba nomraro wezemmali, ipilo engasi yihle nanyana amazizo asenza singakwazi ukwenza esikufisako emsebenzini kaJehova. Kodwana singaqiniseka bonyana uJehova uyayithokozela imizamo yethu yokuhlala sithembekile kuye.—Funda amaHebheru 6:10, 11.

¹⁴ Khumbula godu bonyana singatjhidela kiloyo “ozwa imithandazo” sinethemba lokobana uzoyilalela imithandazwethu. (Rhu. 65:3, [65:2, NW]) ‘UYise wesirhawu noZimu wenduduzo yoke,’ uzosipha isekelo esilitlhogako kinanyana yini esitshwenyako, ngezinye iinkhathi usisekela ngabafowethu esilotjha nabo uZimu. (2 Kor. 1:3) UJehova uthaba kwamambala lokha nasitlhogomelanako. “Onomusa kochakileko, uboleka [uJehova], yeke uzamvuza ngalokho.” (IzA. 19:17; Mat. 6: 3, 4) Nawusiza abanye ngokusuka ehliziyweni kubangasuthi uboleka uJehova. Begodu ukuthembisa bonyana uzokubusisa.

IIMBUSISO ZANJE NEZESIKHATHI ESIZAKO

15. Ngisiphi isibusiso osiqale ngabomvu? (Qala isithombe esisekuthomeni.)

¹⁵ Abakhethiweko basizwa kucabanga ngethemba lokobana bazokwamukela “isihlohlo sokulunga iKosi emgwebi olungileko ezabanikela sona mhlokho.” (2 Thim. 4:7, 8) Ngekhe wazizwa kabuhlungu nange uZimu akubusisa ngokuhlukileko. Iingidi “zezinye izimvu” zakaJesu zisiqale ngabomvu isibusiso sepharadesi elizako lapho ziyokuphila ephasini isiphelani. ‘Ziyokuthabela ukuthula okukhulu.’—Jwa. 10:16; Rhu. 37:11.

16. Ngimaphi amezwi aduduzako esiwafunyana kweyoku-1 Jwanisi 3:19, 20?

¹⁶ Ngezinye iinkhathi singabona ngasuthi asenzi ngokwaneleko, nanyana singazibuza bonyana uJehova uyayithabela na imizamo esiyenzako. Nanyana sizizwe ngasuthi asikafanelwa ziimbusiso. Kodwana singakhohlwa bonyana “uZimu mkhulu kuneenhliziyo zethu begodu wazi koke.” (Funda yoku-1 Jwanisi 3:19, 20.) Ubusisa nanyana ngimiphi imizamo esiyenzako bonyana kuphazinyuliswe igama lakhe kungakhathaliseki bonyana thina siyibona imincani kangangani.—Mar. 12:41-44.

17. Sifunyana ziphi iimbusiso namhlanjesi?

¹⁷ Ngitjho neenkhathini ezibudisezi zemihla yokuphela, uJehova usaragela phambili nokuzibusisa iinkhonzi zakhe. Wenza iqiniso lokobanyana iinkhonzo zakhe ziyaphumelela emisebenzini yokumlotjha bezithabele nokuthula. (Isa. 54:13) Njengoba uJesu asithembisa, uJehova namhlanjesi usibusisa ngokuthi asivumele sibe yincenye yehlanganwakhe emndeninakhe onethando wephasi loke. (Mar. 10:29, 30) Ngaphezu kwalokho labo abazidelako benze imisebenzi edumisa uZimu babusiswa ngokuthula komkhumbulo, ukwaneliseka nethabo.—Flp. 4:4-7.

18, 19. Iinkhonzi zakaJehova zizizwa njani ngeembusiso ezizifunyanako?

¹⁸ Iinkhonzi zakaJehova ephasini mazombe ziyavuma bonyana uZimu uyazibusisa. Ngokwesibonelo, uBianca ohlala eJarimani uthi: “Angikghoni ukumthokoza ngokwaneleko uJehova ngokungisiza ngeenkinga zami nokungisekela qobe langa. Isikhathi esiphilakiso simbi khulu, kodwana ngebanga lokobana ngihlala ngitjhidelene noJehova, ngizizwa ngivikelekile. Qobe nangizidelako ngenze izinto ezimthabisako, ungibusisa ngendlela erarako.”

¹⁹ Akhesikhulume nangoPaula oneminyaka ema-70 ubudala ohlala eCanada, ophethwe kugula okubizwa bonyana yi-spina bifida (kuvuleka komgogodlha lokha umntwana angakabelethwa) uthi: “Ubulwelobu khange bungenze ngehlise izinga engisebenzela ngalo uZimu, ngenza koke engingakwenza ekonzweni, njengokutjhumayela ngomtato nangokuhlanganyela ekutjhumayeleni okuhleliweko. Bonyana ngizikhuthaze, nginencwadi engitlola kiyo imitlolo namaphuzu engiwafunyana eencwadini zehlangano. Ngiyibiza ngokuthi ‘Yincwadami Yepumelelo.’ Amatshwenyeko awanamandla nange sithembele kuJehova. UJehova uhlala akulungele ukusisiza kungakhathaliseki bonyana siqalene namiphi imiraro.” Siyavuma bonyana wakho umraro kungenzeka awufani nowakaBianca noPaula. Kodwana kungakusiza ukucabanga ngendlela uJehova akusiza ngayo namkha ngendlela asiza ngayo abahlanukwakho. Kungaba kuhle kangangani ukucabangisisa ngendlela uJehova akubusisa ngayo namhlanjesi nangendlela azokubusisa ngayo ngesikhathi esizako.

20. Khuyini esingayilindela nange silotjha uZimu ngeenhliziyo ezipheleleko?

²⁰ Ungakhohlwa bonyana umthandazwakho osuka ehliziyweni nokukhuluma ngokutjhaphulukileko noZimu kuzokwenza ufunyane ‘umvuzo omkhulu.’ Ungaqiniseka ukuthi ngemva kobana ‘sewenze intando kaZimu, uzokwamukela ukuzaliseka kwesithembiso.’ (Heb. 10:35, 36) Akhesirageleni phambili nokuqinisa ukukholwa kwethu nokusebenzela uJehova ngeenhliziyo ezipheleleko. Nasenza njalo singaqiniseka bonyana uJehova uzosibusisa.—Funda yebeKolose 3:23, 24.