Ngibonakala Nginjani KuJehova?
1. IBhayibheli lifana njani nesiboniboni?
1 Uziqala kangangani esibonibonini? Abanengi bethu siziqala qobe langa ngombana lokho kusisiza sibone iindawana ezitlhoga ukutjhejwa endleleni esiqaleka ngayo. IBhayibheli lifaniswa nesiboniboni. Ukufunda iliZwi lakaZimu kusenza sikghone ukubona umuntu esinguye ngaphakathi, umuntu obonwa nguJehova. (1 Sam. 16:7; Jak. 1:22-24) IliZwi lakaZimu “likwazi ukuhlukanisa imicabango nemizindlo yehliziyo.” (Heb. 4:12) Ukufunda nokuzindla ngeBhayibheli qobe langa kungasisiza njani sibone lapho ekutlhogeka sithuthukise khona bona sibe bavangeli abaphumelelako?—Rhu. 1:1-3.
2. IBhayibheli lingasisiza njani sizihlole?
2 Sebenzisa IBhayibheli Njengesiboniboni: Iindaba eziseBhayibhelini zeenceku zakaJehova ezithembekileko zisifundisa bona ngiziphi iimfanelo azithandako. Ngokwesibonelo, uDavida bekalitjhisakalela ibizo lakaZimu. (1 Sam. 17:45, 46) Ngesibindi, u-Isaya wazikhethela ngokuzithandela ukutjhumayela esimini ebudisi. (Isa. 6:8, 9) Ithando lakaJesu elidephileko ngoYise wezulwini lamenza waqala ikonzwakhe njengomthombo wokuqabuleka esikhundleni sokuba mthwalo ongathandeki. (Jwa. 4:34) AmaKrestu wekhulu lokuthoma atjhumayela ngetjiseko, athembela kuJehova, begodu bekazimisele ukungalahli itewu. (IzE. 5:41, 42; 2 Kor. 4:1; 2 Thim. 4:17) Ukuzindla ngeembonelo ezinjalo kuzosisiza siziqale sinomnqopho wokuthuthukisa izinga lekonzwethu ecwengileko.
3. Kubayini kungakafaneli siriyade ukwenza amatjhuguluko atlhogekako?
3 Lungisa: Akusizi ngalitho ukuziqala esibonibonini bese singenzi litho ngemitjhapho esiyibonako. Singabawa uJehova asisize sizihlole ngomqondo ovulekileko bese asisize senze amatjhuguluko atlhogekako. (Rhu. 139:23, 24; Luk. 11:13) Njengombana isikhathi esiseleko sinciphile begodu amaphilo wabantu asengozini, akukafaneli siriyade ukwenza amatjhuguluko atlhogekako.—1 Kor. 7:29; 1 Thim. 4:16.
4. Kwenzekani kumuntu oziqalisisa eliZwini lakaZimu bese alungise lokho akubonako?
4 Umuntu esinguye ngaphakathi—okunguye uJehova amtjhejako—uqakatheke khulu kunendlela esiqaleka ngayo ngaphandle. (1 Pit. 3:3, 4) Kwenzekani kumuntu oziqalisisa eliZwini lakaZimu bese alungise lokho akubonako? Akabi ‘mlaleli okhohlwako kodwana uba ngowenzako, loyo-ke uzakuba ngobusisiweko ekwenzeni kwakhe.’ (Jak. 1:25) Kwamambala, sizokuthaba begodu sibe ziinkhonzi eziphumelelako ngombana ‘sizokubonakalisa iphazimulo [kaJehova] inga ibonakaliswe ngesiboniboni.’—2 Kor. 3:18.