Bandula Abantwana Bakho Bona Babe Ziinkhonzi
1. Amarhalani 148:12, 13 atjhukumisela ababelethi abamaKrestu bona benzeni?
1 UJehova umema ilutjha bona limdumise. (Rha. 148:12, 13) Ngalokho-ke, ababelethi abamaKrestu benza okungaphezu kokufundisa abantwana babo amaqiniso aseBhayibhilini nemithetho kaZimu yokuziphatha. Godu bababandula bona babe ziinkhonzi zeendaba ezihle. Lokhu kungenziwa njani ngokuragela phambili?
2. Isibonelo esihle sababelethi singabathinta njani abantwana babo?
2 Isibonelo Esihle: Umahluleli uGidiyoni watjela amadoda ama-300 egade anaye wathi: “Fundani ngokuqala mina.” (Hlu. 7:17) Ngokwemvelo abantwana baqala begodu balingise ababelethi babo. Omunye ubaba osebenza ebusuku, kunokobana ayokulala nakafika ekhaya ngoMgqibelo ekuseni, uthatha abantwana bakhe akhambe nabo esimini ngitjho nanyana adiniwe. Ngaphandle kobana akhulume, ubafundisa bona ikonzo iza mantanzi. (Mat. 6:33) Abantwana bakho bayakubona uhlanganyela ngethabo emazikweni ahlukahlukeneko wokukhulekela, njengokuthandaza, ukufunda iBhayibhili, ukuphendula nokutjhumayela? Kuliqiniso, angekhe ube sibonelo esipheleleko. Kodwana abantwana bakho bazokutjhigamela khudlwana ekusabeleni emzamweni yenu yokubafundisa ukukhulekela uJehova nababona ikuthalo yenu yokumkhonza.—Dut. 6:6, 7; Rom. 2:21, 22.
3. Ngimiphi iimnqopho engokomoya ababelethi ekufuze barhelebhe abantwana babo bazibekele yona begodu bayifikelele?
3 Iimnqopho Eragela Phambili: Ngokungadinwa ababelethi babandula abantwana babo ukukhamba, ukukhuluma, ukuzimbathisa nezinye izinto. Njengombana abantwana bafikelela ezingeni elaneleko lokukhula, babekelwa iimnqopho emitjha. Nengabe ababelethi bamaKrestu, godu barhelebha abantwana babo bona babeke bebafikelele iimnqopho engokomoya ngokuya ngeemnyaka namakghono wabo. (1 Kor. 9:26) Uyababandula na abantwana bakho bona banikele iimpendulo ngamezwi wabo nokobana balungiselele iinkulumo zabo eSikolweni Sekonzo Sezulwini? (Rha. 35:18) Uyababandula bona bahlanganyele emazikweni ahlukahlukeneko wekonzo? Uyababekela umnqopho wokubhabhadiswa nokungenela ikonzo yesikhathi esizeleko? Uyabarhelebha bona bazihlanganise nabatjhumayeli abathabileko nabatjhisekako abazobakhuthaza?—Iziy. 13:20.
4. Bazuza njani abantwana ukuba nababelethi ababandula ekonzweni kusukela basesebancani?
4 Umrhalani wathi: “Kwasebutjheni bami Zimu ungifundisile; nanje, ngisamemezela iimangaliso zakho.” (Rha. 71:17) Thoma ukubandula abantwana bakho kusukela basesebancani bona babe ziinkhonzi. Isisekelo esingokomoya enibarhelebha bona bazibekele sona sizobazuzisa nesele bakhulile!—Iziy. 22:6.