Kubayini Kufuneka Uhlole IBhayibhili?
Ujayelene neBhayibhili? Incwadi eqakathekileko le, ngiyo eyasakazwa khulu emlandweni. Abantu bawo woke amasiko bafumane umlayezo wayo utjhiriya, unikela ithemba begodu nesikhuthazo sawo siberega ekuphileni kwelanga nelanga. Kodwana, kuncani abanengi abakwaziko ngeBhayibhili. Ukholiwe nanyana awukakholwa, kungenzeka unekareko ngalokho okuseBhayibhilini. Incwajana le, yenzelwe ukukunikela ihlathululo efitjhani ngalokho okuseBhayibhilini.
NGAPHAMBI kokobana uthome ukufunda iBhayibhili, kuyarhelebha ukuba nelwazi elithileko ngendlela iBhayibhili ehlophiswe ngayo. IBhayibhili yaziwa nangokobanyana Mitlolo eCwengekileko, eneencwadi eziyi-66 ukusukela kuGenesisi ukuya kuSambulo.
Umlayezo oseBhayibhilini uvela kubani? Lo, mbuzo oqakathekileko. IBhayibhili yatlolwa madoda angaphezu kwayi-40 hlangana neminyaka eyi-1 600. Okukarisako, amadoda la, khenge athi umlayezo oseBhayibhilini uvela kiwo. Omunye wabatloli wathi: ‘Koke okusemtlolweni ocwengileko kwaba khona ngokufunzelelwa ngumoya kaZimu.’ (2 Thimothi 3:16) Omunye wabatloli wathi: “Umoya kaJehova wakhuluma usebenzisa mina, begodu ilizwi lakhe beliselimini lami.” (2 Samuweli 23:2) Abatloli batjho bona iBhayibhili ivela kuJehova uZimu, uMbusi Ophakemeko wezulu nephasi. Abatloli baveza bona uZimu ufuna abantu bamazi.
Kunenye into eqakathekileko ekwazini iBhayibhili. IBhayibhili inesihloko esisodwa kwaphela: ukulwela kwelungelo lakaZimu lokubusa soke isintu ngoMbuso wezulwini. Emakhasini alandelako sizokubona bonyana kubayini sithi iBhayibhili inesihloko esisodwa kwaphela kusuka kuGenesisi ukuya kuSambulo.
Unalokhu esele ukufundile emkhumbulweni, kwanje tjheja umlayezo ofumaneka encwadini eqakatheke khulu ephasini, iBhayibhili.
[Ibhoksi elisekhasini 3]
AMAPHUZU ALIRHELEBHO MALUNGANA NEBHAYIBHILI
◼ IBhayibhili yatlolwa eminyakeni engaphezu kweyi-1 610, ukusuka ku-1513 N.K.J. ukuya ku-98 K.J.a
◼ Iincwadi zokuthoma eziyi-39—ezinengi zazo zitlolwe ngesiHebheru, ezinye iingcenye zazo ngesi-Aramu—zaziwa bonyana Mitlolo yesiHebheru namtjhana “iTestamende Elidala.”
◼ Iincwadi zamaswaphela eziyi-27—zitlolwe ngesiGirigi—zaziwa ngokobanyana Mitlolo yamaKrestu yesiGirigi, namtjhana “iTestamende Elitjha.”
◼ IBhayibhili ihlukaniswe ngezahluko namavesi. Isitjengiso; nekuthiwa Mathewu 6:9, 10, vane batjho isahluko 6 sencwadi kaMathewu amavesi ngu 9 no 10.
[Umtlolo waphasi]
a Kuneendlela ezinengi ezihlukileko ezitjengisa amalanga. Encwajaneni le, isifitjhaniso u-K.J. utjho bonyana “ngemva kweenkhathi zakaJesu,” isifitjhaniso u-N.K.J. sitjho bonyana “ngaphambi kweenkhathi zakaJesu.” Lokhu nizokubona kutjengiswe enzasi kwekhasi.