Isifundo 1

UZimu Ukumema Bonyana Ube Mnganakhe

UZimu ufuna bonyana ube mnganakhe. Wakhe wacabanga bona ungaba mngani Womuntu omkhulu ezulwini nephasini loke? U-Abrahama, owaphila esikhathini eside esidlulileko gade abizwa ngomngani kaZimu. (Jakobosi 2:23) Abanye okukhulunywe ngabo eBhayibhilini bathabela ubungani noZimu begodu babusiswa khulu. Namhlanje, abantu abavela mahlangothi woke wephasi babe bangani bakaZimu. Nawe ungaba mngani kaZimu.

Ukuba mngani kaZimu kubhedere kunokuba mngani wanoma ngimuphi omunye umuntu. UZimu akabadanisi abangani bakhe abathembekileko. (AmaRhalani 18:25) Ukuba mngani kaZimu kubhedere kunoburego. Umuntu oregileko nahlongakalako, imalakhe iya kwabanye. Nokho, labo abathabela ukuba nobuhlobo noZimu banegugu engeze lathathwa mumuntu.—Matewu 6:19.

Abanye abantu bangalinga ukukuvimbela ekufundeni ngoZimu. Ngitjho abangani nabekhenu bangakwenza lokhu. (Matewu 10:36, 37) Nangabe abanye bayakuhleka namtjhana bayakuthusela, zibuze, ‘Ngifuna ukuthabisa bani abantu namtjhana uZimu?’ Cabanga ngalokhu: Nakunomuntu okutjela bona ulise ukudla, bewuzamlalela? Bewungeze! Kufuneka udle newuzakuphila. Kodwana uZimu angenza uphile ngokungapheliko! Ngalokho ungavumeli namtjhana ngubani akuvimbele ekufundeni bonyana ungaba njani mngani kaZimu.—Jwanisi 17:3.