Ragela Phambili Uthuthuka Njengenceku
1. Ngiziphi iimbonelo zangekhulu lokuthoma ezitjengisa ukuthi kufuze sithuthuke njengeenceku?
1 AmaKrestu kufuze athuthuke njengeenceku. Ngikho uJesu anikela abafundi bakhe ibandulo bona bathuthuke emsebenzini wokutjhumayela. (Luk. 9:1-5; 10:1-11) Kungebangelo-ke uPrisila no-Akhwila bathatha u-Apolo baya naye ekhaya “bamhlathululela kuhle indlela kaZimu.” (IzE. 18:24-26) Ngeenzathu ezifanako, uPowula, umtjhumayeli onelemuko wakhuthaza uThimothi bona aragele phambili nokuzinikela ekufundiseni kwakhe, khona ituthukwakhe ‘izakubonakala kibo boke.’ (1 Thim. 4:13-15) Ngitjho nanyana sele kusikhathi eside siziinceku zeKosi, kodwana kusatlhogeka sithuthukise amakghonwethu wokutjhumayela njengabarhuweleli beendaba ezimnandi.
2. Singafunda njani kwabanye?
2 Ukufunda Kwabanye: Indlela yokuthuthukisa amakghonwethu ikufunda kwabanye. (IzA. 27:17) Yeke, kufuze sitjheje khulu abanye abarhuweleli nabethula iintjumayelo zabo. Ungabawa neemphakamiso kilabo ababatjhumayeli abanamakghono, bewulalelisise kuhle lokho abakutjhoko. (IzA. 1:5) Kghani usese nokuzaza ngokwenza amabuyelo, ukuthoma isifundo seBhayibheli, namkha ukwenza eminye imikhakha yekonzo? Thatha igadango lokuya kumbonisi wesiqhema senu namkha umrhuweleli onelemuko umbawe bona akubandule. Khumbula ukuthi, umoya kaJehova ocwengileko ungasiza ekuthuthukiseni amakghonwenethu, ngalokho-ke ubawe qobe nawuthandazako.—Luk. 11:13.
3. Kufuze sizizwe njani nengabe sifumana isiphakamiso, mhlamunye singakasibawi?
3 Ungazizwa kumbi nengabe ufumana isiphakamiso sokuthi uthuthukise ngitjho nanyana bewungakasibawi. (UMtj. 7:9) Kufuze wenze njengo-Apolo, wamukele isizo ngokuzithoba bewuthokoze. Ukwenza njalo kutjengisa ukuhlakanipha.—IzA. 12:15.
4. Ngisiphi isizathu esinamandla uJesu asinikelako sokuthuthuka njengabavangeli?
4 Ituthuko Idumisa UZimu: Nakasebenzisa umfanekiso, uJesu wakhuthaza abalandeli bakhe ukuthi bathuthuke njengeenceku. Wazimadanisa nesidiribe kwathi abalandeli bakhe abazesiweko wabafanisa namagatja. Wathi uBaba uhlunga woke amagatja athelako, ‘khona azakuthela khulu.’ (Jwa. 15:2) Kufana nomnikazi wesimu yesidiribe okhanukela ngathana amagatja wesidiribe sakhe angathela khulu, uJehova ufuna siragele phambili sikhulisa amakghonwethu akwazi ukuthela “iinthelo zembhena.” (Heb. 13:15) Ubayini-ke umphumela lokha nasenza ituthuko njengabavangeli? UJesu usinikela ipendulo: “UBaba uphazimuliswa kuthela kwenu iinthelo ezinengi.”—Jwa. 15:8.