Sebenzisa “Isethulo SeliZwi LakaZimu”—Ukuthoma Ingcoco
1. Ngiliphi ithulusi elitjha esilifumeneko esizolisebenzisa ekonzweni yesimini?
1 IBhayibheli elibuyekeziweko i-New World Translation nawuyivula emathomeni inengcenye ebizwa ngokuthi “Isethulo SeliZwi LakaZimu.” Singalisebenzisa bunjani ithulusi elitjheli nasilungiselela iintjumayelo zekonzo yesimini? Indlela ehleleke ngayo ibunje, inehlelo lemitlolo ngokwenaneko lakhona ngaphasi kweenhloko ezihlukahlukeneko zeBhayibheli. Indlela eyenziwe ngayo ifana naleyo ekwenziwe ngayo incwadi ethi Ukubonisana, ingaba lisizo khulu nasingayisebenzisa ukuthomisa iingcoco.
2. Singayisebenzisa njani incwajana ethi, “Isethulo SeliZwi LakaZimu.” ekonzweni yesimini?
2 Ungasebenzisa umbuzo 8 bese uthi: “Sivakatjhele abomakhelwana bethu ngebanga lokuthi abantu abanengi bazibuza ukuthi, ‘Kazi uZimu umlandu na ngokutlhaga kwabantu?’ [Kezinye iindawo, kuyaphumelela ukuthi utjengise umninimuzi umbuzo.] Uthini wakho umbono? [Lindela ipendulo.] IBhayibheli inempendulo eyanelisako yombuzo lo.” Fundani nofana nicoce ngamanye amavesi adzujulwe eBhayibhelini. Nangabe umninimuzi utjengisa ikareko, ungamtjengisa imibuzo ema-20 esesingenisweni bese umbawe ukuthi akhethe munye enizokucoca ngawo ngokuzako. Namkha ungamnikela enye yeencwadi zethu ephethe okungeziweko ngendaba ebenicoca ngayo.
3. Singayisebenzisa njani incwajana ethi, “Isethulo SeliZwi LakaZimu.” ukuthoma ingcoco esimini yabantu abangekho ekolweni yobuKrestu?
3 Imibuzo 4, no-13 kuya ku-17 ingasisiza ngokukhethekileko nasitjhumayela esimini yabantu abangekho ekolweni yobuKrestu. Ngokwesibonelo, ungasebenzisa ukwaziswa okusembuzweni 17 bese uthi: “Siziinsebenzi zomphakathi sivakatjhele imindeni. Awuvumi na ukuthi imindeni namhlanjesi iqalana neentjhijilo ezinengi? [Lindela ipendulo.] Abantu abanengi abatjhadileko bafumene amezwi ahlakaniphileko la alisizo: “Nomfazi kumele ahloniphe indodakhe.” [Akutlhogeki ukutjho ukuthi amezwi la akweyebe-Efesu 5:33. Nangabe ukhuluma nomuntu wengubo, ungagandelela amezwi wencwadi yebe-Efesu 5:28.] Kghani ucabanga ukuthi nasingasebenzisa iselulekwesi angeze kwasizuzisa lokho emitjhadweni?”
4. Yini ongayenza ekuphetheni kwengcocwakho nomuntu ongekho ekolweni yobuKrestu?
4 Nawuphetha ingcocwakho, yenza amalungiselelo wokuthi niragele phambili ngokuzako ngendaba ebenicoca ngayo. Mhlamunye ungahlela ukukhuluma ngomunye wemitlolo osembuzweni oyisebenzisileko. Akuthi ngesikhathi esifaneleko, umazise umninimuzi ukuthi ukwaziswa okuhlakaniphe kangaka obewumhlephulela khona kuvela eBhayibhelini. Ngokusekelwe ngokwalokho enicoce ngakho ngaphambilini nokuthi unjani umbonwakhe ngeBhayibheli, mnikele incwadi ocabanga ukuthi ingamkara.—Qala isihlomelelo esiku-Konzwethu YomBuso kaDisemba 2013.