Iinkhombiso Zencwajana Ethi IPilo NomSebenzi WobuKrestu IHlelo LomHlangano WeBandla
FEBHERBARI 5-11
AMAGUGU ASELIZWINI LAKAZIMU | MATEWU 12-13
“Umfanekiso Wekoroyi Nekhula”
(Matewu 13:24-26) Wabenzela omunye umfanekiso, wathi: “UmBuso wezulu ungafaniswa nomuntu owatjala imbewu ehle esiminakhe. 25 Kwathi abantu basalele, kwafika inaba lakhe latjala ikhula hlangana nekoroyi lakhamba. 26 Kuthe ikoroyi nayikhulako iveza iinthelo, nekhula nalo labonakala.
‘Nginani Njalo Bekube Sikhathi Sokuphela’
2 Okwenzeka esimini yomlimi kutjengisa ukuthi uJesu uzosibutha nini begodu njani soke isigaba sekoroyi ebantwini—amaKrestu azesiweko azokubusa naye emBuswenakhe. Ukutjala kwathoma ngePentekoste laka-33 C.E. Ukubutha kuzokuphela lokha abazesiweko abaphila ekupheleni kwephaseli babekwa iphawu kwamaswaphela bese bathathwa bayiswa ezulwini. (Mat. 24:31; IsAm. 7:1-4) Njengombana ukujama esiqongolweni sentaba kwenza umuntu akubone kuhle koke okumbhodileko, nomfanekiso lo usinikela umbono othe tjha walokho okwenzeka esikhathini esingaba minyaka ezi-2 000. Njengokungathi sisesiqongolwenapho, ngiziphi izenzakalo ezihlobene nomBuso esizibonako? Umfanekiso lo uhlathulula isikhathi sokutjala, sokukhula, nesokuvuna. Ngokuyihloko, isihlokwesi sizokudzimelela esikhathini sokuvuna.
UKUBA NGAPHASI KWETLHOGOMELO KAJESU
3 Ekuthomeni kwekhulu lesibili C.E., ‘ikhula lazipha amandla’ nekuvela amaKrestu womgunyathi esimini yephasi. (Mat. 13:26) Ngekhulu lesine, amaKrestu anjengekhula besekawadlula khulu ngesibalo amaKrestu azesiweko. Khumbula bona emfanekisweni, iinceku zabawa ikosazo bona izivumele ziruthule ikhula. (Mat. 13:28) Ikosi yasabela njani?
(Matewu 13:27-29) Ngalokho iinsebenzi zomuntu loyo zafika kuye zathi, ‘Kosi, akhenge utjale imbewu ehle esiminakho na? Alo-ke, kubayini kunekhula?’ 28 Wathi kizo, ‘Linaba elenze lokhu.’ Iinsebenzi zathi kuye, ‘Ufuna sikhambe siyoliruthula?’ 29 Wathi, ‘Awa, ngombana ngisaba ukuthi naniliruthulako, ningaruthula nekoroyi.
‘Nginani Njalo Bekube Sikhathi Sokuphela’
4 Akhuluma ngekoroyi nekhula, uJesu wathi: “Lisani kukhule kokubili njalo ndawonye.” Umlayo lo wembula bona kusukela ngekhulu lokuthoma bekube kunamhlanjesi, bekusolo kunamaKrestu azesiweko anjengekoroyi ephasini. Isiphethweso siqinisekiswa ngilokho uJesu akutjela abafundi bakhe kamva: ‘Nginani njalo bekube sikhathini sokuphela.’ (Mat. 28:20) Ngalokho amaKrestu azesiweko bekazokuvikelwa nguJesu hlangana nawo woke amalanga adosela esikhathini sokuphela. Nokho, njengombana bekasithibezwe maKrestu anjengekhula, asazi ngokunqophileko ukuthi bobani ebekungebesigaba sekoroyi hlangana nesikhathi esideso. Nokho, amatjhumi weminyaka ambalwa ngaphambi kokuthoma kwesikhathi sokuvuna, isigaba sekoroyi sathoma ukubonakala. Kwenzeka njani lokho?
(Matewu 13:30) Kuliseni kukhule koke bekube sikhathi sokuvuna, ngesikhathi sokuvuna ngizokuthi kubavuni: Thomani ngokuruthula ikhula nilenze libe yinyanda niyolitjhisa; bese nibuthelela ikoroyi ngesilulwini sami.’”
‘Nginani Njalo Bekube Sikhathi Sokuphela’
10 Kokuthoma, kubuthelelwa kwekhula. UJesu uthi: “Ngesikhatheso ngizokutjela abavuni ngithi: Thomani ngokubuthelela ikhula bese nilibopha libe ziinyanda.” Ngemva kwaka-1914, iingilozi zathoma ‘ukubuthelela’ amaKrestu anjengekhula ngokuwahlukanisa kwabazesiweko ‘abamadodana wombuso.’—Mat. 13:30, 38, 41.
11 Njengombana umsebenzi wokubuthelela uragela phambili, ukungafani hlangana neenqhema eembilezi kwakhanya bha. (IsAm. 18:1, 4) Ngo-1919, kwaba sepepeneneni bona iBhabheli Elikhulu liwile. Khuyini ngokukhethekileko eyahlukanisa amaKrestu weqiniso kumaKrestu wamala? Msebenzi wokutjhumayela. Labo abebadosa phambili kubaFundi beBhayibheli bathoma ukugandelela ukuqakatheka kokobana umuntu ngamunye ahlanganyele emsebenzini wokutjhumayela ngomBuso. Ngokwesibonelo, iphetjhana elagadangiswa ngo-1919, elithi: To Whom the Work Is Entrusted, lakhuthaza woke amaKrestu azesiweko bona atjhumayele umuzi nomuzi. Lathi: “Umsebenzi lo ubonakala ungangentaba, kodwana ngeweKosi, begodu ngamandlayo sizowenza. Unelungelo lokuhlanganyela kiwo.” Asabela njani? Kusukela ngesikhatheso kuyaphambili, njengombana kwabika i-The Watch Tower ngo-1922, abaFundi beBhayibheli bandisa umsebenzabo wokutjhumayela. Kungakabiphi, ukutjhumayela umuzi nomuzi kwaba litshwayo lamaKrestu athembekileko lawo—njengobana kunjalo bekube kunamhlanjesi.
12 Kwesibili, kubuthelelwa kwekoroyi. UJesu wayala iingilozi zakhe: “Nibuthelele ikoroyi niyithele ngesilulwini sami.” (Mat. 13:30) Kusukela ngo-1919, abazesiweko babuthelelwa ebandleni lobuKrestu elivuselelweko. KumaKrestu azesiweko azabe asaphila ekupheleni kwephaseli, ukubuthelelwa kwamaswaphela kuyokwenzeka nekafumana umvuzwawo wezulwini.—Dan. 7:18, 22, 27.
Rhubhulula Ngezinto ZakaZimu Eziligugu
(Matewu 12:20) Angeze siwuqedelele umhlanga otshinyekileko, nesibani esififiyelako asizusicima, bekube kulapho siletha ubulungiswa ngepumelelo.
nwtsty okuzokufundwa ngakho kuMat 12:20
isibani esififiyelako: Sibani esijayelekileko ebekukhanyiswa ngaso ngendlini, bekuyipotjwana eyenziwe ngomdaka ebeyithelwa amafutha we-oliva. Intambo eyenziwe ngefilaksi imunya amafutha akhuphuke eze elangabini. Ibizo elithi “isibani esififiyelako” ngesiGirigi lingatjho isibani esikhipha intuthu ngebanga lokuthi ihlasi isesekhona kodwana umlilo sele ufuna ukucima. Isiphorofido esiku-Isaya 42:3 sabikezela ngokuba nezwelo kwakaJesu ukuthi angekhe acima ihlasi yethemba ebantwini abathobekileko nabagandelelekileko.
(Matewu 13:25) Kwathi abantu basalele, kwafika inaba lakhe latjala ikhula hlangana nekoroyi lakhamba.
Inga-kghani Bewazi?
Ekadeni bekukghonakala na ukuthi umuntu angatjala ikhulu esimini yomunye umuntu?
KUMATEWU 13:24-26, kudzujulwe uJesu athi: “Umbuso wezulu unjengomuntu owatjala imbewu ehle esiminakhe. Kodwana kwathi woke umuntu asalele, isitha sakhe safika satjala ikhula hlangana nekoroyi sabe sakhamba. Kwathi lokha ikoroyi nayikhulako ithoma nokuphalaza nekhula nalo lazipha amandla.” Abatloli abahlukahlukeneko babuza bona umfanekiso lo ungathathwa njengento eyenzekako vele na, imitlolo yomthetho yamaRoma yekadeni ithi iye, ungathathwa njengento yamambala.
Esinye isihlathululi seBhayibheli sithi: “Ukutjalwa kwekhula esimini ngehloso yokuzibuyiselela . . . bekulicala elikhulu ngaphasi kokubusa kwamaRoma, ukuqakatheka komthetho lo bekungasi yinto eyaziwa kangako.” Isazi esingu-Alastair Kerr sahlathulula bona ngomnyaka ka-533, umBusi omRoma uJustinian wagadangisa incwadi ebizwa nge-Digest ekhuluma ngomthetho wamaRoma ebeyikhutjhwe zizazimthetho (zangesikhathi seminyaka pheze eli-100 ukuya kwema-250.) Ngokuya (nge-Digest, 9.2.27.14), isazimthetho ebesingunqondonqondo kwezomthetho wenarha u-Ulpian, saqalisela kelinye lamacala elakhe ladenjwa ngesinye seenkhulu zamaRoma uCelsus. Kwatjalwa ikhula esimini yomunye umuntu, konakala isitjalo ebesitjalwe lapho. I-Digest yasebenzisa umthetho ohlonyiweko bonyana iselelesi sibhadele umlimi ngebanga lomonakalo owenzekileko.
Umlandu omumbi loyo owenzeka esikhathini sokubusa kwamaRoma utjengisa ukuthi ubujamo ebakhe bahlathululwa nguJesu bebuliqiniso lento engenzeka epilweni.
Ukufundwa KweBhayibheli
FEBHERBARI 12-18
AMAGUGU ASELIZWINI LAKAZIMU | MATEWU 14-15
“Ukondla Abanengi Ngezandla Zabambalwa”
(Matewu 14:16, 17) UJesu wathi kibo: “Akutlhogeki bakhambe; bapheni nina ukudla.” 17 Bathi kuye: “Sinezikwa ezihlanu neenhlambi ezimbili kwaphela.”
Ukondla Abanengi Ngezandla Zabambalwa
2 Nekabona isiqubuthweso, uJesu uba nesirhawu ngaso, ngalokho uphulukisa abagulako hlangana naso begodu abafundise izinto ezinengi ngomBuso kaZimu. Kwathi nekuhlwako, abafundi bakhuthaza uJesu bona akhambise abantu ukwenzela bonyana batjhinge emizini eseduze bazithengele ukudla. Kodwana uJesu uthi ebafundini bakhe: “Bapheni nina ngokwenu kokugoma.” Amezwakhe la kungenzeka abarara abafundi, ngombana bebangakaphathi ukudla okuthe tjha—izikwa ezihlanu neenhlambi eembili ezincani.
(Matewu 14:18, 19) Wathi: “Ziletheni kimapha.” 19 Watjela isiqubuthu bona sihlale etjanini. Wathatha izikwa ezihlanu neenhlambi ezimbili, waqala ezulwini, wathandaza, ngemva kwalokho wahlephula izikwa, wazinikela abafundi, abafundi bazipha abantu.
Ukondla Abanengi Ngezandla Zabambalwa
3 Asikinywa sirhawu, uJesu wenza ikarisomraro—okungiyo yodwa etlolwe ngibo bobane abatloli bamaVangeli. (Mar. 6:35-44; Luk. 9:10-17; Jwa. 6:1-13) UJesu utjela abafundi bakhe bona bahlalise abantu etjanini ngeenqhema zabantu aba-50 nezaba-100. Nekaqeda ukuthandaza, uthoma ukuhlephula izikwa ahlukanise neenhlambi. Ngemva kwalokho, kunokuthi yena ngokunqophileko anikele abantu ukudla, uJesu ukunikela “abafundi bakhe, bona bakunikele abantu.” Ngokumangalisako, woke umuntu udla bekusale! Khusucabange: UJesu wondla iinkulungwana zabantu ngezandla zabambalwa—abafundi bakhe.
(Matewu 14:20, 21) Boke badla basutha, babuthelela okuseleko, kwazala abomantji abali-12. 21 Boke abadlileko bekumadoda angaba zi-5 000, ngaphandle kwabafazi nabantwana.
nwtsty okuzokufundwa ngakho kuMat 14:21
ngaphandle kwabafazi nabantwana: NguMatewu kwaphela okhuluma ngabafazi nabantwana nakalandisa ngesimangaliswesi. Kungenzeka ukuthi abantu abaphiwa ukudla ngokusimangaliso bebangaphezulu kwaka-15 000.
Ukondla Abanengi Ngezandla Zabambalwa
CABANGA ngalokhu. (Funda uMatewu 14:14-21.) Kungaphambi kwePhasika laka-32 C.E. Isiqubuthu samadoda azi-5 000, nekungakabalwa abafazi nabantwana, sinoJesu nabafundi bakhe endaweni engahlali muntu eBhethe-Sayida, umuzi oseligwini elisetlhagwini yeLwandle leGaleliya.
Rhubhulula Ngezinto ZakaZimu Eziligugu
(Matewu 15:7-9) Bazenzisi, u-Isaya waphorofida kufanele ngani nakathi: 8 ‘Abantwaba bangidumisa ngeendebe zabo, kodwana iinhliziyo zabo zikude khulu nami. 9 Bangilotjha ngelize, ngombana bafundisa imiyalo yabantu njengokungathi ziimfundiso zami.’”
nwtsty okuzokufundwa ngakho kuMat 15:7
bazenzisi: Ibizo elithi bazenzisi (hy·po·kri·tesʹ) ngesiGirigi (kamva namaRoma) litjho abantu abamaGirigi abadlala esiteji bambethe ama-mask enzelwe ukutjhentjha ilizwi. Ngokukhamba kwesikhathi ibizweli lathoma ukusetjenziswa ukufanekisa nanyana ngimuphi umuntu ofihla ubuntu bakhe ngokukhuluma amanga. UJesu wabiza abadosiphambili bekolo yamaJuda ngokuthi “bazenzisi.”—Mat 6:5, 16.
(Matewu 15:26) Wamphendula wathi: “Akukalungi ukuthatha isikwa sabantwana usiphosele izinjana.”
nwtsty okuzokufundwa ngakho kuMat 15:26
abantwana . . . izinjana: Njengombana izinja bezisilaphele ngokomThetho kaMosi, imiTlolo isebenzisa ibizweli ngomqondo wokwehlisa isithunzi. (Lev 11:27; Mat 7:6; Flp 3:2; sAm 22:15) Nanyana kunjalo, ekulumweni esencwadini kaMarkosi (7:27) nekaMatewu, uJesu usebenzise ibizo elithi “izinjana” namkha “izinja zekhaya,” bona afanise ngendlela engehlisi isithunzi. Kungenzeka lokhu kuveza ukuthi uJesu bekakhuluma ngeenlwana ezifuywako ezitlhogonyelwa kuhle babantu abangasimaJuda. Ngokufanisa ama-Israyeli ‘nabantwana’ bese abantu abangasi maJuda wabafanisa ‘nezinjana,’ uJesu bekafuna ukuveza ukuthi ngubani oza qangi. Umuzi onabantwana nezinja, bantwana abadla qangi.
Ukufundwa KweBhayibheli
FEBHERBARI 19-25
AMAGUGU ASELIZWINI LAKAZIMU | MATEWU 16-17
“Ucabanga Imicabango Kabani?”
(Matewu 16:21, 22) Kusukela lapho, uJesu wathoma ukuhlathululela abafundi bakhe bona kufuze aye eJerusalema, begodu uzokutlhagiswa khulu badala nabaphristi abakhulu nabatloli abe abulawe, bese avuswe ngelanga lesithathu. 22 UPitrosi wamdosela eqadi, wamkhalima wathi: “Ungazihloboki Kosi; angeze kwenzeke kuwe lokhu.”
w07 2/15 16 ¶17
Bobaba—Hloniphani Ubuhloko BakaKrestu
17 Kwesinye isenzakalo, uJesu wahlathululela abapostoli bakhe ukuthi kufuze aye eJerusalema, begodu “uzokutlhagiswa khulu badala nabaphristi abakhulu nabatloli abe abulawe, bese avuswe ngelanga lesithathu.” UPitrosi wamdosela ngeqadi wamkhalima wathi kuye: “Ungazihloboki Kosi; angeze kwenzeke kuwe lokhu.” Kuyabonakala ukuthi, uPitrosi bekangaqali izinto ngendlela kaZimu. Bekatlhoga ukulungiswa. Ngikho uJesu athi kuye: “Iya emva kwami Sathana! Usiqabo phambi kwami, ngombana awucabangi imicabango kaZimu kodwana yabantu.”—Matewu 16:21-23.
(Matewu 16:23) Nakaphendukako, wathi kuPitrosi: “Iya emva kwami Sathana! Usiqabo phambi kwami, ngombana awucabangi imicabango kaZimu kodwana yabantu.”
Yelela—USathana Ufuna Ukukurhiribidela!
16 USathana nasezimsuke kuhle angazinyakazisa neenceku zakaJehova ezitjhisekako. Ngokwesibonelo, cabanga ngokwenzeka ngesikhathi uJesu atjela abafundi bakhe ukuthi uzokubulawa kungasikade. Umpostoli uPitrosi ebekathanda uJesu wathi: “Sengathi uZimu angaba nomusa Kosi, koke lokho kungenzeki kuwe!” UJesu wathi kuPitrosi: “Suka kimapha, Sathana ndina!” (Matewu 16: 22, 23) Kubayini uJesu abiza uPitrosi ‘ngoSathana’? Kungombana uJesu bekakwazi kuhle ebekuzokwenzeka. Bekazokufa njengomhlatjelo wesihlengo ebewuzokuveza ukuthi uDeveli mleyimala. Lesi bekusikhathi esimasikizi emlandweni wokuphila kwabantu, ingasi isikhathi sokuthi uJesu azincanekele. USathana bekangathaba abhembese nangathana uJesu khewazikhohlwa endabeni yokuhlala aphapheme.
17 Isiphelo sephaseli sisemnyango, okutjho ukuthi siphila esikhathini esimaphorodlha. USathana ufuna sizincanekele ngokuthi sibe majadu ngepumelelo ephasineli. Ufuna sizikhohlwe ukuthi siphila emihleni yokuphela, sikhohlwe nangokuhlala siphapheme. Ungakuvumeli lokho kwenzeke kuwe! Kunalokho, ‘hlala ulindile.’ (Matewu 24:42) Ungathomi umkholwe uSathana nakakukhohlisa ngokuthi isiphelo sisesekude, namkha athi ayikho into enjalo yokuthi batjho kuzokuba nesiphelo.
(Matewu 16:24) UJesu wathi ebafundini bakhe: “Nanyana ngubani ofuna ukungilandela, akazidele athathe isigodo sakhe sokuhlunguphazwa angilandele qobe.
w06 4/1 23 ¶9
‘Khambani Niyokwenza Abafundi, Nibabhabhadise’
9 Isibonelo sakaJesu sokwenza intando kaZimu sihlanganisani? UJesu wathi ebafundini bakhe: “Nanyana ngubani ofuna ukungilandela, akazidele athathe isigodo sakhe sokuhlunguphazwa angilandele qobe.” (Matewu 16:24) Endabeni le, waveza izinto ezintathu okufuze sizenze. Kokuthoma, kufuze sizidele. Ngamanye amagama, asisazithabisi thina, silahla zoke izinto esizenza ngebanga lesono begodu sivumele ukunqotjhiswa nguZimu. Kwesibili, ‘sithatha isigodo sethu sokuhlunguphazwa.’ Emihleni kaJesu isigodo sokuhlunguphazwa besifanekisela ukuhlaziswa nokuhlunguphazwa. Njengombana simaKrestu sivumela ukutlhaga ngebanga leendaba ezimnandi. (2 Thimothi 1:8) Nanyana iphasi lingasiphatha kumbi, njengoKrestu ‘asinandaba nokuhlaziswa’ ngombana siyazi ukuthi sithabisa uZimu. (Hebheru 12:2) Kwesithathu, silandela uJesu “ngokungapheliko.”—IRhubo 73:26; 119:44; 145:2.
Rhubhulula Ngezinto ZakaZimu Eziligugu
(Matewu 16:18) Godu ngithi kuwe: Wena unguPitrosi, begodu edwaleneli ngizokwakha ibandla lami, amasango weThuna angeze alihlula.
nwtsty okuzokufundwa ngakho kuMat 16:18
Wena unguPitrosi, begodu edwaleneli: Ibizo lesiGirigi elithi peʹtros elithiywa umuntu wembaji litjho ‘idwala.’ Endabeni le lisetjenziswe njengebizo lamambala (Pitrosi), okulibizo lesiGirigi uJesu alithiya uSimoni. (Jwa 1:42) Nebizo elithi peʹtra eliqalisele ebantwini bengubo lingafanekisela ‘idwala.’ Ibizweli lesiGirigi liyafumaneka nemitlolweni le, Mat 7:24, 25; 27:60; Luk 6:48; 8:6; Rom 9:33; 1Ko 10:4; 1Pt 2:8. UPitrosi akhenge azibone alidwala uJesu azokwakha kilo ibandla lakhe, njengombana atlola ku-1Pitrosi 2:4-8 ukuthi nguJesu “olilitje lesisekelo,” begodu ukhethwe nguZimu. Ngokufanako, nompostoli uPowula waqalisela kuJesu ukuthi ‘usisekelo’ begodu ‘usisekelo esivela kuZimu.’ (1Ko 3:11; 10:4) UJesu usebenzise amagama ahlukahlukeneko: ‘Wena Pitrosi (okutjho “idwala”) ukghonile ukuhlukanisa ubuKrestu beqiniso, “edwaleneli,” uzokuba sisekelo sebandla lobuKrestu.’
ibandla: Ibizweli lithathelwe kwelesiGirigi elithi, ek·kle·siʹa. Livela emabizweni amabili wesiGirigi athi, ek, okutjho ukuthi “phuma,” nelithi ka·leʹo, okutjho ukuthi “biza.” Liqalisele esiqhemeni sabantu ababizelwe endaweni yinye ngomnqopho othileko. Endabeni le, uJesu wabikezela ngemininingwana yokwakhiwa kwebandla lobuKrestu, elakhiwa maKrestu akhethiweko, labo “njengamatje aphilako” ‘bakhiwe ngommoya kaZimu.’ (1Pt 2:4, 5) Ibizo lesiGirigeli liyasetjenziswa nemitlolweni yeSeptuagint, okumitlolo yesiHebheru elitjho ukuthi “ibandla” liqalisela esitjhabeni soke sabantu bakaZimu. (Dut 23:3; 31:30) Nayikhuluma ngama-Israyeli aphuma eGibhide incwadi ye-IzE 7:38 ithi ‘libandla.’ Ngokufanako, namaKrestu abizwa ‘bona aphume ebumnyameni’ ‘akhethwe kilo iphasi,’ akha “ibandla lakaZimu”—1Pt 2:9; Jwa 15:19; 1Ko 1:2.
(Matewu 16:19) Ngizokunikela iinlodlhelo zomBuso wezulu, begodu nanyana yini ongayibopha ephasini seyibotjhiwe nezulwini, nanyana yini ongayitjhaphulula ephasini seyitjhatjhululiwe nezulwini.”
nwtsty okuzokufundwa ngakho kuMat 16:19
iinlodlhelo zomBuso wezulu: EBhayibhelini abantu ebebanikelwa iinlodlhelo, ngokomfanekiso namkha kwamambala, bekubabantu abanelawulo. (1Kr 9:26, 27; Isa 22:20-22) Kungebangelo ibizo elithi ‘isilodlhelo’ lifanekisela ilawulo. UPitrosi wasebenzisa ‘isilodlhelo’ anikelwa sona bona avulele amaJuda (IzE 2:22-41), amaSamariya (IzE 8:14-17), nabantu bakosontjhaba (IzE 10:34-38) ithuba lokuthi bamukele ummoya ocwengileko ngomnqopho wokungena emBusweni kaZimu.
Ukufundwa KweBhayibheli
FEBHERBARI 26–MATJHI 4
AMAGUGU ASELIZWINI LAKAZIMU | MATEWU 18-19
“Tjheja Bona Ungaziwisi Namkha Uwise Abanye”
(Matewu 18:6, 7) Kodwana nanyana ngubani owisa omunye wabancanaba abakholelwa kimi, kuzokuba ngcono ngaye bona kubotjhelwe entanyenakhe ilitje lokusila elizombeleziswa ngudumbana, bese acwiliswe phakathi kwelwandle. 7 “Maye ngephasi ngebanga lezinto ezibangela ukuwa! Kuliqiniso bona izinto ezibangela ukuwa zizokuba khona nakanjani, kodwana maye kiloyo izinto ezibangela ukuwa eziza ngaye!
nwtsty okuzokufundwa ngakho kuMat 18:6, 7
ilitje lokusila elizombeleziswa ngudumbana: Ubukhulu balo belingaba mamitha ayi-1.2-1.5 ububanzi, belibudisi khulu kungebangelo belizombeleziswa ngudumbana.
izinto ezibangela ukuwa: Ihlathululo yebizo lesiGirigi elithi skanʹda·lon, litjho ‘izinto ezibangela ukuwa’ njengesithiyo; abanye bathi kungaba sigodo okubotjhelelwe kiso isithiyo. Lokhu kungaqalisela kunanyana ngiyiphi into engabangela ukuwa. Ngokomfanekiso, zingatjho isenzo namkha izinto ezingabangela umuntu bona akhambe endleleni engakalungi, akhubeke namkha awele esonweni. KuMat 18:8, 9, ibizo eliqalisele esenzweni elithi skan·da·liʹzo, litjhugululwe ngokuthi ‘ukona,’ lingatjhugululwa godu ngokuthi ‘ukukhubekisa; ukuwela esonweni.’
nwtsty okurekhodiweko
Ilitje lokusila
Amatje wokusila bewasetjenziselwa ukugaya ikoroyi namkha ukukhipha amafutha wama-oliva. Amanye bewamancani kuhle bona angasetjenziswa ngesandla, kodwana amanye bewamakhulu begodu bekufuze azombeleziswe ziinlwana. Ilitje elikhulu lokusila kungenzeka lilingana nalela amaFilista alinikela uSamsoni bona agaye ngalo ikoroyi. (Kho 16:21) Ilitje lokusila elizombeleziswa ziinlwana belingasetjenziswa kwa-Israyeli kwaphela, kodwana belijayelekile neRoma.
Ilitje Lokusila Elikhulu Nelincani
Ilitje lokusila elikhulu njengaleli elisesithombeni lizombeleziswa ziinlwana, njengodumbana, begodu lisetjenziselwa ukugaya ikoroyi namkha ama-oliva. Ilitje lokusila elingaphezulu lingaba mamitha ayi-1.5 ububanzi, begodu lizombeleziswa phezu kwamatje amakhulu.
(Matewu 18:8, 9) Ngalokho, nangabe isandla namkha inyawo lakho likwenza wone, likhuphe ulilahle. Kungcono ukungena ekuphileni unganasandla namkha ungananyawo kunokuthi uphoselwe ngemlilweni ongapheliko unezandla zombili namkha iinyawo zombili. 9 Godu, nangabe ilihlo lakho likwenza wone, likhuphe ulilahle. Kungcono ukungena ekuphileni unelihlo linye kunokobana uphoselwe ngemlilweni ovuthako weGehena unamehlo womabili.
nwtsty okuzokufundwa ngakho kuMat 18:9
Gehena: Ibizweli livela ebizweni lesiHebheru elithi geh hin·nomʹ, elitjho “umrhoba kaHinomu,” osesewula-tjhingalanga yeJerusalema lekadeni. Emihleni kaJesu, indawo le beyisetjenziselwa ukutjhisa iinzibi, kungebangelo ibizo elithi “Gehena” lifanekisela kuhle ukutjhatjalaliswa kwaphakade.
nwtstg Ihlathululo Yamabizo WeBhayibheli
Gehena
Libizo lesiGirigi loMrhoba kaHinomu, osesewula-tjhingalanga yeJerusalema lekadeni. (Jor 7:31) Ngokwesiphorofido kukhulunywa ngayo njengendawo lapho iindumbu zizokulahlelwa khona. (Jor 7:32; 19:6) Abukho ubufakazi bokuthi iinlwana namkha abantu bebaphoselwa eGehena bona batjhiswe namkha bahlunguphazwe basaphila. Nje-ke indawo le ngekhe yafanekisela indawo engabonakaliko lapho imiphefumulo yabantu ihlunguphazwa khona ngokungapheliko emlilweni wamambala. Kunalokho, iGehena yasetjenziswa nguJesu nabafundi bakhe ukufanekisela ukujeziswa kwaphakade ‘kokufa kwesibili’, okutjho ukutjhatjalaliswa kwaphakade.—sAm 20:14; Mat 5:22; 10:28.
(Matewu 18:10) Yelelani bona ningadeleli omunye wabancanaba, ngombana ngiyanitjela ukuthi iingilozi zabo ezulwini zihlala zibona ubuso bakaBaba osezulwini.
nwtsty okuzokufundwa ngakho kuMat 18:10
zibona ubuso bakaBaba osezulwini: Zinelungelo lokuvela phambi kwakaZimu, ngombana ziimbunjwa zommoya kwaphela ezingabona ubuso bakaZimu.—Eks 33:20.
Zisithinta Njani Iingilozi
UJesu waveza ukuthi iingilozi zinikelwe umsebenzi wokutlhogomela abantu ngezinto zakaZimu. Nanyana kunjalo, lokha uJesu nakayelelisa abalandeli bakhe ngendaba yokukhuba abanye wathi: “Yelelani bona ningadeleli omunye wabancanaba, ngombana ngiyanitjela ukuthi iingilozi zabo ezulwini zihlala zibona ubuso bakaBaba osezulwini.” (Matewu 18:10) Ngokutjho lokho, uJesu bekangatjho ukuthi omunye nomunye umuntu unengilozi emgadileko. Kodwana uJesu waveza ukuthi iingilozi ezisebenzelana eduze noZimu ziyawathanda amalunga webandla lobuKrestu.
Rhubhulula Ngezinto ZakaZimu Eziligugu
(Matewu 18:21, 22) Ngemva kwalokho uPitrosi weza kuJesu wathi: “Kosi, umfowethu kufuze angone kangaki ngisolo ngimlibalela? Kghani amahlandla alikhomba na?” 22 UJesu wathi: “Ngithi kuwe, ingasi amahlandla alikhomba, kodwana amahlandla ama-77.
nwtsty okuzokufundwa ngakho kuMat 18:22
amahlandla ama-77: Isitjhwesi sesiGirigi singahlathululwa ngokuthi “70 ophindwe kali-7” (okutjho iinkhathi ezima-490). Ibizweli elithi “amahlandla ama-77” liyafumaneka nemitlolweni yesiHebheru ye-Septuagint ku-Gen 4:24. Ngitjho nanyana lingahlathululwa njani, ukuphindwa kwenomboro le, bekutjho “okungapheliko” namkha “okunganasilinganiso.” Lokha uJesu nakabuyelela inomboro kaPitrosi u-7 amahlandla ama-77, bekafundisa abafundi bakhe bona bangazibekeli isilinganiso sokulibalela. Ngokuhlukileko, umthetho weBhabhiloni (Yoma 86b) uthi: “Nange umuntu akonele kanye, kabili namkha kathathu umlibalele, kodwana kwesine ungasamlibalela.”
(Matewu 19:7) Bathi kuye: “Alo-ke, kubayini uMosi ayale bona indoda inikele umkayo incwadi yokumqotha bese iyamtlhala?”
nwtsty okuzokufundwa ngakho kuMat 19:7
incwadi yokumqotha: Namkha “incwadi yokutlhala.” Ngokubawa indoda efuna ukutlhala bona ibe nencwadi yokutlhala esemthethweni nokuthi ithintane nabadala, umThetho bewumupha isikhathi sokobana acabangisise kuhle ngesiqunto afuna ukusithatha. Umnqopho womThetho lo bekukukhandela ukutlhala ngaphandle kwamabanga azwakalako begodu bewuvikela nabomma. (Dut 24:1) Emihleni kaJesu, abadosi phambili bekolo bakwenza kwabalula ukutlhala. Isazi mthetho sekadeni uJosephus, obekamFarisi otlhalileko wathi, ukutlhala kuvunyelwe “ngananyana ngiliphi ibanga (begodu kanengi amabanga lawo afunameka kibo baba).”
nwtsty okurekhodiweko
Incwadi Yokutlhala
Incwadi yokutlhala le, ngeyangomnyaka ka-71 namkha wango-72 ngesikhathi sabapostoli beyitlolwe ngesi-Arabhu. Yafunyanwa eTlhagwini yeWadi Murabbaat, emlanjeni i-Judean Desert. Itjengisa bona emnyakeni wesithandathu wokuvukela kwamaJuda, uJoseph, indodana kaNaqsan, watlhala uMiriam, oyindodakazi kaJonathan obekahlala edorobheni iMasada.
Ukufundwa KweBhayibheli