Iinkhombiso Zencwajana Ethi IPilo NomSebenzi WobuKrestu IHlelo LomHlangano WeBandla
MATJHI 5-11
AMAGUGU ASELIZWINI LAKAZIMU | MATEWU 20-21
“Nanyana Ngubani Ofuna Ukuba Mkhulu Phakathi Kwenu Kufuze Abe Sisebenzi Senu”
(Matewu 20:3) Waphuma godu pheze ngesimbi yethoba ekuseni, wabona abanye bajame etatawini lokuthengisela banganamsebenzi;
nwtsty okurekhodiweko
Etatawini Lokuthengisela
Amanye amatatawu wokuthengisela, njengaleli elivezwe la bewafumaneka magega nendlela. Abantu bebajayele ukubeka izinto abazithengisako endleleni, lokho bekwenza kube budisi ukukhamba. Abantu bebeza endaweni le bazokuthenga izinto ezijayelekileko zangendlini, izinto ezenziwe ngebumba, izinto zakanokutjho ezenziwe ngerhalasi nokudla. Abantu bebaya ngamalanga ematatawini wokuthengisela ngombana bebanganawo amafriji. Abantu abazokuthenga bebezwa iindaba ebantwini abalethe izinto ezithengiswako, namkha eemvakatjhini, abantwana bebadlalela endaweni le begodu abanye bebeza la bazokufuna umsebenzi. UJesu wakhe wapholisela abantu etatawini lokuthengisela noPowula bekatjhumayela khona. (IzE 17:17) Ngokuhlukileko, abatloli abazikhukhumezako nabaFarisi bebathanda ukubonwa babantu, nokulotjhiswa ematatawini wokuthengisela.
(Matewu 20:20, 21) Ngemva kwalokho, unina wamadodana kaZebediya weza kuye anamadodanakhe, waguqa azokubawa okuthileko kuye. 21 UJesu wathi kuye: “Ufunani?” Waphendula wathi: “Ngibawa ukhiphe ilizwi lokobana amadodanami amabili la ahlale nawe emBuswenakho, enye ngesidleni sakho enye ngesinceleni sakho.”
nwtsty okuzokufundwa ngakho kuMat 20:20, 21
unina wamadodana kaZebediya: Ngunina wabapostoli, uJakopo noJwanisi. Ngokulandisa kwakaMarkosi, uJakopo noJwanisi baziyela kuJesu. Bebazifunela isikhundla esiphezulu kodwana babawa unina uSalome bona abakhulumele, okungenzeka bekangukghari lakaJesu.—Mat 27:55, 56; Mar 15:40, 41; Jwa 19:25.
enye ngesidleni sakho enye ngesinceleni sakho: Endabeni le womabili amahlangothi ajamele ihlonipho nelawulo, kodwana ihlangothi elihlonitjhwa khulu ngelangesidleni.—IR 110:1; IzE 7:55, 56; Rom 8:34.
(Matewu 20:25-28) Kodwana uJesu wababizela kuye wathi: “Niyazi bona ababusi beentjhaba bakatelela ubukhosi babo phezu kwabantu, nabadosiphambili babo bayabalawula. 26 Akukafaneli kube njalo phakathi kwenu; kodwana nanyana ngubani ofuna ukuba mkhulu phakathi kwenu kufuze abe sisebenzi senu, 27 nanyana ngubani ofuna ukuba ngewokuthoma phakathi kwenu kufuze abe sisebenzi senu noke. 28 Njengombana neNdodana yomuntu ingakazeli ukwenzelwa, kodwana izele ukwenzela abanye nokunikela ngokuphila kwayo bona kube sihlengo sabanengi.”
nwtsty okuzokufundwa ngakho kuMat 20:26, 28
inceku: Namkha ‘isisebenzi.’ Kanengi iBhayibheli lisebenzisa ibizo lesiGirigi elithi di·aʹko·nos, ukuqalisela emuntwini osebenzela abanye ngokuzithoba. Ibizweli lisetjenziswa kuKrestu (Rom 15:8), iinceku namkha iinsebenzi zakaKrestu (1Ko 3:5-7; Kol 1:23), iinceku ezisizako (Flp 1:1; 1Tm 3:8), iinsebenzi zekhaya (Jwa 2:5, 9) neemphathimandla (Rom 13:4).
ayikazeli ukwenzelwa, kodwana izele ukwenzela: Namkha “ingasi ukusetjenzelwa, kodwana ukusebenzela.”
Rhubhulula Ngezinto ZakaZimu Eziligugu
(Matewu 21:9) Isiqubuthu ebesikhamba phambi kwakhe negade simlandela besisolo sirhuwelela sithi: “Siyakurabhela, sindisa iNdodana kaDavida! Ubusisiwe oza ngebizo lakaJehova! Siyakurabhela, msindise, wena osezulwini!”
nwtsty okuzokufundwa ngakho kuMat 21:9
Siyakurabhela, sindisa: Ibizo lesiGirigi elithi “Hosanna” lithathelwe ebizweni lesiHebheru elitjho ukuthi “siyarabhela, sindisa” namkha “sibawa usisindise.” Endabeni le kusetjenziswe ibizweli ukubawa isindiso kaZimu namkha ukuhlula; begodu litjho bona “sibawa usiphumelelise.” Ngokukhamba kwesikhathi lasetjenziselwa ukuthandaza nokudumisa. Ibizweli liyafumaneka kuRhubo 118:25, okuyingcenye yamaRhubo wokudumisa ebekavunywa ngesikhathi sePhasika. Yeke, umnyanya lo ngiwo owenza bona ibizweli lijayeleke khulu ebantwini. Enye indlela uZimu aphendula ngayo umthandazo lo, wavusa uJesu ekufeni. KuMat 21:42, uJesu ngokwakhe wadzubhula IR 118:22, 23 begodu lazaliseka kuMesiya.
INdodana kaDavida: Amezwi la atjengisa ukuthi isiqubuthu besilemuka bona uJesu uyikoro yesizukulwaneso begodu unguMesiya othenjisiweko.
(Matewu 21:18, 19) Kuthe nakabuyela eJerusalema ekuseni khulu, walamba. 19 Wabona umuthi wamafeyi hlanu kwendlela waya kiwo, kodwana akhenge afumane litho ngaphandle kwamakari, wathi kiwo: “Ungasatheli.” Umuthi wamafeyi watjhwaba khonokho.
Umuthi Wamafeyi Wasetjenziselwa Ukufundisa Isifundo Sokukholwa
Kubayini uJesu atjhwabisa umuthi wamafeyi? Uyahluthulula ependulwenakhe: “Ngiqinisile ngithi kini, nangabe niyakholwa begodu aninakuzaza, angekhe nenze kwaphela engikwenze emthini wamafeyi, kodwana ngitjho nanyana ningathi entabeni le, ‘Suka lapha uphoseke ngelwandle,’ kuzokwenzeka. Ngalokho zoke izinto enizibawa ngomthandazo, nanikholwako, nizozifumana.” (Matewu 21:21, 22) Wabuyelela amezwi awatjho ngaphambilini ukuthi nawunokukholwa okuqinileko ungatjhidisa intaba.—Matewu 17:20.
Ngokutjhwabisa umuthi wamafeyi, uJesu wafundisa isifundo esiqakathekileko sokuthi kufuze sikholelwe kuZimu. Wathi: “Zoke izinto enizithandazelako nenizibawako, yibani nekholo lokuthi senizamukele, nizozifumana.” (Markosi 11:24) Lesi sifundo esiqakathekileko kubalandeli bakaJesu! Khulukhulu ukulungiselela abapostoli ubujamo obubudisi abazokuqalana nabo. Begodu kunokuhlobana phakathi komuthi wamafeyi nokuba nokukholwa okuqinileko.
Njengomuthi wafeyi, isitjhaba sama-Israyeli besibonakala kwangathi siyamthanda uZimu. Abantu besitjhabesi beba nesivumelwano noZimu, begodu beba bonakala kwangathi bayawuhlonipha umThethwakhe. Nanyana kunjalo, isitjhabesi saveza ukuthi asinakho ukukholwa okuqinileko begodu asitheli iinthelo ezihle. Saphika neNdodana kaZimu! Ngokutjhwabisa umuthi wamafeyi ongatheliko, uJesu waveza ukuthi sizokuphetha ngani isitjhaba esingatheliko nesinganakho ukukholwa.
Ukufundwa KweBhayibheli
(Matewu 20:1-19) “UmBuso wezulu unjengomninimuzi owaphuma ekuseni ayokuqatjha iinsebenzi zesimakhe yamadiribe. 2 Ngemva kokuthi avumelene neensebenzi ukuthi uzozibhadela udenariyu ngelanga, wazithumela esiminakhe yamadiribe. 3 Waphuma godu pheze ngesimbi yethoba ekuseni, wabona abanye bajame etatawini lokuthengisela banganamsebenzi; 4 wathi kibo, ‘Nani khambani niye esiminami yamadiribe, ngizoninikela umrholo onifaneleko.’ 5 Batjhinga khona. Godu waphuma ngesimbi yetjhumi nambili ngamadina nangesimbi yesithathu ntambama wenza okufanako. 6 Ekugcineni, pheze ngesimbi yesihlanu ntambama, waphuma wafunyana abanye bajamile, wathi kibo, ‘Nijameleni lapha ilanga loke ningasebenzi?’ 7 Baphendula bathi, ‘Ngombana akekho osiqatjhileko.’ Wathi kibo, ‘Nani iyani esiminami yamadiribe.’ 8 “Kuthe nakuhlwako, umnikazi wesimu yamadiribe wathi enduneni, ‘Biza iinsebenzi uzibhadele umrholwazo, uthome ngezokugcina bese ugcina ngezokuthoma.’ 9 Kweza amadoda wangesimbi yesihlanu ntambama, ngayinye yafumana udenariyu. 10 Kwathi nakufika lawa wokuthoma, azitjela ukuthi wona azokurholelwa ukudlula amanye, kodwana nawo afumana udenariyu. 11 Nakawufumanako, athoma ukunghonghoyila kumninimuzi 12 athi, ‘Amadoda afike ekugcineni la asebenze i-iri linye tere; kodwana uwarholele njengathi esisebenze budisi khulu ilanga loke kutjhisa bhe!’ 13 Kodwana nakaphendula omunye wabo wathi, ‘Mngani, ayikho into embi engikwenza yona. Angithi mina nawe sivumelene ngodenariyu, kghani nginamala? 14 Thatha okungokwakho ukhambe. Ngifuna ukunikela lo wokugcina umrholo olingana newakho. 15 Kghani anginalungelo lokwenza engikufunako ngezinto zami? Namkha ilihlo lakho linomona ngombana mina ngilungile?’ 16 Ngokunjalo-ke, bokugcina bazokuba ngebokuthoma, nabokuthoma bazokuba ngebokugcina.” 17 Nakasendleleni akhuphukela eJerusalema, uJesu wabizela abafundi bakhe abali-12 ngeqadi wathi: 18 “Lalelani! Sikhuphukela eJerusalema, iNdodana yomuntu izokunikelwa ebaphristini abakhulu nebatlolini. Bazoyigwebela ukufa 19 bayinikele ebantwini beentjhaba ukuthi bahlekise ngayo, bayirithe, beyibulawelwe esigodweni; bese iyavuswa ngelanga lesithathu.”
MATJHI 12-18
AMAGUGU ASELIZWINI LAKAZIMU | MATEWU 22-23
“Lalela Imiyalo Emibili Emikhulu Kunayo Yoke”
(Matewu 22:36-38) “Mfundisi, ngimuphi umyalo omkhulu kunayo yoke emThethweni?” 37 Wathi kuye: “‘Kufuze uthande uJehova uZimakho ngehliziywakho yoke nangomphefumulwakho woke nangomkhumbulwakho woke.’ 38 Lo myalo omkhulu kunayo yoke begodu ngewokuthoma.
nwtsty okuzokufundwa ngakho kuMat 22:37
ihliziyo: Nakufanekiswako, ibizweli lisetjenziselwa ukuhlathulula umuntu onguye ngaphakathi. Nanyana kunjalo, nalihlanganiswa nelithi ‘umphefumulo’ nelithi ‘umkhumbulo’ lihlathulula kuhle amazizo womuntu neemfiso zakhe. Amabizo amathathu la (ihliziyo, umphefumulo, umkhumbulo) awakahlobani nakancani; kodwana asetjenziswe woke bona adlulisele umqondo wokuthi kufuze sithande uZimu ngokupheleleko.
umphefumulo: Namkha “umuntu.”
umkhumbulo: Likghono lokucabanga. Umuntu kufuze asebenzise umkhumbulwakhe bona azi uZimu begodu amthande. (Jwa 17:3; Rom 12:1) KuDut 6:5 okumtlolo wesiHebheru, kusetjenziswe amabizo amathathu ‘ihliziyo, umphefumulo namandla.’ Nanyana kunjalo, ngokulandisa kwakaMatewu emitlolweni yesiGirigi, kusetjenziswe ibizo elithi ‘umkhumbulo’ esikhundleni selithi ‘amandla.’ Kungenzeka kunamabanga athileko wokuthi kusetjenziswe amabizo ahlukileko. Kokuthoma, nanyana isiHebheru sekadeni besinganalo ibizo elinqophileko elihlathulula ‘umkhumbulo’ kanengi bekusetjenziswa elithi ‘ihliziyo’ esikhundleni salo. Ibizweli lisetjenziselwa ukufanekisela umuntu esinguye ngaphakathi, njengemicabango, amazizo, indlela esiziphatha ngayo nezinto esifuna ukuzenza. (Dut 29:4; IR 26:2; 64:6) Kungebangelo imitlolo yesiHebheru nayisebenzise ibizo elithi ‘ihliziyo,’ yesiGirigi kanengi isebenzisa elithi ‘umkhumbulo.’ (Gen 8:21; 17:17; IzA 2:10; Isa 14:13) Okhunye godu okungenza uMatewu asebenzise ibizo lesiGirigi elithi ‘umkhumbulo’ esikhundleni selithi ‘amandla’ nakadzubhula uDut 6:5, kukuthi ngesiHebheru ibizo elithi amandla lingatjho amandla womzimba namkha ikghono lokucabanga. Nanyana kunjalo, ukuvumelana kwamabizo wesiHebheru newesiGirigi kungasisiza sikghone ukuhlathulula bona kubayini abatloli bamaVangeli nabadzubhula uDuteronomi bangasebenzisi amezwi afanako.
(Matewu 22:39) Wesibili, ofana nawo ngilo: ‘Kufuze uthande umakhelwanakho njengombana uzithanda wena.’
nwtsty okuzokufundwa ngakho kuMat 22:39
Wesibili: Ipendulo kaJesu eya kumFarisi itlolwe kuMat 22:37, nakaphendulako wangezelela ngokudzubhula umyalo wesibili (Lev 19:18), ukufundisa ukuthi imiyalo emibili le ayihlukani begodu emiyalweni emibili le, kusekelwe woke umThetho nabaPhorofidi.—Mat 22:40.
umakhelwana: Ibizo elithi umakhelwana ngesiGirigi lingatjho nabantu abahlala kude nawe. Lingaqalisela kinanyana ngimuphi umuntu ohlangana naye.—Luk 10:29-37; Rom 13:8-10.
(Matewu 22:40) Emiyalweni emibili le, kusekelwe woke umThetho nabaPhorofidi.”
nwtsty okuzokufundwa ngakho kuMat 22:40
umThetho nabaPhorofidi: “UmThetho” uqalisele eencwadini zeBhayibheli ukusuka kuGenesisi ukuya kuDuteronomi. ‘AbaPhorofidi’ baqalisele eencwadini zeemphorofido zemiTlolo yesiHebheru. Nanyana kunjalo, amabizo la nawahlanganiswa womabili aqalisela kiyo yoke imiTlolo yesiHebheru.—Mat 7:12; 22:40; Luk 16:16.
kusekelwe: Isenzo esithi “kusekelwe” ngesiGirigi singasetjenziselwa ukufanekisa ‘ukudzimelela.’ UJesu watjengisa bona yoke imiTlolo yesiHebheru isekelwe ethandweni ingasi imiThetho eliTjhumi kwaphela.—Rom 13:9.
Rhubhulula Ngezinto ZakaZimu Eziligugu
(Matewu 22:21) Bathi: “NgewakaKhesari.” Wathi kibo: “Nje-ke, buyiselani izinto zakaKhesari kuKhesari, kodwana izinto zakaZimu, kuZimu.”
nwtsty okuzokufundwa ngakho kuMat 22:21
Izinto zakaKhesari kuKhesari: Ipendulo kaJesu le iyafumaneka kuMar 12:17 nakuLuk 20:25, begodu kusemaVangelini la kwaphela lapho uJesu akhuluma khona ngombuso wamaRoma. “Izinto zakaKhesari” zihlanganisa ukubhadela imisebenzi esiyenzelwa ngurhulumende, ukuhlonipha nokuthobela iimphathimandla.—Rom 13:1-7.
Izinto zakaZimu, kuZimu: Zihlanganisa indlela umuntu aphila ngayo, ukulotjha uZimu ngehliziyo yoke, ngomphefumulo woke, nokumlalela ngokupheleleko.—Mat 4:10; 22:37, 38; IzE 5:29; Rom 14:8.
(Matewu 23:24) Barholi abaziimphofu, nikhupha unompopoloza eenselweni zenu kodwana nigomojela ikamela!
nwtsty okuzokufundwa ngakho kuMat 23:24
Bobani abakhipha abonompopoloza eenselweni kodwana bagomojele ikamela: Unompopoloza nekamela bezihlangana neenlwana ezisilapheleko kwa-Israyeli. (Lev 11:4, 21-24) UJesu bekatshima abadosiphambili bekolo nakathi bakhupha unompopoloza eenselweni zabo bona bangasilaphali, ngombana bebeqa imiThetho eqakathekileko, okusisenzo esifana nokugomojela ikamela.
Ukufundwa KweBhayibheli
(Matewu 22:1-22) Godu uJesu wakhuluma nabo asebenzisa imifanekiso, athi: 2 “UmBuso wezulu ungafaniswa nekosi eyenzela indodanayo umnyanya womtjhado. 3 Yathumela iinsebenzi zayo bona zibize labo abamenywe emtjhadweni, kodwana babhala ukuza. 4 Yathumela ezinye iinsebenzi zayo, yathi, ‘Tjelani labo abamenyiweko nithi: “Ukudla sekulungile, iinkunzi neenlwana zami ezinonisiweko sezihlatjiwe, koke sekulungile. Yenize emnyanyeni.”’ 5 Kodwana akhenge bazithathele ehloko, bazikhambela, omunye waziyela esiminakhe, omunye erhwebeni lakhe; 6 abanye babopha iinsebenzi zayo, baziphatha kumbi bebazibulala. 7 “Ikosi yasilingeka yathumela amabuthwayo ukuthi abulale ababulalabo, atjhise nedorobho labo. 8 Yathi eensebenzini zayo, ‘Umnyanya womtjhado sewulungile, kodwana egade bamenyiwe bebangafaneleki. 9 Yeke, khambani niye eendleleni ezikulu zedorobho, nimeme nanyana ngubani enimfumanako bona eze emtjhadweni.’ 10 Iinsebenzezo zaya eendleleni zabuthelela boke abantu ezibafumanako, abalungileko nabangakalungi; ikumba ebekubanjelwe kiyo umnyanya womtjhado yazala swi iimvakatjhi. 11 “Ikosi nayifikako izokuhlola iimvakatjhi, yabona indoda engakambathi isambatho somtjhado. 12 Yathi kiyo, ‘Mfo, ungene njani la ungakambathi isambatho somtjhado?’ Yabhalelwa kuphendula. 13 Ikosi yathi eensebenzini zayo, ‘Ibopheni izandla neenyawo niyiphosele ngaphandle ebumnyameni. Lapho ukulila nokuqinisa amazinywayo kuzoba khona.’ 14 “Ngombana banengi abamenyiweko, kodwana bambalwa abakhethiweko.” 15 AbaFarisi bakhamba bayokuluka amano wokumbamba emkhulumwenakhe. 16 Yeke bathumela abafundi babo kuye kunye nabalandeli behlangano kaHerode, bathi: “Mfundisi, siyazi bona uneqiniso begodu ufundisa indlela kaZimu ngeqiniso, awunandaba ukuthi abantu bathini, ngombana awuqali ukubumbeka kwangaphandle ebantwini. 17 Akhusitjele ukuthi ucabangani, kulungile na ukubhadela umthelo kuKhesari namkha awa?” 18 UJesu azi ukukhohlakala kwabo, wathi: “Ningilingelani nina bazenzisi? 19 Ngitjengisani imali yomthelo.” Bamnikela udenariyu. 20 Wathi kibo: “Ngewakabani umfanekiso nomtlolo lo?” 21 Bathi: “NgewakaKhesari.” Wathi kibo: “Nje-ke, buyiselani izinto zakaKhesari kuKhesari, kodwana izinto zakaZimu, kuZimu.” 22 Nabezwa lokho, barareka, bamtjhiya lapho bakhamba.
MATJHI 19-25
AMAGUGU ASELIZWINI LAKAZIMU | MATEWU 24
“Qinisa Ubuhlobo Bakho NoZimu Emihleni Yokuphela”
(Matewu 24:12) ngebanga lokwanda kokungabi namthetho, ithando labanengi lizokuphola.
it-2 279 ¶6
Ithando
Ithando labanengi lizokuphola. UJesu Krestu nakatjela abafundi bakhe ngezinto ezizokwenzeka wathi ithando labanengi abazitjela ukuthi bakholelwa kuZimu lizokuphola. (Mat 24:3, 12) Umpostoli uPowula wathi, njengombana imihla yokuphela ibandamela abantu abanengi ‘bazokuthanda imali.’ (2Tm 3:1, 2) Yeke, lokhu kubufakazi bokuthi umuntu angalahlekelwa mbono olungileko begodu ithando egade analo ngaphambili lingaphola. Lokhu kugandelela ukuqakatheka kokuhlala sinethando begodu singalithuthukisa ngokuzindla nokuphila ngokuvumelana nalokho okutjhiwo liliZwi lakaZimu.—Efe 4:15, 22-24.
(Matewu 24:39) akhenge batjheje bekwafika uMthwalela wabarhurhula boke, kuzokuba njalo nokuba khona kweNdodana yomuntu.
w99 11/15 19 ¶5
Kghani Usifeza Soke Isibopho Sakho KuZimu
5 UJesu Krestu wathi ngemihla yethu: “Yeke njengombana beyinjalo imihla kaNowa, kuzokuba njalo nokuba khona kweNdodana yomuntu. Njengombana bekunjalo ngemihla yangaphambi koMthwalela, abantu bebadla basela, amadoda athatha nabafazi bendiswa, bekwaba lilanga uNowa angena ngalo ngemkhunjini, akhenge batjheje bekwafika uMthwalela wabarhurhula boke, kuzokuba njalo nokuba khona kweNdodana yomuntu.” (Matewu 24:37-39) Akusikumbi ukutjhada, ukudla nokusela ngokulinganisela, ngombana umtjhado wasungulwa nguZimu. (Genesisi 2:20-24) Nange silemuka ukuthi izinto zokuphila seziza qangi ekuphileni kwethu, kubayini singathandazi ngendaba le? UJehova angasisiza bona siragele phambili sibeka uMbuswakhe qangi, senze okulungileko, begodu sizalise nesifungo sethu.—Matewu 6:33; Roma 12:12; 2 Korinte 13:7.
(Matewu 24:44) Ngebanga lalokho, nani kufuze nizibonakalise nikulungele, ngombana iNdodana yomuntu izokufika nge-iri eningalicabangiko.
Abapostoli Babawa Isibonakaliso
Wathi abafundi bakhe kufuze bahlale balindile begodu bakulungele. UJesu wagandelela isiyeleliswesi ngokutjho umfanekiso lo: “Kodwana yazini into yinye: Ngathana umninimuzi bekasazi isikhathi sobusuku isela elizokufika ngaso, bekazokuhlala aphapheme begodu bekangekhe avumela bona umuzakhe ugqekezwe. Ngebanga lalokho, nani kufuze nizibonakalise nikulungele, ngombana iNdodana yomuntu izokufika nge-iri eningalicabangiko.”—Matewu 24:43, 44.
Rhubhulula Ngezinto ZakaZimu Eziligugu
(Matewu 24:8) Zoke izintwezi zikuthoma kwemirhelo yokugandeleleka.
nwtsty okuzokufundwa ngakho kuMat 24:8
imirhelo yokugandeleleka: NgesiGirigi ibizweli liqalisela ebuhlungwini obukhulu bokubeletha. Ngokuvamileko ibizo elisetjenziswa la litjho ukugandeleleka, nokuzwa ubuhlungu, imiraro eyabikezelwako ingafaniswa neenhlungu zokubeletha begodu izinto ezimbi zizokwanda ngezinga elikhulu, zizokuragela phambili zenzeka bekube sikhathi esithileko ngaphambi kobana kuthome isizi elikhulu ekukhulunywe ngalo kuMat 24:21.
(Matewu 24:20) Hlalani nithandaza bona ukubaleka kwenu kungenzeki ebusika namkha ngelanga leSabatha;
nwtsty okuzokufundwa ngakho kuMat 24:20
ebusika: Izulu elikhulu, iinkhukhula, namakhaza ngesikhathi sebusika kungenza kube budisi ukukhamba nokufumana ukudla nendawo yokufihla ihloko.—Ezra 10:9, 13.
ngelanga leSabatha: Iindawo ezifana nakwaJuda bezinomthetho oqinileko ngendaba yeSabatha, lokho bekwenza kube budisi ngomuntu ukuthi akhambe ibanga elide, ukuthwala imithwalo; namasango wakhona bekahlala avaliwe ngelanga leSabatha.—Qala IzE 1:12.
Ukufundwa KweBhayibheli
(Matewu 24:1-22) Kuthe uJesu nakaphuma ngethempelini, abafundi bakhe beza kuye bona bamtjengise imakhiwo yethempeli. 2 Wathi kibo: “Niyazibona na zoke izintwezi? Ngiqinisile ngithi kini, akunalitje elizokutjhiywa phezu kwelinye lingagirizelwa phasi.” 3 Asahlezi eNtabeni yama-Oliva, abafundi beza kuye ngemsitheleni, bathi: “Sitjela bona izintwezi zizokwenzeka nini, nokuthi sizokuba yini isibonakaliso sokuba khona kwakho nesokuphela kwephasi?” 4 UJesu wabaphendula wathi: “Yelelani bona kungabi nomuntu onidurhisako, 5 ngombana banengi abazokuza ngebizo lami, bathi, ‘NginguKrestu,’ begodu bazokudurhisa abanengi. 6 Nizokuzwa ngezipi nemibiko yezipi. Kodwana kunganithusi lokho, ngombana izintwezi kufuze zenzeke, kodwana ukuphela kuzabe kungakafiki. 7 “Ngombana isitjhaba sizokulwa nesitjhaba, umbuso ulwe nombuso, kuzokuba nokutlhayela kokudla nokusikinyeka kwephasi eendaweni ngeendawo. 8 Zoke izintwezi zikuthoma kwemirhelo yokugandeleleka. 9 “Ngemva kwalokho abantu bazonihlunguphaza bebanibulale, nizokuzondwa ziintjhaba zoke ngebanga lebizo lami. 10 Abanengi bazokuwa ekukholweni begodu bazokuthengisana, bahloyane. 11 Kuzokuvela abaphorofidi bamanga abanengi, bakhohlise abanengi; 12 ngebanga lokwanda kokungabi namthetho, ithando labanengi lizokuphola. 13 Kodwana loyo okghodlhelele bekwaba sekupheleni uzokusindiswa. 14 Nje-ke iindaba ezimnandezi zomBuso zizokutjhunyayelwa kilo loke iphasi bona kube bufakazi kizo zoke iintjhaba, ngemva kwalokho isiphelo sizokufika. 15 “Ngalokho, nanibona into enyenyisako ebangela ukutjhabalala, ijame endaweni ecwengileko njengombana umphorofidi uDanyela akhuluma ngayo, (ofundako akalemuke), 16 abaseJudiya ababalekele eentabeni. 17 Umuntu ophezu kwendlu angahliki ayokuthatha ipahla engendlinakhe, 18 umuntu osesimini angabuyeli emva ayokuthatha isambatho sakhe sangaphandle. 19 Maye ebafazini abasidisi nabamunyisako ngesikhatheso! 20 Hlalani nithandaza bona ukubaleka kwenu kungenzeki ebusika namkha ngelanga leSabatha; 21 ngombana ngesikhatheso kuzokuba nesizi elikhulu elingakhenge khelibe khona soloko kwathoma iphasi bekube gadesi, nelingekhe lisaba khona godu. 22 Eqinisweni, ngathana amalanga lawo azange arhunyezwe, akunamuntu obekangasindiswa; kodwana ngebanga labakhethiweko amalanga lawo azokurhunyezwa.
MATJHI 26–APRELI 1
AMAGUGU ASELIZWINI LAKAZIMU | MATEWU 25
“Hlalani Nilindile”
(Matewu 25:1-6) “UmBuso wezulu ungafaniswa neentombi ezilitjhumi ezathatha iimbani zazo zayokuhlangabeza umkhwenyana. 2 Ezihlanu zazo beziziindlhadlha, ezihlanu zazo bezihlakaniphile. 3 Eziziindlhadlha zathatha iimbani zazo kodwana khenge zithathe namafutha, 4 kwathi ezihlakaniphileko zaphatha amafutha ngamabhodlelo neembani zazo. 5 Umkhwenyana wariyada, zoke zayenda zalala. 6 Phakathi nobusuku kwazwakala itjhada: ‘Nang’ umkhwenyana! Phumani niyomhlangabeza.’
(Matewu 25:7-10) Yeke zoke iintombezo zavuka zalungisa iimbani zazo. 8 Eziziindlhadlha zathi kezihlakaniphileko, ‘Akhe nisiphungulele amafuthenu, ngombana iimbani zethu sezizokucima.’ 9 Ezihlakaniphileko zaphendula zathi: ‘Mhlamunye nathi azasitlhayelela nasingawabelana nani. Khambani niye kilabo abawathengisako, niyozithengela.’ 10 Nazisayowathenga, umkhwenyana wafika. Iintombi ebesele zilungile zangena naye emnyanyeni womtjhado, kwavalwa umnyango.
(Matewu 25:11, 12) Ngemva kwesikhathi, iintombi ezikhambilekweza zafika, zathi, ‘Kosi, Kosi, sivulela!’ 12 Wathi kizo, ‘Ngiqinisile ngithi kini, anginazi.’
Rhubhulula Ngezinto ZakaZimu Eziligugu
(Matewu 25:31-33) “INdodana yomuntu nayiza ngephazimulwayo, ikunye nazo zoke iingilozi, izokuhlala esihlalweni sayo sobukhosi esiphazimulako. 32 Zoke iintjhaba zizokubuthelwa phambi kwayo, izokuhlukanisa abantu babe ziinqhema ezimbili, njengomelusi nakahlukanisa izimvu neembuzi. 33 Izokubeka izimvu ngesidleni sayo, iimbuzi ngesinceleni sayo.
Thembeka Ekusekeleni Abafowabo BakaKrestu
7 Namhlanjesi, siwuzwisisa kuhle umfanekiso wezimvu neembuzi. Siyazi ukuthi “iNdodana yomuntu” namkha “iKosi,” nguJesu nokuthi ‘abafowabo’ beKosi ngilabo abakhethwe ngomoya ocwengileko abayokubusa noJesu ezulwini. (Roma 8:16,17) “Izimvu neembuzi” babantu abavela kizo zoke izizwe. Abantwaba bazokugwetjwa isizi eliKhulu nalilalamela ngekupheleni, okuyinto ezokwenzeka kungasikade. Siyazi nokuthi uJesu uzokugweba abantu ngokwendlela ebeba phatha ngayo abakhethiweko abasesesephasini. Siyathokoza ngokuthi uJehova bekasolo asisiza njengombana iminyaka ikhamba bona sizwisise umfanekiso lo neminye ekuMatewu izahluko 24 no-25!
(Matewu 25:40) IKosi izokuthi kibo, ‘Ngiqinisile ngithi kini, ngokwezinga enikwenze ngalo komunye wabancani kubafowethwaba, nikwenzile nakimi.’
w09 10/15 16 ¶16-18
“Nibangani Bami”
16 Nange ufisa ukuphila ephasini ngaphasi komBuso kaZimu, ungatjengisa njani ubungani kubafowabo bakaKrestu? Akhesikhulume ngeendlela ezintathu. Kokuthoma, singakwenza ngokuthi sihlanganyele ngehliziyo yoke emsebenzini wokutjhumayela. UKrestu wayala abafowabo bona batjhumayele ngeendaba ezimnandi zomBuso ephasini loke. (Mat 24:14) Nanyana kunjalo, abafowabo bakaKrestu abasesesephasini kungaba budisi kibo ukwenza umsebenzi lo ngaphandle kokusizwa ngezinye izimvu. Soke isikhathi amalunga wezinye izimvu nakatjhumayelako, asiza abafowabo bakaKrestu ukuthi bafeze isibopho sabo. Inceku ethembekileko nehlakaniphileko noKrestu balithokoza kwamambala isekelo abalifumanako.
17 Kwesibili, amalunga wezinye izimvu angatjengisa ukuthi asiza abafowabo bakaKrestu ngokusekela umsebenzi wokutjhumayela ngeemali. UJesu wakhuthaza abalandeli bakhe ukuthi bazenzele abangani “ngobugwili obungakalungi.” (Luk. 16:9) Lokho akutjho bona ubungani noJehova noJesu buyathengwa. Kunalokho, nasisebenzisa izinto zethu ukusekela umsebenzi kaZimu, sitjengisa ukuthi siyamthanda ingasi ngamezwi kwaphela kodwana ‘ngezenzo nangeqiniso.’ (1 Jwa. 3:16-18) Sisekela ngokuhlanganyela emsebenzini wokutjhumayela, ngokunikela bona kwakhiwe bekulungiswe neendawo esilotjhela kizo uZimu, nangokunikela bona kuthuthukiswe umsebenzi wokutjhumayela owenziwa ephasini loke. Kungakhathaliseki ukuthi sinikela ngokuncani namkha ngokunengi, uJehova noJesu bayawuthabela umnikelo esiwenza sithabile.—2 Kor. 9:7.
18 Kwesithathu, soke singatjengisa ukuthi siyabasekela abafowabo bakaKrestu ngokuthi silalele isinqophiso esisinikelwa badala bebandla. Amadoda la akhethwe mmoya ocwengileko ngaphasi kwesinqophiso sakaKrestu. (Efe. 5:23) Umpostoli uPowula watlola ukuthi, “Lalelani labo abadosa phambili hlangana nani begodu nizithobe.” (Heb. 13:17) Ngezinye iinkhathi kungaba budisi bona silalele iinqophiso ezivela eBhayibhelini nasizinikelwa badala bebandla. Ukwazi iimphoso zabo ngikho okwenza kubebudisi ukubalalela. Nanyana kunjalo, uKrestu oyihloko yebandla, uyakuthabela ukubasebenzisa banemitjhapho njalo. Ngalokho, indlela esibahlonipha ngayo itjengisa ukuthi bunjani ubuhlobo bethu noKrestu. Nange singaqali imitjhapho abayenzako kodwana silalele iinqophiso abasinikela zona, sizabe sitjengisa ukuthi siyamthanda uKrestu.
Ukufundwa KweBhayibheli
(Matewu 25:1-23) “UmBuso wezulu ungafaniswa neentombi ezilitjhumi ezathatha iimbani zazo zayokuhlangabeza umkhwenyana. 2 Ezihlanu zazo beziziindlhadlha, ezihlanu zazo bezihlakaniphile. 3 Eziziindlhadlha zathatha iimbani zazo kodwana khenge zithathe namafutha, 4 kwathi ezihlakaniphileko zaphatha amafutha ngamabhodlelo neembani zazo. 5 Umkhwenyana wariyada, zoke zayenda zalala. 6 Phakathi nobusuku kwazwakala itjhada: ‘Nang’ umkhwenyana! Phumani niyomhlangabeza.’ 7 Yeke zoke iintombezo zavuka zalungisa iimbani zazo. 8 Eziziindlhadlha zathi kezihlakaniphileko, ‘Akhe nisiphungulele amafuthenu, ngombana iimbani zethu sezizokucima.’ 9 Ezihlakaniphileko zaphendula zathi: ‘Mhlamunye nathi azasitlhayelela nasingawabelana nani. Khambani niye kilabo abawathengisako, niyozithengela.’ 10 Nazisayowathenga, umkhwenyana wafika. Iintombi ebesele zilungile zangena naye emnyanyeni womtjhado, kwavalwa umnyango. 11 Ngemva kwesikhathi, iintombi ezikhambilekweza zafika, zathi, ‘Kosi, Kosi, sivulela!’ 12 Wathi kizo, ‘Ngiqinisile ngithi kini, anginazi.’ 13 “Ngalokho hlalani nilindile, ngombana anilazi ilanga ne-iri. 14 “Godu kunjengendoda ezokuthatha ikhambo lokuya endaweni ekude eyabiza iinsebenzi zayo yaziphathisa koke okungokwayo. 15 Yanikela esinye amatalende amahlanu, esinye amabili, esinye yasinikela linye, ngasinye ngokwamakghonwaso, bese yakhamba. 16 Msinyana isisebenzi esafumana amatalende amahlanu sakhamba sayokurhweba ngawo sazuza amanye amahlanu. 17 Nesisebenzi esafumana amabili senza okufanako sazuza amanye amabili. 18 Kodwana isisebenzi esifumene italende linye sakhamba sayokwemba umgodi safihla imali yekosaso lapho. 19 “Ngemva kwesikhathi eside, ikosi yeensebenzezo yafika izokuhlola ukuthi zenzeni ngemalayo. 20 Isisebenzi esinikelwe amatalende amahlanu seza ngaphambili saletha namatalende amahlanu esiwazuzileko, sathi, ‘Kosi, unginikele amatalende amahlanu; qala, ngizuze amanye amahlanu.’ 21 Ikosaso yathi kiso: ‘Wenze kuhle, sisebenzi esilungileko nesithembekileko! Uthembekile kokuncani. Ngizokubeka bona utlhogomele nokunengi. Thaba nekosakho.’ 22 Ngokulandelako isisebenzi esanikelwa amatalende amabili seza ngaphambili sathi, ‘Kosi, unginikele amatalende amabili; qala, ngizuze amanye amabili.’ 23 Ikosaso yathi kiso: ‘Wenze kuhle, sisebenzi esilungileko nesithembekileko! Uthembekile kokuncani. Ngizokubeka bona utlhogomele nokunengi. Thaba nekosakho.’