ISIFUNDO 02

IBhayibheli Lisinikela Ithemba

Egadangisiweko

Ephasini mazombe abantu baqalene nemiraro eminengi ebenza badane, bagandeleleke bebezwe nobuhlungu. Kghani nawe khewaqalana nobujamo ekhebakwenza wazizwa ngendlela le? Kungenzeka uzwa ubuhlungu ngebanga lokugula namkha lokuhlongakalelwa mumuntu omthandako. Kungenzeka uyazibuza: ‘Kghani ukuphila kuzakhe kube ngcono?’ IBhayibheli liyawuphendula umbuzo lo.

1. IBhayibheli lisinikela njani ithemba?

IBhayibheli alisihlathululeli kwaphela ukuthi kubayini iphasi lizele imiraro kangaka kodwana lisinikela neendaba ezimnandi zokuthi esikhathini esingaphelisi ihliziyo, izokusombululeka yoke imiraro esinayo. Iinthembiso zeBhayibheli zingasinikela “ingomuso nethemba.” (Funda uJoromiya 29:11, 12.) Iinthembiswezo zisisiza sikghodlhlelelele imirarwethu, sihlale sithabile, sibe nombono omuhle besiqale phambili esikhathini esithabisako esizako.

2. IBhayibheli likhuluma ngengomuso elinjani?

IBhayibheli likhuluma ngengomuso nalithi, “ukufa angekhe kusaba khona, namkha isizi namkha ukulila namkha ubuhlungu angekhe kusaba khona.” (Funda IsAmbulo 21:4.) Imiraro eyenza abantu baphelelwe lithemba namhlanjesi njengokutlhaga, ukungabi nabulungiswa, ukugula nokufa angekhe isaba khona. IBhayibheli lithembisa ukuthi abantu bazokuthabela ukuphila okungapheliko ePharadesi ephasinapha.

3. Ungaqiniseka njani ukuthi iinthembiso eziseBhayibhelini zizokuzaliseka?

Inengi labantu lifisa izinto ezihle kodwana alithembi ukuthi iimfiswezo zizokuzaliseka. Okuthenjiswa liBhayibheli kuhluke khulu kilokho. Nasizakuthemba lokho okutjhiwo liBhayibheli, kufuze sihlolisise “imiTlolo qobe langa.” (IzEnzo 17:11) Njengombana uragela phambili ufunda iBhayibheli, uzokghona ukuziquntela bona uyakukholelwa lokho elikutjhoko ngengomuso namkha awa.

FUNDA NGOKUNGENELELEKO

Hlolisisa ezinye iinthembiso iBhayibheli elikhuluma ngazo ngengomuso. Zibonele ukuthi amathemba aseBhayibhelini abasiza njani abanye namhlanjesi.

Isithombe: Izenzakalo ezitjengisa ubujamo abantu abaqalana nabo namhlanjesi nalobo iBhayibheli elithembisa ukuthi buzokuba khona esikhathi esizako. Izenzakalwezi zibuyelelwe ngaphasi.

4. IBhayibheli lisithembisa ukuthi sizokuphila ngokungapheliko ngaphandle kwemiraro

Qala iinthembiso ezilandelako ezifumaneka eBhayibhelini. Ngiziphi ezithinta khulu ihliziywakho? Kubayini?

Funda imitlolo edzujulwe hlanu kwesithembiso ngasinye bese ucabanga ngemibuzo nasi:

Kghani imitlolo le ayikwenzi ube nethemba? Kghani abangani bakho nomndenakho bangalifumana ithemba kiyo?

Akhuzicabange uphila ephasini la

KUNGANAMUNTU . . .	WOKE UMUNTU UZOKUTHABELA . . .
ozokuzwa ubuhlungu, ozokuluphala, namkha afe.—Isaya 25:8.	ukubona abantu abathandako abahlongakalako bavuselwa ephasini—Jwanisi 5:28, 29.
ozokugula namkha arholophale.—Isaya 33:24; 35:5, 6.	ukuba nepilwehle namandla wobutjha.—Jobho 33:25.
ozokuqalana nokungabi nabulungiswa.—Isaya 32:16, 17.	ukuba nokudla okwaneleko, indawo nomsebenzi owanelisako.—IRhubo 72:16; Isaya 65:21, 22.
ozokutlhaga ngebanga lepi.—IRhubo 46:9.	ukuba nokuthula.—IRhubo 37:11.
ozokutshwenywa mikhumbulo emimbi namkha ebuhlungu.—Isaya 65:17.	ukuphila okungapheliko ngaphasi kobujamo obuhle ephasini.—IRhubo 37:29.

Umsanyana obekagula sele apholile begodu usingatha unina.

Indoda ebeyiluphele, nje sele iyitjha begodu itjhova ingolovane ezele imifino.

5. Amathemba esiwafumana eBhayibhelini angenza umehluko emaphilwenethu

Abantu abanengi kuyabadanisa bekubasilinga khulu ukubona imiraro esibhodileko namhlanjesi. Abanye balinga ngamandlabo woke ukuthi benze izinto zibe ngcono. Akhubone ukuthi isithembiso esiseBhayibheli esikhuluma ngokuthi ukuphila kuzokuba ngcono, siwatjhugulule njani amaphilo wabanye. Dlala IVIDIYO, bese nicoca ngemibuzo elandelako.

IVIDIYO: Bengifuna Ukulwisana Nokungabi Nobulungiswa (4:07)

Isithombe: Iingcenye zevidiyo ethi, ‘Bengifuna Ukulwa Nokungabi Nabulungiswa.’ 1. URafika bekavuna ikoteni nabantu behlanga lakhe ngesikhathi asesemntazana. 2. URafika uthabile njengombana abona abantu abahlukahlukeneko bazwana begodu banobunye ngesikhathi asemhlanganweni waboFakazi bakaJehova kokuthoma.

Evidiyweni le, ngikuphi ukungabi nabulungiswa uRafika aqalana nakho?
Nanyana ukungabi nabulungiswa kungakhenge kuphele, iBhayibheli lamsiza njani?

Ithemba esilifumana eBhayibhelini ngengomuso, lingasisiza bona siqalane nokudana kuhlanganise nemiraro ngendlela ephumeleleko. Funda IzAga 17:22 neyebeRoma 12:12, bese nicoca ngemibuzo elandelako:

Kghani lokho okukhulunywa liBhayibheli malungana nengomuso kungenza umahluko epilwenakho nje? Kubayini ucabanga njalo?

ABANYE ABANTU BATHI: “Lokho okutjhiwo liBhayibheli ngengomuso angeze kwenzeka.”

Kubayini kuqakathekile ukuthi uzifunele ubufakazi wena ngokwakho?

ISIRHUNYEZO

IBhayibheli lineenthembiso ezihle khulu ngengomuso begodu lokho kusenza sikuthabele ukuphila nje nesikhathini esizako.

Buyekeza

Kubayini abantu batlhoga ithemba?
Lithini iBhayibheli ngengomuso?
Ukuba nethemba ngengomuso kungakusiza njani?

Ilanga okuqedwe ngalo isifundwesi:

Uzimisele ukwenzani?

Jayelana neenthembiso eziseBhayibhelini ngokufunda amavesi ekukhulunywe ngawo esifundwenesi.

Okhunye ongakutlola:

Your other goal

HLOLA OKUNGENZASI

Funda okwengeziweko ngamandla wokuba nethemba.

“Ithemba—Ungalifumanaphi?” (Awake!, April 22, 2004)

Fumana ukuthi ukuba nethemba ngengomuso kungabasiza njani labo abanokugula okungalaphekiko.

“Ukuphila nokugula Okungalaphekiko—Kghani IBhayibheli Lingasisiza?” (Isihloko esiku-jw.org)

Nawubukela ividiyo yombhino le, akhuzicabange unomndenakho nithabela ukuphila ePharadesi elithenjiswe liBhayibheli.

Akhucabange (3:37)

Funda ngokuthi ukuphila kwakasohlalakuhle kwatjhuguluka njani ngemva kokufunda ngethemba eliseBhayibhelini.

“Angisanamuzwa Wokuthi Kufuze Ngitjhugulule Iphasi” (IsiThala, Julayi 1, 2013)