UKWENZA ABAFUNDI
ISIFUNDO 10
Zimisele Ukusiza Abantu Babe Bafundi
Ikambisolawulo: “Sazimisela ukungadluliseli kini iindaba ezimnandi zakaZimu kwaphela kodwana nokunikela ukuphila kwethu bona sinisize ngombana sanithanda khulu.”—1 Thes. 2:8.
Lokho UJesu Akwenzako
1. Bukela IVIDIYO, namkha ufunde uJwanisi 3:1, 2. Ngemva kwalokho uphendule imibuzo elandelako:
Kubayini ucabanga bona uNikhodemusi wavakatjhela uJesu ebusuku?—Funda uJwanisi 12:42, 43.
Ngokuhlangana noNikhodemusi ebusuku, uJesu watjengisa njani ukuthi uzimisele ukwenza abafundi?
Khuyini Esiyifunda KuJesu?
2. Ngebanga lokuthi siyabathanda abantu, sizimisele ukubasiza babe bafundi.
Lingisa UJesu
3. Fundani ngesikhathi nendaweni elungele umuntu ofunda naye iBhayibheli. Kungenzeka unyula ilanga elithileko leveke namkha isikhathi esithileko. Inga-kghani ukufumana kubulula ukufundela emsebenzinakhe, ekhaya namkha endaweni yomphakathi? Nakukghonekako, lungisa ihlelo lakho ukwenzela bona ufunde naye ngesikhathi afumaneka ngaso.
4. Fundani qobe. Nangabe uzabe ungekho, ungasijamisi isifundo. Kunalokho, cabangela lokhu:
Kghani ningabeka elinye ilanga evekeni bona nifunde ngalo?
Kghani ungaraga isifundo ngefowunu namkha ngethungelelwano levidiyo?
Kghani ungabawa omunye umrhuweleli ukuthi akuragele sona?
5. Thandazela ukuba nombono omuhle. Bawa uJehova akusize bona ungampheleli ihliziyo umuntu ofunda naye, ngitjho nanyana angakghoni ukufunda qobe namkha angakusebenzisi lokhu akufundako. (Flp. 2:13) Kungenzeka umuntu ofunda naye unobuntu obunengi obuhle, thandazela ukuthi udzimelele kibo.