Khuyini Eyenzeka KiboFakazi BakaJehova Ngesikhathi Sokubulawa Kwabantu E-Germany YamaNazi?

Kwahlongakala aboFakazi bakaJehova abangaba yi-1 500 kwabayi-35 000 ebebahlala e-Germany nakwezinye iinarha zamaNazi ngesikhathi sokubulawa kwabantu. Akwaziwa bona khuyini eyabulala boke aboFakazaba. Njengombana kusaragelwa phambili nokwenziwa kwerhubhululo, iimbalobalo neminye imininingwana kungavezwa ngokukhamba kwesikhathi.

• Babulawa njani?

• Kubayini bebahlunguphazwa?

• Bahlongakalela kuphi?

• Abanye balabo ababulalwako

Babulawa njani?

• 

  Ababulawako: Kwabulawa aboFakazi abangaba yi-400 e-Germany neenarheni zamaNazi. Abongazimbi abanengi basiwa emakhotho, bagwetjelwa ukufa begodu babulawa. Abanye badunyuzwa namkha baphanyekwa ngaphandle kokulalelwa komlandwabo emakhotho.

• Ukujeziswa kabuhlungu: AboFakazi abangaphezu kwe-1 000 bahlongakalela emakampeni wokuhlunguphazwa wamaNazi nemajele. Bebakatelelwa bona basebenze budisi bebahlongakale ngebanga lokutlhoriswa, indlala, amakhaza, ukugula nokungatlhogonyelwa kuhle ngokwezepilo. Umphumela wokuphathwa kumbi kangaka, waba kukuthi abanye bahlongakala msinyana ngemva kokutjhatjululwa ekupheleni kwePi yePhasi yesi-II.

• Abanye abonobangela: Abanye aboFakazi babulawelwa eenkumbeni ezizele irhasi, abanye kwenziwa ngabo ama-test ngamakhemikhali abulalako namkha banikelwa imijovo ebulalako.

Kubayini bebahlunguphazwa?

AboFakazi bakaJehova bahlunguphazelwa ukuthi bebalalela iimfundiso zeBhayibheli. Urhulumende wamaNazi nakakatelela aboFakazi ukuthi benze izinto ezingakhambisani nalokho okufundiswa yiBhayibheli, bebangamlaleli. Bakhetha ‘ukulalela uZimu njengombusi kunabantu.’ (IzEnzo 5:29) Cabanga ngamabanga amabili alandelako abenza bathatha isiquntwesi.

1. Ukungathathi ihlangothi kwezepolotiki. Njengabo boke aboFakazi namhlanjesi, aboFakazi bakaJehova ebebangaphasi kombuso wamaNazi bebangathathi ihlangothi kwezepolotiki. (Jwanisi 18:36) Yeke, khenge bavume

   • Ukuba yingcenye yamasotja namkha ukusekela ipi.​—Isaya 2:4; Matewu 26:52.

   • Ukuvowuda ngesikhathi samakhetho namkha ukuzihlanganisa neenhlangano zamaNazi.​—Jwanisi 17:16.

   • Ukuhlonipha itshwayo i-swastika namkha ukutjho amezwi athi, “Heil Hitler!”​—Matewu 23:10; 1 Korinte 10:14.

2. Ukuraga nokukholwa kwabo. Naphezu kokukhandelwa bona balotjhe uZimu, aboFakazi bakaJehova baragela phambili

   • Bahlangana bona bathandaze bebalotjhe uZimu ndawonye.—Hebheru 10:24, 25.

   • Batjhumayela umlayezo weBhayibheli banikela nabantu iincwadi ezisekelwe kilo.—Matewu 28:19, 20.

   • Banomusa kibomakhelwana babo, kuhlanganise namaJuda.—Markosi 12:31.

   • Babambelela ekukholweni kwabo, akhenge bavume ukutlikitla iphepha eliqinisekisa ukuthi bayakulisa ukuba boFakazi.—Markosi 12:30.

UPhrofesa u-Robert Gerwarth wathi aboFakazi bakaJehova “bekungibo kwaphela ebebaphila ngaphasi kombuso wamaNazi, abahlunguphazwa ngebanga lokukholwa kwabo.”a Ezinye iimbotjhwa ebezisekampeni yokuhlunguphazwa zeza zazokubuka aboFakazi bakaJehova ngokujamela abakukholelwako. Enye indoda ebeyibotjhiwe yathi: “Abayi epini. Bangakhetha ukufa kunokuthi babulale omunye umuntu.”

Bahlongakalela kuphi?

• Amakampa wokuhlunguphazwa: AboFakazi bakaJehova abanengi bahlongakalela emakampeni wokuhlunguphazwa. La makampa ebebavalelwe kiwo, e-Auschwitz, e-Buchenwald, e-Dachau, e-Flossenbürg, e-Mauthausen, e-Neuengamme, e-Niederhagen, e-Ravensbrück ne-Sachsenhausen. E-Sachsenhausen kwaphela, kwaqinisekiswa ukuhlongakala kwaboFakazi bakaJehova abangaba yi-200.

• Amajele: Abanye aboFakazi bebatlhoriswa bebayokuhlongakala emajele. Abanye bahlongakala ngebanga lamanceba abawafumana nabahlonywa imibuzo.

• Iindawo zokubulawa: AboFakazi bakaJehova bebabulawelwa ejele le-Berlin-Plötzensee, le-Brandenburg nele-Halle/Saale. Ukungezelela kilokho, ezinye iindawo ezingaba yi-70 ekwabulawelwa kizo aboFakazi bakaJehova zatlolwa phasi.

Abanye balabo ababulalwako

• 

  Igama: Helene Gotthold

  Indawo abulawelwa kiyo: E-Plötzensee (E-Berlin)

  U-Helene, umma onabantwana ababili, wabotjhwa iinkhathi ezimbalwa. Ngo-1937, waphathwa kumbi khulu nakahlonywa ngemibuzo kangangokuthi wahlongakalelwa mntwanakhe ongakabelethwa. NgoDisemba 8, 1944, waquntwa ihloko ejele le-Plötzensee, e-Berlin.

• 

  Igama: Gerhard Liebold

  Indawo abulawelwa kiyo: E-Brandenburg

  U-Gerhard obekaneminyaka ematjhumi amabili waquntwa ihloko ngoMeyi 6, 1943, ngemva kweminyaka emibili ubabakhe aquntwa ihloko ejele elifanako. Watlolela umndenakhe nomuntu ebekazokutjhada naye incwadi, wathi: “Ngaphandle kwamandla engiwafumene eKosini, bengekhe ngikghone ukuyikhamba indlela le.”

• 

  Igama: Rudolf Auschner

  Indawo abulawelwa kiyo: E-Halle/Saale

  U-Rudolf bekaneminyaka eyi-17 nakaquntwa ihloko ngoSeptemba 22, 1944. Ngaphambi kobana abulawe watlolela unina incwadi, wathi: “Abafowethu abanengi bayikhambile indlela le, njeke nami ngizoyikhamba.”