Khuyini Ekufuze Ngiyenze Nange Ngiphule Eminye Yemithetho Yababelethi Bami?

Imindeni eminengi inemithetho, ngokwesibonelo kuba nomthetho wokuthi kufuze ube ngendlini ngasiphi isikhathi, usebenzisa isikhathi esingangani ku-inthaneti nendlela ekufuze uphathe abanye ngayo.

Kuthiwani ke nange uphule umthetho? Angekhe ukghone ukutjhugulula okwenzekileko kodwana ungenza ubujamo bube ngcono kunokobana bube bumbi khulu. Isihlokwesi sizokucoca ngokuthi ungakwenza njani lokho.

• Ekungakafuzi ukwenze

• Ongakwenza

• Okutjhiwo ziintanga zakho

Ekungakafuzi ukwenze

• Nange ababelethi bakho bangazi ukuthi uphule eminye yemithetho, kungakwenza ulingeke bona ungabatjeli namkha ubafihlele.

• Nabaziko ukuthi uphule umthetho, ungalingeka bona uzivikele namkha usole omunye umuntu.

Iindlela ezimbilezi azikalungi. Kubayini? Ukufihla okwenzileko namkha ukulinga ukuzivikela kutjengisa bona awukakhuli ngokwaneleko. Kutjengisa ababelethi bakho bonyana usese mncani usatlhoga ukukhula.

“Ukukhuluma amala akulethi isisombululo. Ngokukhamba kwesikhathi, iqiniso lizokuvela begodu isiyalo ozosifumana sizokuba budisi khulu ukudlula ebewungasifumana ekuthomeni.”—U-Diana.

Ongakwenza

• Vuma okwenzileko. IBhayibheli lithi: “Ofihla umtjhaphwakhe angekhe aphumelele.” (IzAga 28:13) Ababelethi bakho bayazi bona uzoyenza imitjhapho. Umbuzo ophakamako uthi, Kghani uzokuthembeka?

  “Ababelethi bakho bazokuba nomusa nange ukhuluma iqiniso. Nawungabatjeli amala, uzokuqinisa indlela abakuthemba ngayo.”—U-Olivia.

• Bawa ukulitjalelwa. IBhayibheli lithi: ‘Mbathani ukuthobeka.’ (1 Pitrosi 5:5) Umuntu othi, “Ngilibalela” ngokusuka ehliziyweni nolinga ukubalekela ukuzivikela uthobekile.

  “Abantu abasolo bazivikela babulala unembezabo. Ngokukhamba kwesikhathi, angekhe basabona ubumbi bokwenza into engakalungi.”—U-Heather.

• Yamukela imiphumela yokuphula umthetho. IBhayibheli lithi: “Lalelani isiyalo.” (IzAga 8:33) Ungasolo unghonghoyila yamukela isiyalo ababelethi bakho abakunikela sona.

  “Nawusolo unghonghoyila ngesijeziso abakunikela sona uzoyikhweza intaba. Fumana indlela yokwamukela isijeziso begodu ungadzimeleli kilokho okukulahlekelileko.”—U-Jason.

• Sebenzela bona ababelethi bakho bakuthembe godu. IBhayibheli lithi: “Nihlubule ubuntu obudala obuvumelana nendlela ebeniziphatha ngayo esikhathini esidlulileko.” (Efesu 4:22) Ragela phambili uziphatha kuhle begodu wenze iinqunto ezizokwenza ababelethi bakho bakuthembe.

  “Nawusolo wenza iinqunto ezihle bewutjengise ababelethi bakho bona angekhe usenza umtjhapho ofanako godu, bazokuthemba.”—U-Karen.

ONGAKWENZA: Yenza okudlula abakubawa bona ukwenze ukuthi bakghone ukukuthemba. Ngokwesibonelo, nawuphumileko tjela ababelethi bakho ukuthi usendleleni ebuyako nanyana ungekhe ubuye lada. Lokhu kuzobatjengisa bona ufuna bakuthembe godu.