Ngemva kokuqothwa esimini ye-Edeni, u-Adamu no-Eva baba nabantwana abanengi. Indodanabo yokuthoma bekunguKayini, umlimi bese yesibili kungu-Abela, owaba ngumelusi.

Ngelinye ilanga uKayini no-Abela benzela uJehova umnikelo. Uyazi bona uyini umnikelo? Sisipho esikhethekileko. UJehova wawuthanda umnikelo ka-Abela, kodwana azange awuthande kaKayini. Lokho kwamsilinga khulu uKayini. UJehova wayelelisa uKayini ngokuthi ilaka lakhe lizomenzisa into embi. Kodwana uKayini azange alalele.

Kunokobana alalele, uKayini wathi ku-Abela: “Asikhambe siye emmangweni.” Kwathi nababodwa emmangwenapho, uKayini wahlasela umnakwabo wambulala. Bekazokwenzani uJehova ngalokho? UJehova wajezisa uKayini, wathi ayokuhlala kude nomndenekhabo. Bekangekhe asavunyelwa ukuthi abuye.

Sifundani thina endabeni le? Nathi singathoma ukusilingeka izinto nazingenzeki ngendlela esifuna ngayo. Kodwana nasizwa ilaka likhula ngaphakathi kwethu namkha nangabe abanye bayabona ukuthi sisilingekile bese bayasikhalima, kufuze sirhabe silungise besilawule nendlela esizizwa ngayo ngaphambi kobana amazizo lawo asilawule.

Ngebanga lokuthi u-Abela bekamthanda uJehova, enza nokulungileko, uJehova uzokuhlala amkhumbula. UZimu uzomvusa u-Abela nakenza iphaseli libe yiPharadesi.

Ngokukhamba kwesikhathi, abantu baba banengi ephasini. Inengi labo belingakalungi. Ngitjho nezinye iingilozi ezulwini zathoma ukukhohlakala. Zatjhiya ikhaya lazo ezulwini zeza ephasini. Uyazi ukuthi zakwenzelani lokho? Bezifuna ukuba nemizimba yabantu zitjhade nabafazi ephasini.

Abafazi bazo bazibelethela amadodana. Amadodana layo akhula abaziingorho ezitlhorisa abantu. UJehova bekangafuni bona intweleyo iragele phambili yenzeka. Yeke waqunta ukurhayila abantu abambi ngomthwalela.

Kodwana bekunomuntu obekahlukile. Umuntu loyo bekamthanda uJehova. Ibizo lakhe bekunguNowa. Bekanomfazi namadodana amathathu, uTjhemu, uRhamu noJafethi, nabo bebanabafazi. UJehova watjela uNowa bona akhe umkhumbi omkhulu, ukwenzela bona yena nomndenakhe bakwazi ukusinda eMthwaleleni. Umkhumbi ulibhoksi elikhulu elingathaya phezu kwamanzi. UJehova wamtjela nokuthi afake iinlwana ngemkhunjini, khona nazo zizokusinda.

Khonokho, uNowa wathoma ukwakha umkhumbi. Yena nomndenakhe kwabathatha iminyaka ema-50 ukwakha umkhumbi loyo. Bawakha njengombana uJehova abayalile. Phakathi nesikhatheso, uNowa wayelelisa abantu ngoMthwalela. Kodwana akukho namunye owalalelako.

Ekugcineni, kwaba sikhathi sokungena ngemkhunjini. Khesibone ukuthi kwenzekani ngemva kwalokho.