Eduze neBhabheli bekunedorobho elibizwa bona yi-Uri begodu abantu balapho bebalotjha abanye abozimu esikhundleni sakaJehova. Kodwana bekunenye indoda ebeyilotjha uJehova endaweni leyo. Ibizo layo bekungu-Abrahama.

UJehova wathi ku-Abrahama: ‘Phuma enarheni yekhenu, eenhlobeni zakho nendlini kayihlo uye enarheni engizakutjengisa yona.’ UZimu bewamthembisa wathi: ‘Ngizokwenza ube sitjhaba esikhulu, ngizokubusisa, ngizokwenza igama lakho libe likhulu.’

U-Abrahama bekangakwazi lapho uJehova amthumela khona kodwana bekamthemba uJehova. Yeke u-Abrahama, umkakhe uSara, ubabakhe uTerarhi nomzukulwakhe uLoti bathatha izinto zabo, balalela uZimu bathoma ikhambo labo elide.

U-Abrahama bekaneminyaka ema-75 nabafika enarheni uJehova ebekafuna baye kiyo. Beyibizwa ngokuthi yinarha yeKanana. Endaweni leyo, uZimu wenza isithembiso nasi ku-Abrahama: “Ngizokunikela isizukulwana sakho inarha le.” Kodwana u-Abrahama noSara besele baluphele begodu banganabantwana. Yeke, uJehova bekazosifeza njani isithembiso sakhe?

Besele kudlule iminyaka eminengi u-Abrahama noSara batjhadile. Batjhiya ikhaya labo elinethezekileko e-Uri bayokuhlala ematendeni. USara azange anghonghoyile ngombana bekamthemba uJehova.

USara kade afuna umntwana kangangobana wathi ku-Abrahama: “Ngibawa uye emabhayini nesisebenzi sami. Mhlamunye ngingafumana abantwana ngaso.” Ngokukhamba kwesikhathi, uHagari wabeletha indodana. Ibizo layo kwaba ngu-Itjhimayeli.

Ngokukhamba kwesikhathi, u-Abrahama nakaneminyaka ema-99 ubudala, umkakhe aneminyaka ema-89 bafikelwa ziimvakatjhi ezintathu. U-Abrahama wayokuhlala nazo ngaphasi komuthi, wadla nazo. Uyazi bezibobani iimvakatjhezo? Bekuziingilozi! Zathi ku-Abrahama: ‘Ngiqinisile, unyaka ozako ngesikhathesi, uSara umkakho uzabe sele anendodana.’ USara bekalalele indaba leyo angetendeni ngemva komnyango. Wahleka yedwa wazibuza wathi: ‘Ngingamthola njani umntwana sengiluphele kangaka?’

Emnyakeni olandelako, uSara wabeletha indodana, njengombana uJehova bekathembisile. U-Abrahama wamthiya bona ngu-Isaka, okutjho “Ukuhleka.”

Ngelinye ilanga uSara wabona u-Itjhimayeli adelela u-Isaka, bekaneminyaka emihlanu ngesikhatheso u-Isaka. Nje-ke uSara wathi u-Abrahama akaqothe isigqilakazesi uHagari kunye no-Itjhimayeli. Ekuthomeni, u-Abrahama bekangafuni ukubaqotha. Kodwana uJehova wathi ku-Abrahama: ‘Yenza koke uSara akutjela khona. Ngizomtlhogomela u-Itjhimayeli. Kodwana iinzukulwana zakho, zizokuthiyelelwa ngo-Isaka.’