ULoti bekahlala no-Abrahama umalumakhe enarheni yeKanana. ULoti no-Abrahama bathoma ukuba nefuyo enengi kangangobana inarha akhange isabanela, yaba yincani bona bangahlala kiyo baboke. Yeke u-Abrahama wathi kuLoti: “Ngibawa singalwi. Khetha lapho ufuna ukuhlala khona enarheni le. Ngibawa sihlukane. Nange uya ngesinceleni, mina ngizokuya ngesidleni.” Lokho bekutjengisa ukungabi nomrhobholo kwaka-Abrahama, akusinjalo?

ULoti wabona ingcenye ehle yenarha beyihlanu kweSodoma. Bekunamanzi amanengi notjani obuhlaza. Wakhetha indawo leyo wathuthela khona nomndenakhe.

Abantu beSodoma neGomora bebakhohlakele. Ekhabolakhona bebabambi kangangobana uJehova wabe waqunta nokuwabhubhisa amadorobho la. Kodwana uZimu bekafuna ukusindisa uLoti nomndenakhe, yeke wathumela iingilozi zakhe ezimbili bona ziyobayelelisa, zathi: ‘Rhabani! Phumani ngombana uJehova sele abandamele ukuzokubhubhisa idorobheli.’

ULoti wathoma wariyada. Yeke iingilozi zambamba ngesandla kanye nomkakhe namadodakazakhe amabili zabakhuphela ngaphandle kwedorobho, zathi: ‘Balekani, nisindise amaphilwenu! Ningaqali ngemuva beningajami nemrhobeni, khona ningazokutjhatjalaliswa.’

Lokha nabafika edorobheni leTsowari, uJehova wanisa isibabuli nomlilo phezu kwedorobho leSodoma neGomora. Amadorobho amabili lawo arhayilwa aphela. Ukungalaleli komkaLoti kwamenza waphenduka isithubi setswayi. Kodwana uLoti namadodakazakhe basinda ngombana balalela uJehova. Kufuze bona kwabadanisa ukungalaleli komkakhe. Kodwana kwabathabisa ukulalela iinqophiso zakaJehova.

U-Abrahama wafundisa indodanakhe u-Isaka ukuthanda nokuthemba uJehova nazo zoke iinthembiso zakhe. Kodwana u-Isaka nakaneminyaka ema-25, uJehova watjela u-Abrahama bona enze into okubudisi khulu. Bekuyini lokho?

UZimu wathi ku-Abrahama: ‘Ngibawa uthathe okukuphela kwendodanakho wenze ngayo umhlatjelo entabeni yeMoriya.’ U-Abrahama bekangalemuki bona uJehova kubayini athi enze njalo. Nanyana kunjalo wamlalela uJehova.

Ekuseni ngakusasa, u-Abrahama wathatha u-Isaka neensebenzi zakhe ezimbili baya eMoriya. Emalangeni amathathu, bebayibona ikude indawo leyo. U-Abrahama watjela iinsebenzi zakhe ezimbili bona zisale njengombana yena no-Isaka bayokwenza umhlatjelo. U-Abrahama wathwesa u-Isaka iinkuni, yena waphatha umukhwa. U-Isaka wabuza ubabakhe wathi: “Iphi imvu yokwenza umnikelo otjhiswako.” U-Abrahama wamphendula wathi: “Msanami, uZimu uzasipha imvu yokwenza umhlatjelo otjhiswako.”

Kwathi bona bafike entabeni, bakha i-aldara. U-Abrahama wabopha u-Isaka izandla neenyawo, wamlalisa phezu kwe-aldara.

U-Abrahama wathatha umukhwa. Nakasenza njalo, ingilozi kaJehova yarhuwelela isezulwini yathi: “Abrahama! Ungamlimazi umsana. Nje sengiyazi bona uyamsaba uZimu ngombana akhenge ungalele ngendodanakho okukuphela kwayo.” U-Abrahama wabona iramu kudanyana libambeke ngeempondo emthini. Khonokho walisa u-Isaka wenza umhlatjelo ngeramu esikhundleni saka-Isaka.

Kusukela ngelangelo, uJehova wabiza u-Abrahama ngokuthi mnganakhe. Uyazi bona kubayini? Kungombana u-Abrahama wenza nanyana yini ebekufuze ayenze. Nanyana bekangazwisisi bona kubayini uJehova athi kufuze enze njalo.

UJehova wasibuyelela isithembiso sakhe ku-Abrahama wathi: “Ngizokubusisa, ngizokwenza isizukulwana sakho sibe sinengi njengeenkwekwezi.” Lokho bekutjho ukuthi uJehova bekazokubusisa boke abantu abalungileko ngeenzukulwana zaka-Abrahama.