U-Isaka bekaneminyaka ema-40 ubudala nakatjhada uRabega. Bekamthanda tle! Ngokukhamba kwesikhathi, baba nabantwana ababili abamawele.

Omkhulu bekungu-Esewu, omncani kunguJakopo. U-Esewu bekumumuntu wangaphandle, azwana nommango begodu bekamzumi onobukghoni. Kodwana uJakopo bekathanda ukuhlala ekhaya ngematendeni.

Ngeenkhathezo, indodana edala beyinikelwa inarha enengi nemali nakuhlongakala ubaba. Lokho bekubizwa ngokuthi lilifa. Emndenini ka-Isaka, ilifa belifaka hlangana ukuba yingcenye yesithembiso uJehova asenza no-Abrahama. U-Esewu bekanganandaba neenthembiswezo kodwana kuJakopo iinthembiswezo beziqakatheke khulu.

Ngelinye ilanga, u-Esewu wafika ekhaya adinwe afile, abuyokuzuma. Wezwa iphunga lokudla okumnandi ebekuphekwa nguJakopo, nakezwa lokho wathi: “Ngibawa urhabe ungiphe isobho ebomvu leyo, ngidinwe khulu.” UJakopo wathi: “Ngithengisela ubuzibulo bakho.” U-Esewu wathi: “Qala ngiyafa, buzangisiza ngani ubuzibulo? Ungabuthatha. Mina ngizifunela ukudla.” Ucabanga ukuthi bekukuhlakanipha lokho okwenziwa ngu-Esewu? Awa, bekubudlhadlha. U-Esewu wadela into eligugu ngebanga lesobho.

Kwathi u-Isaka nasekaluphele, kwaba sikhathi sokubusisa indodana elizibulo. Kodwana uRabega wenza bona kube nguJakopo ongomncani ozokufumana isibusisweso. U-Esewu nakezwa ngalokho, wasilingeka khulu bewenza namano wokubulala umfowabo oliwele. U-Isaka noRabega balinga ukuvikela uJakopo, yeke bamtjela bathi: “Sikima, ubalekele kumfowethu uLabani. Uhlale naye isikhatjhana bekube kulapho umfowenu ehlisa khona umoya.” UJakopo wabalalela ababelethi bakhe, wabaleka bona asindise ipilwakhe.

UJehova wathembisa uJakopo bona uzomvikela njengombana avikela u-Abrahama no-Isaka. UJakopo wahlala endaweni ebizwa ngokuthi yiHarana, lapho atjhada khona, waba nomndeni omkhulu, waba nomnotho omnengi.

Ngokukhamba kwesikhathi, uJehova wathi kuJakopo: ‘Buyela emuva enarheni yaboyihlo.’ Yeke uJakopo nomndenakhe bathoma ikhambo elide babuyela emuva. Njengombana basendleleni, kwafika abantu kuJakopo bathi: ‘Umfowenu u-Esewu usendleleni ukhamba namakhulu amane wamadoda.’ UJakopo wathukwa khulu bewatshwenyeka ngalokho, acabanga bona u-Esewu uzomlimaza kunye nomndenakhe. Wathandaza kuJehova wathi: ‘Ngibawa ungisindise esandleni somfowethu.’ Ngelanga elilandelako, uJakopo wathumela u-Esewu isipho, okuziimbuzi ezinengi, iimpongo, izimvu, iinkomo, amakamela nabodumbana.

Kobunye ubusuku, uJakopo ahlezi yedwa, wabona ingilozi! Ingilozi yathoma ukulwa naye. Walwa nengilozi leyo bekwasa. Nanyana uJakopo alimala, azange ayilise ingilozi leyo. Ingilozi yathoma ukuthi: ‘Ngilisa ngikhambe.’ Kodwana uJakopo wathi: “Angeze ngikulise ukhambe ungakangibusisi.”

Ingilozi yaphetha ngokumbusisa. UJakopo wathoma walemuka bona uJehova angekhe avumele u-Esewu amlimaze.

Ekuseni kwamhlokho uJakopo nakaphakamisa amehlo, wabona u-Esewu eza namakhulu amane wamadoda. UJakopo wakhamba phambi kwabo boke, wafese waguqa ehlabathini wahloma ihloko phasi kalikhomba. U-Esewu wagijima wamhlangabeza wamgona. Bathoma ukulila bobabili benza ukuthula. Ucabanga bona indlela uJakopo alawula ngayo ubujamo ebekaqalene nabo yamenza wazizwa njani uJehova?

U-Esewu wabuyela emuva enarhenakhe noJakopo wabuyela emuva. UJakopo bekanamadodana ali-12. Amabizwawo bekunguRubeni, uSimiyoni, uLevi, uJuda, uDani, uNafitali, uGadi, u-Atjheri, u-Isakari, uZebuloni, uJosefa noBhenjamini. UJosefa ongomunye wamadodana la, wasetjenziswa nguJehova ekusindiseni abantu bakhe. Uyazi wakwenza njani lokho? Khesifumane ipendulo.