UMosi wahlala kwaMidiyani iminyaka ema-40. Watjhada waba nabantwana. Ngelinye ilanga asalusa izimvu hlanu kweNtaba iSinayi, wabona ikarisomraro. Wabona umuthi wamanyeva uvutha kodwana bewungatjhi! Kuthe nakatjhidela kiwo, afuna ukuwubona kuhle, wezwa ilizwi livela emthini loyo lithi: ‘Mosi! Ungatjhideli. Hlubula amapatlagwanakho ngombana indawo ojame kiyo icwengile.’ NguJehova obekakhuluma noMosi asebenzisa ingilozi.

UMosi wathukwa wagubuzesa ubuso bakhe. Ilizwi laraga lathi: ‘Ama-Israyeli angitlhuwisile. Nje-ke ngizobatjhaphulula esandleni samaGibhide ngibase endaweni ehle khulu. Nguwe ozokutjhaphulula abantu bami eGibhide.’ Ucabanga bona lokho kwamrara uMosi?

UMosi wabuza wathi: ‘Manje ngizokuthini kiwo?’ UZimu waphendula wathi: ‘Uzakuthi uZimu wabokhokho benu, uZimu ka-Abrahama, u-Isaka noJakopo ungithume kini.’ UMosi wathi: ‘Khesithi ama-Israyeli awangilaleli, ngizokuthini?’ UJehova wamqinisekisa ukuthi uzomsiza. Wamtjela ukuthi aphosele phasi idondolo lakhe. Idondolo laphenduka inyoka! Lokha uMosi nakabamba inyoka ngomsila yabuya yaphenduka idondolo. UJehova wathi: ‘Naso-ke isibonakaliso, ukuze bakholwe bonyana uthunyelwe nguZimu.’

UMosi wathi: ‘Angikwazi kuhle ukukhuluma.’ UJehova wamthembisa wathi: ‘Ngizokusiza bengikutjele ozokutjho begodu ngizokuthumela umfowenu u-Aroni akusize.’ Ngokwazi ukuthi uJehova bekanaye, uMosi wathatha umkakhe namadodanakhe baya eGibhide.

Ama-Israyeli akatelelwa bona asebenze budisi njengeengqila. UJehova wathumela uMosi no-Aroni kuFaro nomlayezo othi: ‘Tjhaphulula abantu bami bakhambe, bayongilotjha emmangweni.’ UFaro wazibetha isifuba wathi: ‘Anginandaba nokuthi uJehova uthini, angekhe ngiwatjhaphulule ama-Israyeli.’ Ngebangelo uFaro waqinisa isandla, wawasebenzisa budisi khulu. UJehova waqunta ukufundisa uFaro isifundo. Uyazi bona wakwenza njani lokhu? Wabetha iGibhide ngeeMbetho eziliTjhumi. UJehova wathi kuMosi: ‘UFaro akangilaleli. Ekuseni uzakuya emlanjeni weNayili. Khamba umtjele ukuthi njengombana angafuni ukutjhaphulula abantu bami nje, woke amanzi weNayili azokuphenduka iingazi.’ UMosi walalela wayomtjela. UFaro bekaqale u-Aroni njengombana abetha amanzi ngedondolo lakhe, umlambo uphenduka iingazi. Amanzi athoma ukunuka, iimfesi zafa begodu akhenge kusaba namanzi ahlwengileko wokusela avela eNayili. Nanyana kunjalo uFaro wala ukutjhaphulula ama-Israyeli.

Ngemva kwamalanga alikhomba, uJehova wathumela uMosi bona abuyele kuFaro nomlayezo othi: ‘Nange ungatjhaphululi abantu bami, iGibhide yoke izokuzala iinrhwarhwa.’ U-Aroni waphakamisa idondolo lakhe, iinrhwarhwa zazala inarha yoke. Abantu bafumana iinrhwarhwa ngeendlini zabo, emibhedeni nezitjeni. Bekuneenrhwarhwa kiyo yoke indawo! UFaro warabhela uMosi wathi abawe uJehova asuse iinrhwarhwezo. Wathembisa nokutjhaphulula ama-Israyeli. Nje-ke uJehova azange asaziletha, amaGibhide abuthelela iinrhwarhwa ezifileko, kwaba maqubi. Kwathoma ukunuka enarheni. Kodwana nalapho uFaro akhenge abatjhaphulule abantu.

Ngalokho uJehova wathi kuMosi: ‘U-Aroni kufuze abethe phasi ngedondolo lakhe, bese ithuli lizakuphenduka abonompopoloza.’ Kwarhaba kwaba nabonompopoloza kiyo yoke indawo. Abanye abantu bakaFaro bamtjela bathi: ‘Isibethwesi sivela kuZimu.’ Kodwana uFaro akhenge awatjhaphulule ama-Israyeli.