UJehova wathi kuMosi: ‘Khuphukela kimi entabeni. Ngizokunikela amatje engizokutlola kiwo imithetho nemiyalo.’ UMosi wakhuphukela entabeni wahlala khona amalanga nobusuku obuma-40. Nakalapho uJehova watlola imiThetho eliTjhumi ematjeni emibili wayinikela uMosi.

Ngemva kwesikhathi, ama-Israyeli acabanga bona uMosi ukhambele futhi. Yeke athi ku-Aroni: ‘Sikima usenzele isithombe sakazimu ozosidosa phambili!’ U-Aroni wathi kiwo: ‘Ngiphani igolide lenu.’ Walitjhisa igolidelo wenza isithombe sekunzana. Abantu bathi: ‘Lo nguZimethu owasikhupha enarheni yeGibhide!’ Bathoma ukulotjha isithombe sekunzaneso. Bekukumbi lokho na? Iye, ngombana abantu bathembisa ukulotjha uJehova kwaphela. Kodwana nje besebabhalelwa kufeza isithembisweso.

UJehova wakubona koke lokho, wathi kuMosi: ‘Yehlela ebantwini. Abangilaleli begodu balotjha uzimu wamala.’ UMosi wehla, aphethe amatje amabili.

Njengombana atjhidela ngekampeni, uMosi wezwa abantu bavuma. Wababona bagida bebakhothamela nesithombe sekunzana. UMosi wasilingeka khulu, bewaphosela amatje ebekawaphethe phasi, aphuka aba ziincucwana. Khonokho wathatha ikunzana leyo wayiphosela emlilweni, wayitshidlha. UMosi wathi ku-Aroni: ‘Bakwenzeni abantwaba uzaze ubehlisele isonokazi esingaka na?’ U-Aroni wathi: ‘Ungasilingeki kosami ngombana uyazi ukuthi abantwaba bathanda ukwenza okumbi. Bathe kimi senzela uzimu ozokukhamba phambi kwethu, ngaphosela igolide labo emlilweni kwaphuma ikonyaneli!’ U-Aroni bekungakafaneli akwenze lokho. UMosi wabuyela entabeni wayokuncancabeza kuJehova bona alibalele abantu.

UJehova wabalibalela labo ebebazimisele ukumlalela. Nje-ke uyabona ukuthi bekuqakatheke kangangani ngama-Israyeli bona alalele isinqophiso sakaMosi?

Lokha uMosi nakaseNtabeni yeSinayi, uJehova wathi akhe itende elikhethekileko elizokubizwa ngokuthi yithaberinakeli, okuyindawo ama-Israyeli azamlotjhela kiyo. Bebazokwazi ukukhamba nalo nabafudukako.

UJehova wathi: ‘Tjela ama-Israyeli bona anikele ngananyana yini ekusizeni ukwakha ithaberinakeli.’ Ama-Israyeli anikela ngegolide, isiliva, ikhopha, amatje aligugu, kuhlanganise nejuwelari. Anikela nangewulu, ilineni, iinkhumba zeenlwana nezinye izinto ezinengi. Bekapha ngokuzimisela, kangangokuthi uMosi wagcina sekathi: ‘Sekwanele! Ningasalethi okungale kwalokhu.’

Amadoda nabafazi abanengi ebebanamakghono, basiza ekwakheni ithaberinakeli. UJehova wabenza baba nokuhlakanipha ngomsebenzi loyo. Abanye bebenza amatjhila ngokuthungelela amarhara, babaze amatje, basebenze nangegolide. Abanye bebabaza neengodo.

Abantu bakha ithaberinakeli njengombana uJehova abalayele. Benza netjhila elihle elihlukanisa ithaberinakeli libe ziingcenye ezimbili, ingcenye eCwengileko neCwengeke Khulu. Engcenyeni eCwengeke Khulu bekunomfaji wesivumelwano. Wona bewenziwe ngeengodo zomuthi womtholo. Kuthi engcenyeni eCwengileko kube nelithi lesibani legolide, itafula ne-aldara lepepho. Esirhodlweni bekunesitja sekoporo ne-aldari elikhulu. Umfaji wesivumelwano bewukhumbuza ama-Israyeli isithembiso sawo sokulalela uJehova. Uyazi bona siyini isivumelwano? Sisithembiso esikhethekileko.

UJehova wakhetha u-Aroni namadodanakhe bona basebenze ethaberinakeli, babe baphristi. Bekufuze balitlhogomele bebenze nomnikelo otjhinga kuJehova. Mphristi ophakemeko kwaphela u-Aroni, obekavunyelwe ukungena la kuCwengeke khona Khulu. Bekangena kanye kwaphela ngomnyaka, ayokunikela ngebanga lezono zakhe, zamadodanakhe, zomndenakhe, nezesitjhaba soke sakwa-Israyeli.

Ama-Israyeli aqeda ukwakha ithaberinakeli ngemva komnyaka munye aphumile eGibhide. Njenganje besele anendawo yokulotjha uJehova.

UJehova wazalisa ithaberinakeli ngephazimulwakhe bewenza nelifu lavela phezukwalo. Lokha ilifu naliphezu kwethaberinakeli ama-Israyeli bewazi ukuthi kufuze ahlale khonapho. Kodwana ilifu naliphakamako, bewazi ukuthi sekusikhathi sokukhamba. Bewahlukanisa ithaberinakeli bese alandele ilifu.