Ama-Israyeli asuka eNtabeni yeSinayi atjhinga eKhadeshi, adlula iParana. Kulapho-ke uJehova atjela khona uMosi wathi: ‘Thumela amadoda ali-12, avela ekorweni ngayinye, uthumele nomrholi bona ayokuhlola inarha yeKanana engayinikela ama-Israyeli.’ Yeke uMosi wakhetha amadoda ali-12 wathi kiwo: ‘Tjhingani ngeKanana niyokuqala bona inarha yakhona yihle na. Niqale nokuthi abantu abahlala kiyo banamandla namkha babuthakathaka, niqale ukuthi inarha yakhona yihle namkha yimbi nokuthi amadorobho wakhona avikelekile namkha awanamithangala na.’ Iinhloli ezili-12 kuhlanganise uJotjhuwa noKalebi, bakhamba boke nabaya eKanana.

Ngemva kwamalanga ama-40, iinhloli zabuya ekuhloleni inarha, ziphethe amafeyi, amarharinadi namadiribe. Zabikela uMosi, zathi: ‘Yinarha ehle, nokho abantu bakhona ziintsitsirimba namadorobho wakhona anemithangala begodu aziinthabathaba.’ UKalebi wathi: ‘Asiyithumbeni inarha!’ Uyazi kubayini uKalebi atjho njalo? Ngombana yena noJotjhuwa bebamthemba uJehova. Kodwana ezinye iinhloli ezilitjhumi zathi: ‘Awa! Angekhe sikghone ukukhuphuka, ngombana amadoda la ziintsitsirimba, thina sifana neentethe kiwo.’

Ama-Israyeli adana. Athoma ukunghonghoyila komunye nomunye, athi: ‘Asizikhetheleni umrholi, sibuyele eGibhide. Kubayini kufuze siye endaweni le, siyokubulawa?’ UJotjhuwa noKalebi bathi: ‘Lisani ukuhlubuka kuJehova, begodu ningesabi. UJehova uzosivikela.’ Kodwana ama-Israyeli azange alalele. Aluka namano wokubulala uJotjhuwa noKalebi.

UJehova wenzani ngalokho? Wathi kuMosi: ‘Ngaphezu kweembonakaliso engizenzele u-Israyeli, nanje akangilaleli. Yeke bazakuhlala emmangweni iminyaka ema-40 begodu bazakufela lapho. NguJotjhuwa noKalebi nabantwababo kwaphela abazakungena enarheni enganithembisa ukuninikela yona.’

Kuthe nakukhamba isikhathi ama-Israyeli nawasemmangweni, uKhorarhi, uDatani, no-Abiramu, nabanye abama-250 bajamelana noMosi. Bathi kuye: ‘Kwanje khona sekwanele! Kubayini kufuze ube mrholethu, u-Aroni ngapha abe mphristi ophakemeko? UJehova unathi soke, ingasi wena no-Aroni kwaphela.’ UJehova kwamkwatisa lokho. Kuye kwabonakala kwanga amadoda la ajamelane naye!

UMosi wathi kuKhorarhi nejima lakhe: ‘Kusasa ekuseni, thathani izitja zokutjhisela ipepho nikhelele amalahle nithele itjhwalo phezu kwawo nize ethaberinakelini. UJehova nguye ozakuveza amkhethileko.’

Ngelanga elilandelako, uKhorarhi namadoda ama-250 bayokuhlangana noMosi ethaberinakelini. Nabafika lapho batjhisa ipepho ngasuthi babaphristi. UJehova wathi kuMosi noAroni: ‘Zihlukaniseni kuKhorarhi namadoda akhamba naye.’

Nanyana uKhorarhi akhamba wayokuhlangana noMosi ethaberinakelini, uDatani, u-Abiramu, nemindenabo azange baye. UJehova watjela ama-Israyeli bona atjhidele kude netende lakaKhorarhi, uDatani, no-Abiramu. Ama-Israyeli arhaba enza njalo. UDatani, u-Abiramu, nomndenabo bajama ngaphandle kwamatendabo. Khonokho ihlabathi yahlukana phakathi yabaginya! Ethaberinakelini, kwehla umlilo watjhisa uKhorarhi nawo woke amadoda ama-250.

Ngalokho uJehova wathi kuMosi: ‘Thatha intonga ebarholini bekoro ngayinye, utlole ibizo lomrholi kenye nenye intonga. Kodwana entongeni yekoro yamaLevi, tlola ibizo laka-Aroni. Zifake ngaphakathi ethaberinakelini, kuzokuthi iintonga zalabo engibakhethileko, kumile amathuthumbo kizo.’

Ngelanga elilandelako uMosi wazikhupha zoke iintongezo wazitjengisa abarholi. Intonga ka-Aroni ngiyo ebeyimile amathuthumbo, nama-alimondi avuthiweko. Lokho kwatjengisa bona uJehova ukhethe u-Aroni bona abe mphristi ophakemeko.