Iinhloli ezima-Israyeli ezakhamba zayokuhlola inarha yeJerikho, zafika zahlala emzini womfazi okuthiwa nguRarhabu. Ikosi yeJerikho yathumela amasotja ngemva kokuzwa bona uRarhabu ufihle iinhloli emzinakhe. Ngokuzwa lokho, wafihla iinhloli ezimbili ephahleni lomzakhe, watjela amasotja bona iinhloli zikhambe ngenye indlela. Wathi eenhlolinezi: ‘Ngizonisiza ngombana ngiyazi bona uJehova ungehlangothini lenu begodu nizoyithatha inarhethu le. Ngibawa ningithembise bona nizowusindisa umndenami.’

Iinhloli zathi kuRarhabu: ‘Sifunga ngepilwethu, akekho namunye ngendlinakho ozakulimala.’ Zathi: ‘Bophela intambo ebomvu le efesiderenapha, umndenakho angekhe ulimale.’

URarhabu wehlisa amadoda la ngentambo ebeyisefesiderini. Aya eentabeni, azifihla lapho amalanga amathathu ngaphambi kokubuyela kuJotjhuwa. Ngemva kwalokho, ama-Israyeli ayama uMlambo iJordani azilungiselela ukuthatha inarha. IJerikho bekulidorobho lokuthoma abalihlulako. UJehova wabatjela ukuthi bazombe umuzi kanye ngelanga bekube malanga asithandathu. Ngelanga lekhomba, bazombe umuzi amahlandla alikhomba. Yeke abaphristi bavuthela iimpalapala, amasotja arhuwelela. Imithangala yedorobho yagirika! Kodwana umuzi kaRarhabu ebewakhiwe phezu komthangala, azange ugirike. URarhabu nomndenakhe basindiswa ngombana uRarhabu wathembela kuJehova.

Okwenzeka eJerikho kwarhatjheka kizo zoke iinarha eziseKanana. Amakhosi wakhona aluka amano wokuthi ahlangane asahlele ama-Israyeli. Kodwana abantu beGibiyoni benza okuhlukileko. Baya kuJotjhuwa bambethe izembatho zakade, bathi: ‘Sibuya enarheni ekude khulu. Sizwile ngoJehova nakho koke anenzele khona eGibhide nakwaMowabi. Sithembisani bona angeze nasisahlela, begodu thina sizakuba ziinsebenzi zenu.’

UJotjhuwa wabakholwa wabe wavuma nokuthi angeze abasahlele. Ngemva kwamalanga amathathu, wafumana bona ababuyi enarheni ekude. Bebahlala khona eKanana. UJotjhuwa wababuza wathi: ‘Kubayini nisitjele amala?’ Baphendula bathi: ‘Besithukiwe! Siyazi nokuthi uJehova uZimenu uyanilwela. Sibawa ningasibulali.’ UJotjhuwa wenza ngokwesithembiso sakhe, wabalisa baphila.

Kungasikade, amakhosi amahlanu weKanana namabuthwawo athusela amaGibiyoni. UJotjhuwa wakhamba nebutho lakhe ubusuku boke bona ayobasindisa. Ipi yathoma ekuseni ngelanga elilandelako. AmaKanana athoma ukubaleka arhatjheka azala ummango. Nanyana kukuphi la ebekabalekela khona, uJehova bekawakghadlha ngesinanja samatje. Ngemva kwalokho uJotjhuwa wabawa uJehova bona enze ilanga lijame tsi! Kubayini abawa uJehova ajamise ilanga lingasikinyeki, okuyinto engakhenge kheyenzeke? UJotjhuwa bekathemba uJehova. Ilanga azange lisikinyeke bekwaba kulapho ama-Israyeli ahlula khona amakhosi weKanana namabuthwawo.