Imibuzo Evela Ebafundini

Inga-kghani umtlolo kaMtjhumayeli 5:8 ukhuluma ngababusi ababantu namkha ukhuluma ngoJehova?

Iveseli likhuluma ngendaba eqakathekileko nalithi: “Ungarareki lokha nawubona ukugandelelwa kochakileko nokwephulwa kokulunga nepatho efaneleko embusweni: Isikhulu esiphezulu sivikelwe ngesingaphezu kwaso godu kunezinye ngaphezu kwazo.”—UMtj. 5:8.

Nasingaqali iveseli ngendlela uJehova afuna silizwisise ngayo, singacabanga bona likhuluma ngaborhulumende babantu kwaphela. Kodwana iveseli litjho okungale kwalokho, likhuluma ngoJehova nangeqiniso ekufuze lisiduduze nasiwezwako.

Umtlolo kaMtjhumayeli 5:8 ukhuluma ngombusi ogandelela abantu abatlhagako begodu ongabanikeli ubulungiswa. Kodwana umbusi lo ekufuze akukhumbule kukuthi kungenzeka kunomunye umuntu osesikhundleni esingaphezu kwesakhe omqalileko. Iqiniso kukuthi vele bakhona abanye abantu abaneenkhundla eziphakemeko kezabanye. Okudanisako kukuthi, boke aborhulumende babantu banokukhohlakala begodu abantu abatlhagako kufuze baphathwe ngokunganabulungiswa bebakubekezelele lokho.

Ngitjho nanyana izinto zingabonakala zizimbi kangangani, kufuze kusiduduze ukwazi ukuthi uJehova ‘uqale ngitjho neenkhulu eziphezulu’ eziborhulumende babantu. Kufuze sithandaze kuZimu begodu siphose imithwalwethu phezu kwakhe. (Rhu. 55:22; Flp. 4:6, 7) Siyazi ukuthi, “Amehlo kaSomnini athalaza ephasini loke ukuqinisa labo abanhliziyo zabo zinamathele kuye.”—2 Kron. 16:9.

Yeke umtlolo kaMtjhumayeli 5:8 usenza sizwisise ukuthi nasikhuluma ngaborhulumende; uzokuhlala akhona onamandla ukudlula omunye urhulumende. Kodwana okuqakatheke khulu ekufuze sihlale sikukhumbula kukuthi, uJehova unamandla amakhulu khulu ukudlula nanyana ngubani begodu unguMbusi oPhakemeko. Sikhuluma nje ubusa neNdodanakhe uJesu Krestu oyiKosi yomBuswakhe. UMninimandla woke uqalile, ubona koke okwenzekako begodu ubusa ngobulungiswa neNdodanakhe nayo ifana naye.