Kghani AboFakazi BakaJehova Batjhugulule iBhayibheli Bona Likhambisane Neenkolelo Zabo?
Awa asikalitjhugululi. Ngokuhlukileko, nasifumana bona iinkolelo zethu azikhambisani neBhayibheli, satjhugulula iinkolelo zethu.
Kade ngaphambi kokuthi sigadangise itjhugululo i-New World Translation of the Holy Scriptures ngabo-1950, sahlolisisa iBhayibheli. Sasebenzisa nanyana ngiyiphi itjhugululo ebeyifumaneka bona iinkolelo zethu zikhambisane nayo. Akhe ufunde ngezinye zeembonelo zeenkolelo zaboFakazi bakaJehova, bese uyaziquntela bona ziyakhambisana na nalokho okufundiswa liBhayibheli kwamambala.
Esikukholelwako: UZimu akasinguZiquzintathu. Umagazini wangoJulayi 1882 we-Zion’s Watch Tower wathi: “Abafundi bethu bayalemuka ukuthi nanyana sikholelwa kuJehova, uJesu nomoya oCwengileko, ifundiso ethi laba boZimu abathathu, emuntwini munye namkha njengombana abanye bathi unguziquzintathu, siyiqala njengaleyo engaveli emitlolweni.”
Okutjhiwo liBhayibheli: “UJehova uZimethu nguJehova munye.” (Duteronomi 6:4, The Holy Bible, by Robert Young) “KunoZimu munye, uBaba, okuvela kuye zoke izinto nathi esiphilela yena; begodu kuneKosi yinye, uJesu Krestu, okwenziwa ngaye zoke izinto nathi esikhona ngaye.” (1 Korinte 8:6, American Bible Union Version) UJesu ngokwakhe wathi: “UBaba mkhulu kunami.”—Jwanisi 14:28, Douay-Rheims Version.
Esikukholelwako: Akukho ukuhlunguphazwa unomphela esirhogweni. I-Zion’s Watch Tower nayidzubhula umtlolo webeRoma 6:23 eBhayibhelini i-King James Version, yabeka isihloko sakamagazini wangoJuni 1882 sathi “Umrholo Wesono Kukufa,” umagazini lo wathi: “Qala bona isihlokwesi sikhanya besilula kangangani. Kodwana kuyarara ukuthi abantu abanengi abathi baqala iBhayibheli njengeliZwi lakaZimu baphikisana nomutjho lo oliqiniso godu bathi bakholelwa ukuthi umrholo wesono kuhlunguphazwa unomphela esirhogweni begodu bathi iBhayibheli lifundisa lokho.”
Okutjhiwo liBhayibheli: “Umphefumulo owonako uzokufa.” (Hezekiyeli 18:4, 20, King James Version) Isijeziso samaswaphela salabo abaphikisana noZimu, akusikuhlunguphazwa unomphela kodwana “kutjhatjalaliswa ngokungapheliko.”—2 Thesalonika 1:9, King James Version.
Esikukholelwako: UmBuso kaZimu ungewamambala, awusiseenhliziyweni zethu. Malungana nomBuso kaZimu, i-Zion’s Watch Tower kaDisemba 1881 yathi: “Ukuba khona komBuso lo kuzokuqeda yoke imibuso yephaseli.”
Okutjhiwo liBhayibheli: “Emihleni yamakhosi lawo uZimu wezulwini uzokubeka umbuso ongekhe utjhatjalaliswe, umbuso lo angeze udluliselwe kwabanye abantu, uzokutshidlha uqede yoke imibuso le begodu wona uzokujama ngokungapheliko.”—Danyela 2:44, King James Version.
Kghani aboFakazi bakaJehova bathembele eTjhugululweni yePhasi eliTjha bona besekele iinkolelo zabo?
Awa, siragela phambili sisebenzisa amatjhugululo amanengi weBhayibheli nasitjhumayelako. Kuhle kuhle, labo esifunda nabo iBhayibheli sibapha simahla ikhophi yeTjhugululo yePhasi eliTjha begodu siyakuthabela nokufunda nalabo abakhetha ukusebenzisa amanye amatjhugululo weBhayibheli.