Ngesikhathi sesomiso, uJehova watjela u-Eliya wathi: ‘Iya eTsarifathi. Nawufika lapho umhlolokazi uzokunikela ukudla.’ Emasangweni wedorobha, u-Eliya wabona umhlolokazi otlhagako abuthelela iinkuni. Wambawa ikapho yamanzi. Njengombana ayowathatha, u-Eliya wabuye wathi: ‘Ngibawa ungiphe noburotho.’ Kodwana umhlolokazi wathi: ‘Anginabo uburotho engingakunikela bona. Ngineflowuru encani yokwenzela mina nendodanami ukudla.’ U-Eliya wathi: ‘UJehova uthembise ukuthi nawungenzela uburotho, iflowuru encani leyo angekhe iphele bekune izulu godu.’

Yeke, umhlolokazi wangena ngendlini wenzela umphorofidi kaJehova uburotho. Njengombana uJehova athembisile, umhlolokazi nendodanakhe bebahlala banokudla ngesikhathi sesomiso. Umjeka weflowuru namafutha bekuhlala kuzele.

Kodwana kwenzeka okuthileko okubuhlungu. Indodana yomhlolokazi yagula beyafa. Wabawa u-Eliya bona amsize. U-Eliya wathatha umsana lo kunina, waya naye ekumbeni ephezulu. Wamlalisa embhedeni wathandaza, wathi: ‘Jehova, ngiyabawa, vusa umntwana lo.’ Uyazi kubayini lokho bekuyikarisomraro uJehova angayenza? Kungombana esikhathini saka-Eliya, akakho owakhe wavuswa begodu umhlolokazi lo nendodanakhe bebangasiwo ama-Israyeli.

Umsana lo wavuka, wathoma ukuphefumula. U-Eliya wathi emhlolokazini: ‘Indodanakho ivukile.’ Wathaba khulu wathi ku-Eliya: ‘Mbala umumuntu kaZimu. Ngitjho ngombana ukhuluma lokho okutjelwe nguJehova.’

IKosi u-Arhabi nayisesigodlweni sayo eJizriyela, beyikghona ukubona isivande samadiribe sendoda ibizo layo elinguNabhothi. U-Arhabi bekasifuna isivandesi, ngalokho walinga ukusithenga kuNabhothi. Kodwana uNabhothi wala ukumthengisela sona ngombana bekungakhambelani nomThetho kaJehova ukuthengisa inarha efunyenwe ngelifa. Kghani u-Arhabi wamhlonipha na uNabhothi ngokwenza into ehle? Awa. U-Arhabi wakwata kwamanikelela. Indlela ebekakwate ngayo azange aphume nangelawini lakhe lokulala, bewala nokudla.

Umka-Arhabi onehliziyo embi, iNdlovukazi uJezebheli, wathi kuye: ‘Uyikosi yakwa-Israyeli. Akunanto ongeze wabanayo. Mina ngizakutholela isivandeso.’ UJezebheli watlolela abadala bedorobha incwadi, abatjela ukuthi basole uNabhothi ngokuthi uhlambalaze uZimu begodu bamkghadlhe ngamatje. Abadala benza njengombana uJezebheli abatjele ukuthi benze, ngemva kwalokho uJezebheli wathi ku-Arhabi: ‘UNabhothi ufile. Isivande ngesakho.’

UNabhothi akusuye yedwa umuntu onganamlandu owabulawa nguJezebheli. Wabulala abantu abanengi ebebathanda uJehova. Bekalotjha iinthombe begodu enza nezinye izinto ezimbi. UJehova wazibona zoke izinto ezimbi ebezenziwa nguJezebheli. Bekazokwenzani ngaye?

Kuthe ngemva kokuhlongakala kwaka-Arhabi, indodanakhe uJehoramu yaba yikosi. UJehova wathumela indoda ekuthiwa nguJehu bona ijezise uJezebheli nomndenakhe.

UJehu wakhwela ikaranakhe watjhinga eJizriyela, lapho kuhlala khona uJezebheli. UJehoramu wahlangabeza uJehu ngekarana, wambuza ukuthi: ‘Kunokuthula na phakathi kwethu?’ UJehu wathi: ‘Angekhe kwaba nokuthula unyoko, uJezebheli, asaragela phambili nokwenza izinto ezimbi.’ UJehoramu walinga ukujikisa ikaranakhe afuna ukubaleka. Kodwana uJehu wamdubula ngomsubela, kwaba kuhlongakala kwakhe.

Nakasuka lapho uJehu waya esigodlweni sakaJezebheli. UJezebheli uthe nakezwa ukuthi uyeza, waziphotjhonga ubuso, walungisa neenhluthu zakhe, wamlinda efesidereni eliphezulu. UJehu nakafika, uJezebheli wamlotjhisa ngendlela enganahlonipho. UJehu warhuwelela iinceku zakaJezebheli ebezijame naye efesidereni, wathi: ‘Mphoseleni phasi!’ Zamphosela phasi, wafa.

Ngemva kwalokho, uJehu wabulala amadodana ka-Arhabi ama-70 bewakuqeda nokulotjhwa kwakaBhali enarheni. Uyabona ukuthi uJehova wazi yoke into begodu ngesikhathi esifaneleko uyabajezisa abenza okumbi?