-
UmBuso KaZimu Wathoma Nini Ukubusa? (Ingcenye 1)IsiThala—2014 | Novemba 1
-
-
INGCOCO NOMAKHELWANA
UmBuso KaZimu Wathoma Nini Ukubusa?—Ingcenye 1
Okulandelako yingcoco omunye waboFakazi bakaJehova angaba nayo nomakhelwana. Akhe sithi uFakazi ibizo lakhe elinguThemba uvakatjhele emzini wendoda ibizo lakhe elinguSipho.
‘FUNISISA,’ UKWAZI UKUZWISISA
UThemba: Sipho, ngizithabele iingcoco zaqobe esibe nazo zeBhayibheli.a Lokha nasigcina ukukhuluma waphakamisa umbuzo malungana nomBuso kaZimu. Wabuza ukuthi kubayini aboFakazi bakaJehova bakholelwa bonyana umBuso wathoma ukubusa ngo-1914.
USipho: Iye, bengifunda enye yeencwadi zenu, begodu ithe umBuso kaZimu wathoma ukubusa ngo-1914. Lokho kwangenza ngaba nekareko, khulukhulu njengombana nithi nisekela iinkolelo zenu eBhayibhelini.
UThemba: Iye, kunjalo.
USipho: Uyazi ngilifundile nami iBhayibheli, kodwana angikhumbuli ngibona lapho kukhulunywa khona ngo-1914. Ngangena ku-Inthanethi ngenza irhubhululo “ngo-1914” eBhayibhelini. Akhenge ngifumane litho ngendaba le eBhayibhelini.
UThemba: Ngithanda ukukubuka Sipho ngeenzathu ezimbili. Sokuthoma, ngesokuthi ulifunde loke iBhayibheli. Lokho kutjengisa ukuthi ulithanda kwamambala iliZwi lakaZimu.
USipho: Iye, ayikho into engafaniswa nalo.
UThemba: Nami ngiyavuma. Kwesibili, ngifuna ukukubuka ngokuya eBhayibhelini newufuna ipendulo yombuzwakho. Wenze lokho iBhayibheli elisikhuthaza bona sikwenze nalithi: ‘Funisisa,’ ukwazi ukuzwisisa.b Kuhle ukwenza umzamo loyo.
USipho: Ngiyathokoza. Nami ngiyafuna ukuragela phambili ngifunda. Eqinisweni, ngenze irhubhululo khudlwana ngafumana ilwazi ngo-1914 encwadini ebegade siyifunda le. Ikhuluma ngebhudango ikosi eyaba nalo—ebelimalungana nomuthi omkhulu owaquntwa wabuye wakhula godu namkha into ethi ayifane nalokho.
UThemba: Ya, uqinisile. Isiphorofidweso sitlolwe kuDanyela isahluko 4. Sikhuluma ngebhudango iKosi uNebukadinetsari weBhabhiloni eyaba nalo.
USipho: Kunjalo. Ngisifunde ngasibuyelela kanengi isiphorofidweso. Kodwana eqinisweni, angikabi ukuthola bona sihlangana njani nomBuso kaZimu namkha umnyaka ka-1914.
UThemba: Kuhlekuhle, Sipho, ngitjho nomphorofidi uDanyela bekangakuzwisisi ngokuzeleko lokho aphefumulelwa bona akutlole!
USipho: Utjho njalo?
UThemba: Iye, kuDanyela 12:8, uthi: “Ngezwa kodwana akhange ngizwisise.”
USipho: Okutjho bona akusingimi kwaphela. Lokho kungenza ngizizwe ngcono khulu.
UThemba: Iqiniso likukuthi uDanyela bekangazwisisi ngombana bekungakabi sikhathi sokobana uZimu ambulele abantu bona bazwisise ngokupheleleko iimphorofido ezisencwadini kaDanyela. Kodwana nje, esikhathini sethu, singakghona ukuzizwisisa ngokuzeleko.
USipho: Kubayini utjho njalo?
UThemba: Lalela lokho esikufunda evesini elilandelako. UDanyela 12:9 uthi: “Amezwi la kufuze ahlale ayifihlo abe avalwe ngokugitjwa bekube sikhathi sokuphela.” Yeke iimphorofidwezi zizokuzwisiseka ngokukhamba kwesikhathi, hlangana ‘nesikhathi sokuphela.’ Njengombana sizokucoca ngazo esifundweni sethu seBhayibheli, boke ubufakazi butjengisa bona siphila hlangana nesikhatheso.c
USipho: Yeke, ungangihlathululela isiphorofido sakaDanyela?
UThemba: Ngizokulinga ngawo woke amandlami.
IBHUDANGO LAKANEBUKADINETSARI
UThemba: Kokuthoma, akhe ngikuhlathululele ngokurhunyeziweko lokho iKosi uNebukadinetsari eyakubona ebhudangweni layo. Bese sikhuluma ngalokho elikutjhoko.
USipho: Kulungile.
UThemba: Ebhudangweni, uNebukadinetsari wabona umuthi omkhulu isitlhori sawo sifikelela ezulwini. Wezwa isithunywa sakaZimu silayela bona umuthi uquntwe. Nanyana kunjalo, uZimu wathi imirabhawo esehlabathini iliswe. Ngemva ‘kweenkhathi ezibuyelelwe kalikhomba’ umuthi uzokukhula godu.d Ekuthomeni isiphorofidwesi besimalungana neKosi uNebukadinetsari ngokwakhe. Nanyana bekayikosi eveleleko—njengomuthi owakhula wafikelela ezulwini—waquntwa “iinkhathi ezibuyelelwe kalikhomba.” Uyakhumbula bona kwenzekani?
USipho: Awa, angisakhumbuli.
UThemba: Kulungile. IBhayibheli lithi uNebukadinetsari walahlekelwa mkhumbulwakhe iminyaka elikhomba. Hlangana nesikhatheso, akhenge asabusa njengekosi. Kodwana ekupheleni kweenkhathi ezibuyelelwe kalikhomba, wabuyelwa mkhumbulwakhe, wathoma ukubusa.e
USipho: Bekube nje, ngiyakuzwisisa lokho okutjhoko. Kodwana lokhu kuhlangana njani nomBuso kaZimu kunye nomnyaka ka-1914?
UThemba: Akhe nginabe kancani, isiphorofidwesi sizaliseka kabili. Ukuzaliseka kokuthoma, kwenzeka ngesikhathi ukubusa kweKosi uNebukadinetsari kuthikaziseka. Ukuzaliseka kwesibili kwathikazisa nokubusa kwakaZimu. Yeke, kuzaliseka kwesibili kwesiphorofido okuhlobana nomBuso kaZimu.
USipho: Wazi njani ukuthi ukuzaliseka kwesibili kwesiphorofido ngikho okumalungana nomBuso kaZimu?
UThemba: Kokuthoma, sifumana isibonakaliso esiphorofidwenesi. Ngokuvumelana noDanyela 4:17, isiphorofido sanikelwa ‘ukuze woke ophilako azi bonyana ongoPhezulu unamandla phezu kwemibuso yabantu: Unikela ukubusa kunanyana ngubani amthandako.’ Uwatjhejile amezwi athi, ‘imibuso yabantu’?
USipho: Iye, athi ‘ongoPhezulu unamandla phezu kwemibuso yabantu.’
UThemba: Uqinisile. Ucabanga bona ngubani “ongoPhezulu”?
USipho: Ngicabanga ukuthi nguZimu
UThemba: Uphendule kuhle. Yeke lokho kusitjela bona isiphorofidwesi asisi malungana noNebukadinetsari kwaphela. Sibandakanya ‘nombuso wabantu.’ Begodu lokho kunengqondo, khulukhulu nasiqala umongo wesiphorofidwesi.
USipho: Utjho ukuthini?
UMONGO OYIHLOKO WENCWADI
UThemba: Qobe, incwadi yeBhayibheli kaDanyela iveza isihloko sendaba. Ikhuluma kanengi ngokuhlonywa komBuso kaZimu ngaphasi kokubusa kweNdodanakhe, uJesu. Ngokwesibonelo, akhe sibuyele emuva siphenye izahluko ezimbalwa. Ngibawa ufunde uDanyela 2:44.
USipho: Kulungile. Ithi: “Khona emalangeni wamakhosi lawo, uZimu wezulwini uzakujamisa umbuso ongasoze wapheliswa namkha udluliselwe kabanye abantu. Uzakutshidlha bewuphelise yoke imibuso eminye, kodwana wona uzakujama nini nanini.”
UThemba: Ngiyathokoza. Ucabanga bona iveseli likhuluma ngomBuso kaZimu?
USipho: Hmm. Angiqiniseki.
UThemba: Ok, tjheja bona lithi umBuso lo “uzakujama nini nanini.” Lokhu kuliqiniso ngomBuso kaZimu, kodwana ngekhe sakutjho lokhu ngemibuso yabantu, angithi?
USipho: Iye, khona kunjalo.
UThemba: Nasi esinye isiphorofido encwadini kaDanyela esikhuluma ngomBuso kaZimu. Sitlolwe kuDanyela 7:13, 14. Malungana nengomuso, isiphorofidwesi sithi: “Waphiwa ukubusa, iphazimulo nombuso, ukuze boke abantu, amalimi nezizwe zimlotjhe. Umbuswakhe ngewanini nanini begodu angeze wadlula nobukhosi bakhe bubukhosi obungeze babhujiswa.” Kukhona okuzwakala kujayelekileko esiphorofidwenesi?
USipho: Sikhuluma ngombuso.
UThemba: Uqinisile. Kungasi nanyana ngimuphi umbuso. Phawula bona sithi, umBuso lo uzakuba negunya phezu ‘kwabantu, amalimi nezizwe.’ Ngamanye amezwi, umBuso lo uzokubusa iphasi loke.
USipho: Bengingatjheji bona lokho kutjhiwo mtlolo, kodwana uqinisile.
UThemba: Tjheja godu okhunye okutjhiwo siphorofido: ‘Umbuswayo ngewanini nanini begodu angeze wadlula nobukhosi bayo bubukhosi obungeze babhujiswa’. Uyavuma na bona isiphorofidwesi sifana naleso esisifunde kuDanyela 2:44?
USipho: Iye, siyafana.
UThemba: Akhe sibuyekeze kafitjhazana ebesidemba ngakho bekube nje. Isiphorofido esikuDanyela isahluko 4 satlolwa bona abantu bazi ukuthi ‘ongoPhezulu unamandla phezu kwemibuso yabantu.’ Lokhu kukodwa kutjengisa ukuthi isiphorofidwesi ukuzaliseka kwakhona kukhulu kunaleso esibandakanya uNebukadinetsari. Kiyo yoke incwadi kaDanyela, sifunda ngokuhlonywa komBuso kaZimu ngaphasi kokurhola kweNdodanakhe. Ucabanga bona kunengqondo ukuphetha ngokuthi isiphorofido esikuDanyela isahluko 4 naso sinokuthileko malungana nomBuso kaZimu?
USipho: Ngicabanga njalo. Kodwana angikabi ukuthola ukuthi sihlangana njani no-1914.
“BEKUDLULE IINKHATHI EZIBUYELELWE KALIKHOMBA”
UThemba: Akhe sikhulume godu ngeKosi uNebukadinetsari. Ekuzalisekeni kwesiphorofido bekajanyelwe mumuthi. Ukubusa kwakhe kwathikaziseka lokha nakuquntwa umuthi watjhiywa iinkhathi ezibuyelelwe kalikhomba—okutjho ukulahlekelwa mkhumbulwakhe isikhathi esithileko. Iinkhathi ezibuyelelwe kalikhomba zaphela lokha uNebukadinetsari abuyelwa mkhumbulwakhe, waraga nokubusa. Ekuzalisekeni kwesibili kwesiphorofido, ukuBusa kwakaZimu bekuzokuthikaziseka isikhathi esithileko—kodwana ingasi ngombana uZimu ahlulekile.
USipho: Utjho ukuthini?
UThemba: Eenkhathini zeBhayibheli, amakhosi wakwa-Israyeli abusa eJerusalema bekufuze ahlale “esihlalweni sobukhosi bakaZimu.”f Bewajamela uZimu ekubuseni abantu bakhe. Yeke, ukubusa kwamakhosi lawo bekufanekisela ukubusa kwakaZimu. Nokho, ngokukhamba kwesikhathi, amanengi wamakhosi lawo akhenge amlalela uZimu, nabantu ebebababusa balandela iimbonelo zabo ezimbi. Ngebanga lokungalaleli kwama-Israyeli, uZimu wavumela bona bahlulwe yiBhabhiloni ngomnyaka ka-607. Ukusukela ngesikhatheso kuyaphambili, akhenge kusaba namakhosi ajamele ukubusa kwakaJehova eJerusalema. Ngomqondo loyo, ukubusa kwakaZimu kwathikaziseka. Uyakuzwisisa lokho engikutjhwileko bekube nje?
USipho: Ngicabanga njalo.
UThemba: Yeke umnyaka ka-607 waba kuthoma kweenkhathi ezibuyelelwe kalikhomba, namkha isikhathi lokha ukubusa kwakaZimu kuzokuthikaziseka khona. Ekupheleni kweenkhathi ezibuyelelwe kalikhomba, uZimu bekazokujamisa umbusi omutjha obekazokuba mjamelakhe—kilokhu, bekuzokuba ngewezulwini. Kulapho-ke ezinye iimphorofido esifunde ngazo kuDanyela ebezizokuzaliseka khona. Yeke umbuzo ophakamako uthi: Zaphela nini iinkhathi ezibuyelelwe kalikhomba? Nasingaphendula umbuzo lo, singakghona ukuthola ukuthi umBuso kaZimu wathoma nini ukubusa.
USipho: Ngiyazwisisa. Akhe ngiqagele—iinkhathi ezibuyelelwe kalikhomba zaphela ngo-1914.
UThemba: Uqinisile! Ubethe khona.
USipho: Kodwana sikwazi njani lokho?
UThemba: Hlangana nekonzwakhe ephasini, uJesu waveza ukuthi iinkhathi ezibuyelelwe kalikhomba bezingakapheli.g Yeke kufuze bona bezisikhathi eside. Iinkhathi ezibuyelelwe kalikhomba zathoma eminyakeni emakhulu ngaphambi kokufika kwakaJesu ephasini, begodu zaragela phambili isikhathi esithileko bekwaba kulapho abuyela ezulwini. Khumbula godu bona lokho okutjhiwo ziimphorofido ezikuDanyela bekungakabi ukuzwisiseka bekwaba ‘sikhathi sokuphela.’h Okukarisako kukuthi ekupheleni kweminyaka yabo-1800, abafundi beBhayibheli abathembekileko batjhukumiseleka bona bazihlolisise ngokutjheja iimphorofidwezi. Bafumana umkhanyo wokubona ukuthi iinkhathi ezibuyelelwe kalikhomba bezizokuphela ngomnyaka ka-1914. Izenzakalo ezikulu zephasini zaqinisekisa bona umnyaka ka-1914 mbala bekuwumnyaka wokuthoma kokubusa komBuso kaZimu ezulwini. Bekumnyaka lapho iphasi lathoma khona amalanga wokuphela, namkha isikhathi sokuphela. Manjesi ngiyazi bona leli lilwazi elitjha kuwe ongacabanga ngalo . . .
USipho: Iye. Nakanjani ngizoyifunda godu khona ngizoyizwisisa kuhle.
UThemba: Ungatshwenyeki. Nami kungithathe isikhathi eside ukuzwisisa iimphorofidwezi nokuzaliseka kwazo. Kodwana okunganani, ngithemba bona ingcocwethu ikusizile wabona ukuthi aboFakazi bakaJehova basekela iimfundiso zabo ezimalungana nomBuso eBhayibhelini.
USipho: Uqinisile, uyazi iyangikara indlela osekela ngayo iinkolelo zakho eBhayibhelini.
UThemba: Nami ngiyabona ukuthi nawe unesifiso esifanako. Njengombana ngitjhwile, leli lilwazi elitjha nelinabileko kuwe bona ungacabanga ngalo ngasikhathi sinye. Kungenzeka useseneminye imibuzo. Ngokwesibonelo, sifundile ukuthi iinkhathi ezibuyelwe kalikhomba zihlobana njani nomBuso kaZimu nokuthi zathoma ngomnyaka ka-607. Kodwana sazi njani ukuthi iinkhathi ezibuyelelwe kalikhomba zaphela ngo-1914?i
USipho: Iye, yazi nami bengizibuza ngalokho.
UThemba: IBhayibheli ngokwalo liyasisiza sibone ngokunqophileko ubude beenkhathi ezibuyelelwe kalikhomba. Ungakuthabela bona sicoce ngesihlokweso ngokuzako na?j
USipho: Ngingakuthabela lokho.
Kghani kunendaba ethileko yeBhayibheli ozibuza ngayo? Uyafuna ukwazi ngananyana ngiyiphi yeenkolelo namtjhana izinto ezenziwa boFakazi bakaJehova? Nengabe kunjalo, ungazazi ukubawa omunye waboFakazi bakaJehova. Uzokuthabela ukucoca nawe ngeendaba ezinjalo.
a Ngehlelo labo lokufunda nabantu iBhayibheli simahla emakhaya, aboFakazi bakaJehova bacoca nabomakhelwana ngeenhloko zeBhayibheli.
c Qala isahluko 9 sencwadi ethi, Khuyini Kwamambala Okufundiswa YiBhayibhili?egadangiswa boFakazi bakaJehova. Iyafumaneka naku-Inthanethi ku-www.jw.org.
g Esiphorofidweni sakhe malungana namalanga wokuphela, uJesu wathi: “IJerusalema [ejamele ukubusa kwakaZimu] izakugadangelwa phasi ngabatjhili kufikela lapha isikhathi sabo siphela khona.” (Lukasi 21:24) Yeke ukuthikaziseka kobubusi bakaZimu bekulokhu kukhona esikhathini sakaJesu begodu kuzokuragela phambili bekube malanga wokuphela.
i Qala amakhasi 215-218 encwadini ethi Khuyini Kwamambala Okufundiswa YiBhayibhili? Iyafumaneka naku-Inthanethi ku-www.jw.org.
j Esihlokweni esilandelako esimlandelande sizococa ngamavesi weBhayibheli asikhanyisela ngobude beenkhathi ezibuyelelwe kalikhomba.
-
-
UmBuso KaZimu Wathoma Nini Ukubusa? (Ingcenye 2)IsiThala—2015 | Janabari 1
-
-
INGCOCO NOMAKHELWANA
UmBuso KaZimu Wathoma Nini Ukubusa?—INGCENYE 2
Okulandelako yingcoco omunye waboFakazi bakaJehova angaba nayo nomakhelwana. Akhe sithi uFakazi ibizo lakhe elinguThemba ubuyela emzini wendoda ibizo layo linguSipho.
UKUBUYEKEZA KAFITJHANI—IBHUDANGO LAKANEBUKADINETSARI
UThemba: Ngiyathaba ukukubona godu, Sipho. Siyangithabisa isifundo sethu seBhayibheli saqobe veke.a Wasala njani?
USipho: Ngasala kuhle, ngiyathokoza.
UThemba: Kuyangithabisa ukuzwa lokho. Ukugcina kwami la, sakhuluma ngokuthi kubayini aboFakazi bakaJehova bathi umBuso kaZimu wathoma ukubusa ngo-1914.b Njengombana sacoca, ingcenye eyihloko yobufakazi sayifumana esiphorofidweni sencwadi yeBhayibheli kaDanyela isahluko 4. Usakhumbula ukuthi sithini isahlukwesi?
USipho: Sikhuluma ngebhudango leKosi uNebukadinetsari malungana nomuthi omkhulu.
UThemba: Yazi uqinisile. Ebhudangweni lakhe, uNebukadinetsari wabona umuthi omkhulu owafikelela ezulwini. Wezwa ingilozi kaZimu ilayela bona umuthi uquntwe, kodwana isiphunzi nemirabhaso kufuze kuliswe ehlabathini. Ngemva ‘kweenkhathi ezibuyelelwe kalikhomba,’ umuthi uzokumila godu.c Sabuye sacoca ngokuthi kubayini isiphorofidwesi sinokuzaliseka okukabili. Usakhumbula ukuthi ukuzaliseka kokuthoma bekuyini?
USipho: Bekuyinto eyenzeka kuNebukadinetsari ngokwakhe, angithi? Walahlekelwa mkhumbulwakhe iminyaka elikhomba.
UThemba: Ubethe khona. UNebukadinetsari walahlekelwa umkhumbulwakhe kwesikhatjhana, ukubusa kwakhe kwathikaziseka. Kodwana ekuzalisekeni okukhulu kwesiphorofido, ukubusa kwakaZimu nakho bekuzokuthikaziseka iinkhathi ezibuyelelwe kalikhomba. Njengombana sibonile, iinkhathi ezibuyelelwe kalikhomba zathoma lokha iJerusalema nelitjhatjalaliswako ngomnyaka ka-607. Kusukela ngesikhatheso, ukuya phambili, akhenge kusaba namakhosi ephasini ebekajamele uJehova uZimu ekubuseni abantu bakhe. Nanyana kunjalo, ekupheleni kweenkhathi ezibuyelelwe kalikhomba, uZimu bekazokukhetha uMbusi omutjha obekazokubusa abantu bakhe—othileko wezulwini. Ngamanye amezwi, ukuphela kweenkhathi ezibuyelelwe kalikhomba bekuzokutjho ukuthoma kokubusa komBuso kaZimu wezulwini. Nje-ke, sesicocile ngokuthi iinkhathi ezibuyelelwe kalikhomba zathoma nini. Nesingazi ukuthi zathatha isikhathi eside kangangani, sizokwazi nokuthi umBuso kaZimu wathoma nini ukubusa. Sisakhambisana bekube nje?
USipho: Kuyazwakala, ukubuyekezokhu kungikhumbuze esacoca ngakho.
UThemba: Kuhle lokho. Akhe sithome ingcocwethu, sihlole ubude beenkhathi ezibuyelelwe kalikhomba. Sengiqedile ukufunda isihlokwesi bona ngizikhumbuze amaphuzu ayihloko. Ngizokulinga ukuwahlathulula ngendlela engingakghona ngayo.
USipho: Kulungile.
KUPHELA IINKHATHI EZIBUYELELWE KALIKHOMBA—KUTHOMA IMIHLA YOKUPHELA
UThemba: Ukuzaliseka kokuthoma kwesiphorofido ebekubandanyaka uNebukadinetsari, kwenza kukhanye ukuthi iinkhathi ezibuyelelwe kalikhomba bezijamele iminyaka yamambala. Kodwana ekuzalisekeni okukhulu okubandakanya umBuso kaZimu, iinkhathi ezibuyelelwe kalikhomba kufuze bona zide khulu kuneminyaka yamambala elikhomba.
USipho: Kubayini utjho njalo?
UThemba: Okhunye, khumbula ukuthi iinkhathi ezibuyelelwe kalikhomba zathoma iJerusalema nelitjhatjalaliswako ngomnyaka ka-607. Nesithoma ukubala kusukela ngomnyaka loyo, iminyaka elikhomba yamambala izosisa emnyakeni ka-600. Kodwana akukho okuphawulekako okwenzeka emnyakeni loyo malungana nokubusa kombuso kaZimu. Ngaphandle kwalokho, njengombana sicocile ngaphambilini, emakhulwini weminyaka uJesu nekasesesephasini, waveza ukuthi iinkhathi ezibuyelelwe kalikhomba azikakabi ukuphela.
USipho: Oh, sengiyakhumbula nje.
UThemba: Ngalokho, kunokobana kube minyaka yamambala, kufuze bona iinkhathi ezibuyelelwe kalikhomba zijamele ubude besikhathi.
USipho: Isikhathi eside kangangani?
UThemba: Incwadi yeBhayibheli yesAmbulo, ihlobana khulu nencwadi kaDanyela, isisiza ukuthi sibone ngokunqophileko bona iinkhathi ezibuyelelwe kalikhomba zide kangangani. Zitjengisa ubude besikhathi esibuyelelwe kathathu nesiqunto ezilingana namalanga ayi-1 260.d Yeke, iinkhathi ezibuyelelwe kalikhomba—zibuyelela kabili isilinganiso seenkhathi ezintathu nesiquntu—zizokulingana namalanga ayi-2 520. Sisakhambisana mus?
USipho: Iye, ngiyakuzwa. Kodwana angiboni ukuthi kuvela njani bona umBuso kaZimu wathoma ukubusa ngo-1914.
UThemba: Kulungile, akhesibone ukuthi singakghona na ukuhlobanisa. Ngasikhathi esiphorofidweni seBhayibheli, ilanga lifanekisela umnyaka.e Nengabe sisebenzisa umthetho welanga enyakeni, iinkhathi ezibuyelelwe kalikhomba zizokulingana neminyaka eyi-2 520. Nesibala ukuya phambili sisuka emnyakeni ka-607, iminyaka eyi-2 520 isiletha ku-1914.f Kungendlela leyo esifike ngayo ku-1914 okumnyaka okwaphela ngawo iinkhathi ezibuyelelwe kalikhomba, nekwathoma ngawo ukubusa kwakaJesu njengeKosi yomBuso kaZimu. Okuphawulekako, kukuthi kusukela ngo-1914, izenzakalo ezikulu zephasi zenzekile—okuzizenzakalo iBhayibheli eyabikezela ngazo malungana nemihla yokuphela.
USipho: Mhlobo bani wezenzakalo?
UThemba: Cabanga ngalokho uJesu akutjho, njengombana kutlolwe kuMatewu 24:7. Malungana nesikhathi azokuthoma ngaso ukubusa ezulwini, uJesu wathi: “Isizwe sizakuvukela isizwe nombuso uvukele umbuso. Kuzakuba khona indlala nokusikinyeka kwephasi eendaweni ezihlukahlukeneko.” Tjheja bona uJesu wabikezela ngendlala nangokusikinyeka kwephasi hlangana nesikhatheso. Kwamambala iphasi lethu selibone imihlobohlobo eminengi yemiraro emakhulwini weminyaka edlulileko, akusinjalo?
USipho: Kunjalo.
UThemba: Evesineli, uJesu wabikezela nangezipi ngesikhathi sokuba kwakhe yiKosi yomBuso kaZimu. Incwadi yeBhayibheli yesAmbulo yabikezela ingasi ngezipi ezenzeka endaweni ethileko kwaphela, kodwana ngezipi ezizokuthinta iphasi loke hlangana nesikhathi sokuphela.g Usakhumbula ukuthi ipi yephasi yokuthoma yathoma nini?
USipho: Umnyaka loyo bekungu-1914, okumnyaka ofanako uJesu athoma ngawo ukubusa! Azange ngicabange ngokufana okunjalo ngaphambilini.
UThemba: Nesihlanganisa yoke imininingwana le—isiphorofido esimalungana neenkhathi ezibuyelelwe kalikhomba kuhlanganise nezinye iimphorofido eziphathelene nokuphela kwesikhathi—kunengqondo lokho. AboFakazi bakaJehova bayakholelwa ukuthi uJesu wathoma ukubusa njengeKosi yomBuso kaZimu ngo-1914, nemihla yokuphela yathoma ngomnyaka loyo.h
USipho: Ngilinga ukuzwisiswa.
UThemba: Kuzwakala kuhle. Njengombana khengatjho ngaphambilini, kungithethe isikhathi ukuzwisisa ngokuzeleko. Kodwana ngiyathemba ukuthi kancani sewubonile, ngithemba nokuthi ingcocwethu ikusizile wabona ukuthi nanyana umnyaka ka-1914 ungaveli eBhayibhelini ngokukhethekileko, aboFakazi bakaJehova basekela iinkolelo zabo ngomnyaka loyo emiTlolweni.
USipho: Yazi indlela enisekela ngayo iimfundiso zenu emitlolweni iyangikara. Anifundisi iimbonwenu. Nokho, ngiyazibuza ukuthi kubayini lokho kubudisi kangaka. Kubayini uZimu angakhenge asitjele eBhayibhelini ukuthi u-1914 uzokuba mnyaka uJesu azokuthoma ukubusa ngawo ezulwini?
UThemba: Mbuzo omuhle khulu loyo, Sipho. Eqinisweni, kunezinto ezinengi ezingakabekwa ebaleni emiTlolweni. Manjesi, kubayini uZimu avumele bona iBhayibheli litlolwe ngendlela yokobana abantu kube budisi ukulizwisisa? Mhlamunye singacoca ngalokhu ngokuzako.
USipho: Ngingakuthabela lokho.
Kghani kunendaba ethileko yeBhayibheli ozibuza ngayo? Uyafuna ukwazi ngananyana ngiyiphi yeenkolelo namtjhana izinto ezenziwa boFakazi bakaJehova? Nengabe kunjalo, ungazazi ukubawa omunye waboFakazi bakaJehova. Uzokuthabela ukucoca nawe ngeendaba ezinjalo.
a Ngehlelo labo lokufunda nabantu iBhayibheli simahla, aboFakazi bakaJehova bacoca nabomakhelwana ngeenhloko zeBhayibheli.
b Qala isihloko esithi, “Ingcoco Nomakhelwana—UmBuso KaZimu Wathoma Nini Ukubusa?—Ingcenye 1” ku-siThala sakaNovemba-Disemba, 2014.
c Qala uDanyela 4:23-25.
d Qala IsAmbulo 12:6, 14.
e Qala uNumeri 14:34; noHezekiyeli 4:6.
f Qala itjhadi elithi, “Ibhudango LakaNebukadinetsari Lomuthi.”
g Qala IsAmbulo 6:4.
h Qala isahluko 9 sencwadi ethi, Khuyini Kwamambala Okufundiswa YiBhayibhili? egadangiswa boFakazi bakaJehova. Ifumaneka ku-www.jw.org/nr.
-