Indaba 8
Abantu Abade Naba Namandla Amakhulu
KHESITHI kunomuntu ozangakuwe, mude khulu ngendlela erarako, gade uzokucabangani ngaye? Bewuzokuthi yikakaramba! Kukhe kwaba nabantu abade nabanamandla ephasini. IBhayibhili isitjela bonyana aboyise bebaziingilozi. Kodwana kungenzeka njani lokho?
Khumbula, ingilozi uSathana bekabangela imiraro. Bekalinga nokwenza iingilozi zakaZimu bonyana zenze izinto ezingakalungi. Ngokukhamba kwesikhathi, ezinye iingilozi zathoma ukumlalela uSathana. Zawulisa umberego uZimu agade azinikele wona ezulwini. Begodu zeza la ephasini zatjhentjha iimzimbazo yaba njengeyabantu. Uyazi bonyana kubayini?
IBhayibhili isitjela bonyana amadodana kaZimu la abona abafazi abahle ephasini begodu afuna ukuzithathela bona. Ngalokho eza ephasini atjhada nabafazabo. IBhayibhili ithi lokho bekungakalungi ngombana uZimu wadala iingilozi bonyana ziphile ezulwini.
Lokha iingilozi neziba nabantwana nabafazi bazo, abantwanaba gade bangakajayeleki. Ekuthomeni bebabonakala banganawo umraro. Kodwana bakhula baba bakhulu khulu, baba namandla khulu bebaba ziinkakaramba.
Iinkakarambezi bezingakalungi. Bezilimaza abantu ngombana bezizikulu begodu zinamandla. Zalinga nokukatelela abanye bona benze izinto ezingakalungi njengazo.
U-Enoke gade sele afile, kodwana bekunomuntu oyedwa oseleko olungileko ephasini. Ibizo lakhe linguNuwa. Ngaso soke isikhathi bekenza lokho uZimu akufunako.
Langelinye uZimu watjela uNuwa bonyana sesifikile isikhathi sokutjhabalalisa boke abantu abangakalungi. Kodwana uZimu bekazokubulunga uNuwa, umndenakhe begodu nenengi lezinye iinlwana. Akhe sibone bonyana uZimu wakwenza njani lokho.