Bangaki aboFakazi BakaJehova obaziko? Abanye bethu kungenzeka bomakhekhelwana bakho, abantu osebenza nabo, namkha ofunda nabo. Namtjhana kungenzeka khesacoca nawe ngeBhayibhili. Kuhle kuhle sibobani, begodu kubayini sikhuluma nabantu ngeBhayibhili?

Sibabantu abajayelekileko. Sivela eendaweni nemiphakathini engafani. Abanye bethu khebaba semasondweni ahlukahlukeneko, kululapho abanye bangazange bakholelwe kuZimu. Nanyana kunjalo, ngaphambi kobana sibe boFakazi, sithethe isikhathi eside sihlolisisa lokho iBhayibhili ekufundisako. (IZenzo 17:​11) Savumelana nalokho esikufundileko, ngemva kwalokho sathatha isiqunto sokukhulekela uJehova uZimu.

Siyazuza ngokufunda iBhayibhili. Njengabo boke abantu, kufuze siqalane nemiraro nokusilela kwethu. Ngokulinga ukusebenzisa iinkambisolawulo zeBhayibhili ekuphileni kwethu kwaqobe, sibone ituthuko ekulu ekuphileni kwethu okuyigugu. (IRhalani 128:​1, 2) Leli ngelinye lamabanga asenza sabelane nabanye izinto ezihle esizifunde eBhayibhilini.

Siphila ngeenkambisolawulo zakaZimu. Njengombana zitjengiswe eBhayibhilini, iinkambisolawulwezo zisisiza bona sithuthukise ihlalakuhle nokuhlonipha abanye, kubandakanye nezinye iimfanelo ezinjengokuthembeka nokuba nomusa. Zidlala indima ekuthuthukeni kwamalunga wehlangano, godu zithuthukisa nobunye bomndeni nokuziphatha. Njengombana siqiniseka bona “uZimu uphatha boke abantu ngokulingana,” nathi siziqala njengamalunga angokomoya wobuzalwana bephasi loke begodu asibandlululani. Nanyana sibabantu abajayelekileko, godu sibuye sibe babantu abahluke khulu.​—⁠IZenzo 4:​13; 10:​34, 35.

• AboFakazi BakaJehova bafana ngani nabanye abantu?

• Ngiliphi igugu aboFakazi abalifumana ngokufunda iBhayibhili?

Abantu abanengi bacabanga ukuthi aboFakazi BakaJehova bayikolo etja. Nokho, ngaphezu kweminyaka eyi-⁠2 700 egadungileko, iinceku zakaZimu weqiniso bezibizwa ngokuthi “boFakazi.” (Isaya 43:​10-12) Besisolo saziwa ngothi sibaFundi BeBhayibhili bekwaba ngu-1931. Kubayini sakhetha ukubizwa ngokuthi siboFakazi BakaJehova?

Ibizweli lihlathulula uZimu esimkhonzako. Ngokuya ngokwemitlolo yekadeni, ibizo lakaZimu elithi Jehova, livela iinkhathi ezingaphezu kweenkulungwana ezilikhomba eBhayibhilini. Ematjhugululweni amanengi weBhayibhili, ibizweli lajanyiselwa ngezinye iziqu ezinjengezithi, iKosi namkha uZimu. Yeke, uZimu weqiniso wazembula kuMosisi ngebizo lakhe elithi Jehova, wathi: “Leli libizo lami bekube nini nanini.” (Eksodosi 3:​15) Ngendlela le, wazihlukanisa kibo boke aboZimu bamala. Siyazikhakhazisa ngokuphatha ibizo lakaZimu elicwengileko.

Ibizweli lihlathula umsebenzethu. Umlando wabantu bekadeni, kusukela endodeni elungileko u-⁠Abela, wanikela ubufakazi ngekholo labo kuJehova. Ngokukhamba kwamakhulu weemnyaka, uNuwa, u-⁠Abrahama, uSara, uMosisi, uDavidi nabanye bahlanganyela ‘nesiqubuthu esikhulu sabofakazi.’ (Hebheru 11:⁠4–12:⁠1) Njengombana umuntu anganikela ubufakazi ekhotho ngomunye umuntu onganamlandu, sizimisele ukwenza iqiniso laziwe ngoZimu esimkhonzako.

Silingisa uJesu. IBhayibhili imbiza ngokuthi ‘ngufakazi othembekileko noqinisileko.’ (ISambulo 3:​14) UJesu ngokwakhe wathi ‘wenze ibizo lakaZimu laziwa’ begodu ‘uzele nokuzokukhuluma iqiniso’ ngoZimu. (Jwanisi 17:​26; 18:​37) Yeke, abalandeli bakaKrestu bamambala kufuze baliphathe bebalenze laziwe ibizo lakaJehova. Lokhu ngilokho aboFakazi BakaJehova abalinga ngamandla ukukwenza.

• Kubayini abaFundi BeBhayibhili bakhetha ibizo elithi aboFakazi BakaJehova?

• Sekusikhathi esingangani uJehova anabofakazi ephasini?

• Ngubani uFakazi kaJehova omkhulu kunabo boke?

IBhayibhili yabikezela ukuthi ngemva kokufa kwakaKrestu, kuzokuvela abafundisi bamala hlangana namaKrestu wekadeni bese batjharaganisa iqiniso leBhayibhili. (IZenzo 20:​29, 30) Ngokukhamba kwesikhathi, ngilokho kanye okwenzeka. Bavanga iimfundiso zakaJesu neembono yabo yekolo yoburhedeni, ngemva kwalokho kwaba namaKrestu wobuzenzisi. (2 Thimothi 4:​3, 4) Singaqiniseka njani bona namhlanjesi sikuzwisisa kuhle lokho kwamambala okufundiswa yiBhayibhili?

Kwafika isikhathi sokobana uJehova ambule iqiniso. Wabikezela bona ‘hlangana nesikhathi sokuphela, ilwazi leqiniso lizokuba yinala.’ (Danyela 12:⁠4) Ngo-1870, isiqhenyana salabo egade bafuna iqiniso salemuka bona iimfundiso zamasondo bezingakasekelwa eBhayibhilini. Ngalokho, bathoma ukwenza irhubhululo lokuzwisisa iimfundiso zamambala zalokho okufundiswa yiBhayibhili, begodu uJehova wababusisa ngelemuko leemtlolo.

Amadoda athembekileko ayihlolisisa ngokuyelela iBhayibhili. AbaFundi BeBhayibhili abathembekilekwabo, ababakhambeli phambili bethu, bakhuthalela indlela yokufunda nathi esiyisebenzisako namhlanjesi. Badembamba isihloko ngasinye seBhayibhili. Nebahlangabezana neMitlolo ebudisi ukuyizwisisa, baqala eminye imitlolo bona ibatlhadlhule. Nebafinyelela isiphetho esivumelana nayo yoke iMitlolo, bebakutlola phasi lokho abakufumeneko. Ngokuvumela iBhayibhili bona izikhulumele, bafumana amaqiniso ngebizo lakaZimu nangoMbuso wakhe, umnqopho ngabantu nangephasi, ubujamo babantu abahlongakeleko kunye nethemba levuko. Irhubhululo labo labatjhaphulula eemfundisweni nezenzweni zamala.​—⁠Jwanisi 8:​31, 32.

Ngo-1879 abaFundi BeBhayibhili balemuka bona sekusikhathi sokwenza iqiniso laziwe. Ngomnyaka loyo, bathoma ukukhipha umagazini we-Sithalasokulinda Esazisa NgoMbuso KaJehova osaragela phambili ukhitjhwa nanamhlanjesi. Kwanje, sikhulumisana nabantu ngeBhayibhili eenarheni ezingaphezu kwama-230, ngeenlimi ezingaphezu kwama-600. Kuyathoma emlandweni bona ilwazi leqiniso lirhatjheke kangaka!

• Ngemva kokufa kwakaKrestu, kwenzekani ngeqiniso leBhayibhili?

• Khuyini okwasisiza bona sifumane iqiniso eLizwini lakaZimu?

Sekumatjhumi weminyaka, aboFakazi BakaJehova basebenzisa amaBhayibhili ahlukahlukeneko. Kodwana sabona itlhogeko yokukhipha itjhugululo etja yeBhayibhili ezokufundeka lula nezokusiza abantu bafunde “ilwazi elinembileko leqiniso,” okuyintando kaZimu ngabo boke. (1 KuThimothi 2:​3, 4, NW.) Yeke, ngo-1950, sathoma ukugadangisa iingcenye zeBhayibhili, i-⁠New World Translation ngelimi lanamhlanjesi. IBhayibhili le itjhugululelwe eenlimini ezingaphezu kwe-100, ngokuthembeka nangokunembileko.

Bekutlhogeka iBhayibhili ezwisiseka bulula. ­Njengombana isikhathi sikhamba, iinlimi ziyatjhentjha begodu neemBhayibhili ezinengi ezitjhugululiweko zimumethe amagama abudisi nangasasetjenziswa, okwenza bona kube budisi ukuwazwisisa. Godu, kwafunyanwa neminengi yemitlolo yesandla yekadeni enembileko, efana khulu neyekuthomeni, okwaphumela elwazini elingcono leMitlolo yesiHebheru, isi-Aramu nesiGirigi.

Bekutlhogeka itjhugululo evumelana neLizwi lakaZimu. Kunokobana bafakelele imibono yabo elizwini eliphefumulelweko, abatjhugululi beBhayibhili kufuze bathembeke kilokho abakutjhugululako. Nokho, kwamanengi wamaBhayibhili, ibizo lakaZimu, uJehova, alisetjenziswa eMitlolweni eCwengileko.

Bekutlhogeka iBhayibhili ezokuletha idumo kuMitloli wayo. (2 Samuweli 23:⁠2) Ku-New World Translation, ibizo lakaJehova labuyiselwa endaweni yalo, okukulapho livela khona iinkhathi ezingaba zi-⁠7 000, eBhayibhilini yekadeni ebeyitlolwe ngesandla, njengombana kutjengiswe ngenzasi. (IRhalani 83:​18) Njengombana iBhayibhili le imphumela weminyaka eminengi yokurhubhulula ngokuzimisela, kuyathabisa ukuyifunda ngombana iwudlulisela kuhle umcabango kaZimu. Kungakhathaliseki bona une-New World Translation ngelimi lakho namtjhana awa, sikukhuthaza bona ukwenze umukghwa waqobe langa ukufunda iLizwi lakaJehova.​—⁠Joshuwa 1:⁠8; IRhalani 1:​2, 3.

• Kubayini saqunta bona kube netjhugululo etja yeBhayibhili?

• Khuyini okufuze kwenziwe ngilabo abakhanuka ukwazi intando kaZimu?