Akunabafundisi ababhadalwako ehlanganweni yethu. Kunalokho, njengombana bekunjalo nangesikhathi kuthonywa ibandla lobuKrestu, nanamhlanjesi kubekwa ababonisi abafanelekako bona “beluse ibandla lakaZimu.” (IZenzo 20:​28) Abadalaba bamadoda avuthiweko ngokomoya adosa phambili ekuluseni ibandla, “ingasi ngokugandelelwa, kodwana ngetjisakalo yokuzinikela.” (1 Pitrosi 5:​1-⁠3) Ngimuphi umsebenzi abasisiza ngawo?

Bayasitlhogomela begodu bayasitjheja. Abadala bayanqophisa begodu basize ekutlhogomeleni ibandla ngokomoya. Ngokulemuka bona uZimu ubaphathise emsebenzi oqakathekileko lo, abadala ababalawuli abantu bakaZimu, kunalokho batlhogomela ihlala-kuhle kunye nethabo lethu. (2 Korinte 1:​24) Ngendlela umelusi atlhogomela kuhle ngayo imvu ngayinye, abadala balinga ukwazi ilunga ngalinye lebandla.​—⁠Iziyema 27:⁠23.

Basifundisa indlela yokwenza intando kaZimu. Qobe veke, abadala badosa phambili ekunikeleni iinkulumo emihlanganweni yebandla ukuqinisa ikholo lethu. (IZenzo 15:​32) Amadoda azimiseleko la godu adosa phambili emsebenzini wokutjhumayela, asebenza nathi be asibandule kizo zoke iingcenye zekonzo.

Bayasikhuthaza. Ukwenzela bona batlhogomele ingokomoya lomuntu mathupha, abadala bebandla bangasivakatjhela emakhaya wethu namkha eWolweni LoMbuso bona banikele ngesizo nenduduzo evela eMitlolweni.​—⁠Jakobosi 5:​14, 15.

Ngaphandle kwemisebenzi yabo yebandleni, abadala abanengi nabo banomsebenzi wokuziphilisa nemithwalo yemindeni etlhoga isikhathi sabo. Abazalwana abasebenza budisaba kuyafaneleka bona sibahloniphe.​—⁠1 Tesalonika 5:​12, 13.

• Abadala badlala yiphi indima ebandleni?

• Abadala bayibonisa njani ikareko emuntwini ngamunye?

IBhayibhili ihlathulula iinqhema eembili zamadoda amaKrestu atjheja imithwalo yefanelo yebandla​—⁠“ababonisi neenceku ezikhonzako.” (Filipi 1:⁠1, NW) Ngokujayelekileko, kunabadala neenceku ezikhonzako ezimbalwa abakhonza ebandleni ngalinye. Ngimiphi imisebenzi esizuzisako eyenziwa ziinceku ezikhonzako?

Zisiza isihlopha sabadala. Iinceku ezikhonzako zimadoda angokomoya, ziyathembeka, zizimisele, kungakhathaliseki bona zisesezitjha namkha sezikhulile. Zitjheja umsebenzi wangamalanga oqakathekileko wokuhlela izinto, kunye nemisebenzi yezandla okufuze itlhogonyelwe ebandleni. Lokhu kusiza abadala babe nesikhathi esaneleko sokutjheja umsebenzi wokufundisa nemithwalo yokwelusa.

Zinikela isizo elisebenzako. Ezinye iinceku ezikhonzako zabelwa bona zibebalindi njengokwamukela boke abeza emihlanganweni yebandla. Ezinye zingatjheja amathulusi womdumo (sound), ukwabiwa kweencwadi, iimali zebandla, nokwabiwa kweendawo amalunga webandla afakaza kizo. Ziyasiza nekutlhogomeleni iWolo LoMbuso. Abadala bangazibawa bona zisize esele bakhulile. Iinceku ezikhonzako zizimisele ukwenza nanyana ngisiphi isabelo ezinikelwa sona, begodu ibandla liyazihlonipha ngomsebenzi obudisi eziwenzako nangokuba nomoya wokuzinikela.​—⁠1 Thimothi 3:⁠13.

Zibeka isibonelo njengamadoda amaKrestu. Iinceku ezikhonzako zikhethwa ngokuba neemfanelo ezihle ezingokomoya. Nazibeka iinkulumo ebandleni, ziqinisa ikholo lethu. Ngokubeka isibonelo esihle emsebenzini wokutjhumayela, zisisiza sitjhiseke. Ngokubambisana kuhle nesihlopha sabadala, zithuthukisa ithabo nebumbano. (Efesu 4:​16) Ngokukhamba kwesikhathi nazo zingakufanelekela ukukhonza njengabadala.

• Zimadoda anjani iinceku ezikhonzako?

• Iinceku ezikhonzako zilisiza njani ibandla bona lisebenze kuhle?

IMitlolo yamaKrestu yesiGirigi kanengi ikhuluma ngoBhanabhasi nompostoli uPowula. Amadoda la bekakhonza njengababonisi abakhamba bavakatjhela amabandla wekadeni. Kubayini bebenza njalo? Bebatshwenyeka khulu ngehlalakuhle yabazalwana babo abangokomoya. UPowula wathi bekafuna ‘ukubuyela emva ayokuthekela abazalwana,’ athole bona bavuka njani. Bekakulungele ukukhamba amakhilomitha amanengi bona ayokuqinisa abanakwabo. (IZenzo 15:​36) Namhlanjesi ababonisi abakhambako banesifiso esifanako.

Bayasikhuthaza. Umbonisi wesifunda ukweriyela amabandla angaba ma-20, uhlala isikhathi esingangeveke nebandla ngalinye, kabili ngomnyaka. Umbonisi wesigodi ukhambela iimfunda ezingaba litjhumi namkha ngaphezulu, ukweriyela amabandla begodu ukhonza njengosihlalo emhlanganweni wesifunda ngamunye, kanye ngomnyaka. Singazuza okunengi ebazalwanenaba abanokuhlangabezanwe nakho begodu nengabe batjhadile sizuze nebafazini babo. Bazimisele ukwazi abatjha nabadala, begodu bazimisele ukubanathi ekonzweni yesimini neemfundweni zethu zeBhayibhili. Ababonisaba benza ukukhambela kokwelusa nabadala, begodu bayasiqinisa, banikela iinkulumo ezikhuthazako emihlanganweni yesigodi neyesifunda.​—⁠IZenzo 15:⁠35.

Batjengisa ikareko kibo boke. Ababonisi abakhambako banetjisakalo khulu engokomoyeni lamabandla. Bahlangana nabadala neenceku ezikhonzako ukubuyekeza ituthuko eyenziweko begodu babanikele isizo elisebenzako ekutlhogomeleni imithwalo yabo. Basiza amaphayona aphumelele ekonzweni yawo, bathabela nokwazi abantu abatjha abazihlanganisa nathi nokuzwa bona ikhamba njani ituthuko yabo engokomoya. Omunye nomunye wabazalwanaba uzinikela ngokutjhaphulukileko njengalabo ‘esibambisene nabo emsebenzini lo.’ (2 Korinte 8:​23) Kufuze silingise ikholo labo nokuzinikela kwabo kuZimu.​—⁠Hebheru 13:⁠7.

• Kubayini ababonisi abakhambako bakweriyela amabandla?

• Ungazuza njani ekukhanjelweni ngibo?

Nakuvela ihlekelele, ngokurhabako aboFakazi BakaJehova babanelungiselelo lokusiza abazalwana abaqalene nehlekelele. Imizamo enjalo itjengisa ithando lethu elidephileko ngomunye nomunye. (Jwanisi 13:​34, 35; 1 Jwanisi 3:​17, 18) Sisiza ngaziphi iindlela?

Sinikela ngeemali. Nakuvela ihlekelele ekulu eJudiya, amaKrestu wekadeni e-⁠Antiyokiya athumela imali yokusiza abanakwabo abangokomoya. (IZenzo 11:​27-30) Ngokufanako, nasizwa bona abanakwethu kwezinye iingcenye zephasi baqalene nobudisi, sithumela umnikelo ngelungiselelo lebandla bona kuthunyelwe izinto kilabo abaqalene nobudisi.​—⁠2 Korinte 8:​13-⁠15.

Sinikela isizo elisebenzako. Abadala abasendaweni eqalene nehlekelele bafuna amalungu webandla ngalinye ukuqiniseka bona woke umuntu ufunyenwe begodu uphephile. Ikomidi yokuhlangula ingadosa phambili ekukhipheni ukudla, amanzi ahlwengileko, izembatho, indawo yokuhlala, nesizo lezokwelapha. AboFakazi abanengi abanekghono elitlhogekako baya ngokuzithandela endaweni enjalo ngeemali zabo, banikele isizo namkha balungise imizi emotjhekileko namaWolo woMbuso. Ubunye esibuthabelako njengehlangano nokuhlangabezanwe nakho esikufumeneko nesisebenza ndawonye, kusisiza bona sithole isizo neensebenzi ezitlhogekako. Ngitjho namtjhana sisiza ‘khulukhulu kilabo esikholwa nabo,’ siyabasiza nabanye nengabe kubizela bona senze njalo, kungakhathaliseki bona bakuyiphi ikolo.​—⁠ Galatiya 6:⁠10.

Sinikela isizo elingokomoya nelingokwamazizo. Abantu abavelelwe yihlekele kanengi batlhoga induduzo. Eenkhathini ezifana nalezi, sithola amandla kuJehova, “uZimu okuvela kuye yoke induduzo.” (2 Korinte 1:​3, 4) Siyakuthabela ukuhlanganyela iinthembiso zeBhayibhili nalabo abaqalene nehlekelele, sibanikela nesiqinisekiso sokobana uMbuso kaZimu uzokuqeda yoke imiraro esibangela ubuhlungu nokutshwenyeka.​—⁠ISambulo 21:⁠4.

• Kubayini aboFakazi BakaJehova basabela msinyana nakwenzeka ihlekelele?

• Ngiyiphi induduzo engokomoya esingayihlanganyela nalabo abasindileko?

Msinyana ngaphambi kokuhlongakala kwakhe, uJesu wakhuluma nabafundi bakhe abane ngerhorhomejeni​—⁠uPitrosi, uJakobosi, uJwanisi, no-Andrisi. Njengombana uJesu abikezela ngetshwayo lokuba khona kwakhe ngemihla yokuphela, wabuza umbuzo oqakatheke khulu othi: ‘Ngubani inceku ethembekileko nehlakaniphileko, ikosi yayo eyibeke bona inikele ezinye ukudla kwazo ngesikhathi esifaneleko?’ (Matewu 24:​3, 45; Markosi 13:​3, 4) UJesu bekaqinisekisa abafundi bakhe bona ‘njengekosi’ yabo uzokukhetha labo abazokunikela abalandeli bakhe ukudla okungokomoya kwaqobe, phakathi nesikhathi sokuphela. Bekuzokuba bobani abakha inceku le?

Balandeli bakaJesu bamambala abazeswe ngomoya. “Inceku” inikela abakhulekeli bakaJehova abakunye nayo ukudla okungokomoya okufike ngesikhathi. Sithembele encekwini ethembekileko bona ihlale isinikela ‘ukudla kwethu ngesikhathi esifaneleko.’​—⁠Luka 12:⁠42.

Sitlhogomela abantu bendlu kaZimu. (1 Thimothi 3:​15) UJesu unikele inceku umthwalo obudisi wokutlhogomela umsebenzi wengcenye yephasini yehlangano kaJehova​—⁠itlhogomela izinto zayo eziphathekako, inqophisa umsebenzi wokutjhumayela, begodu isifundisa ngemihlangano yebandla. Ngalokho, ukusinikela esikutlhogako ngesikhathi esikutlhoga ngaso, ‘inceku ethembekileko nehlakaniphileko’ irhatjha ukudla okungokomoya ngeencwadi esizisebenzisa ekonzweni yethu nangamahlelo abakhona emihlanganweni yethu yebandla nemihlanganweni emincani.

Inceku ithembekile emaqinisweni weBhayibhili nekuthunyweni kwayo bona itjhumayele iindaba ezimnandi, ihlakaniphile nendleleni etjheja ngayo izinto zakaKrestu ephasini. (IZenzo 10:​42) UJehova uyawubusisa umsebenzi waso ngetuthuko nangenala yezinto ezingokomoya.​—⁠Isaya 60:​22; 65:⁠13.

• Ngubani owakhethwa nguJesu bona ondle abalandeli bakhe ngokomoya?

• Inceku ithembeke begodu ihlakaniphe ngayiphi indlela?

Ngekhulu lokuthoma, isiqhema esincani, ‘abapostoli namadoda amadala’ zeJerusalema, bakhonza njengesihlopha esibusako, benzela loke ibandla lamaKrestu azesiweko iinqunto eziqakathekileko. (IZenzo 15:⁠2) Nabenza iinqunto abavumelana ngazo, bekumphumela wekulumiswano wokuthi uthini uMtlolo nokulinda iinqophiso zomoya kaZimu. (IZenzo 15:​25) Kusalandelwa indlela leyo nanamhlanjasi.

Sisetjenziswa nguZimu ukwenza intando yakhe. Abazalwana abazesiweko abakhonza eSihlopheni Esibusako banekareko edephileko eLizwini lakaZimu nelemuko elithe tjha endleleni yokudemba iindaba ezingokwenyama nezingokomoya. Bahlangana qobe veke ukucabangela iintlhogo zabazalwana ephasini mazombe. Njengekhulwini lokuthoma, banikela iinqophiso ezisekelwe eBhayibhilini kungaba ngeencwadi namkha ngababonisi abakhambako nabanye. Lokhu kwakha ubunye nokuzwana ebantwini bakaZimu. (IZenzo 16:​4, 5) ISihlopha Esibusako sidosa phambili ekulungiseleleni ukudla okungokomoya, sifake itjiseko emsebenzini wokutjhumayela ngoMbuso, begodu sitjheje nokubekwa kwabazalwana bona baqale iimthwalo yebandla.

Siyasilalela isiqophiso somoya kaZimu. ISihlopha Esibusako sanamhlanjesi sithembele kuMbusi Wendawo yoke, uJehova, neHlokweni yebandla uJesu bona sifumane ilayelo. (1 Korinte 11:⁠3; Efesu 5:​23) Amalungu waso akaziqali njeenkhulu ebantwini bakaZimu. Sona, kunye nawo woke amaKrestu azesiweko, ‘balandela iMvana [uJesu] nanyana kukuphi lapha iya khona.’ (ISambulo 14:⁠4) ISihlopha Esibusako sithokoza khulu nasisithandazelako ngomsebenzi esiwenzako.

• Bobani egade bakha isihlopha esibusako ngekhulu lokuthoma?

• ISihlopha Esibusako namhlanjesi silifuna njani ilayelo lakaZimu?

Ibizo lesiHebheru elithi, Bethel litjho “Indlu kaZimu.” (Genesisi 28:​17, 19) Ibizweli lizifanelekela kuhle izakhiwo zaboFakazi BakaJehova ezisetjenziselwa ukunqophisa nokusekela umsebenzi wokutjhumayela ephasini zombelele. ISihlopha Esibusako sikhonza emzimkhulu wephasini loke eNew York, e-⁠U.S.A., begodu lapho sinqophisa umsebenzi owenziwa ema-ofisini wegatja eenarheni ezinengi. Njengesiqhema, labo abakhonza endawenezi babizwa bona mndeni weBethel. Njengomndeni, bahlala begodu basebenza ndawonye, bathabela ukudla ndawonye, begodu bafunda iBhayibhili ndawonye ngobunye.​—⁠IRhalani 133:⁠1.

Labo abasebenza eBethel banomoya wokuzidela. Kwenye nenye iBethel, kunamadoda nabafazi abamaKrestu abazinikelele ukwenza intando kaZimu begodu bathuthukisa iinkareko zoMbuso isikhathi esizeleko. (Matewu 6:​33) Boke bathola indawo yokuhlala nokudla nemadlana ebasiza bona baqalane neendleko zabo zokuphila. Woke umuntu eBethel ufumana isabelo, kungaba se-ofisini, ngekhwitjhini, namkha ngelawini lokudlela. Abanye basebenza emnyangweni wokugadangisa abomagazini namkha iincwadi, ukuhlwengisa, endaweni yokuhlanza izambatho, ukulungisa, namkha benze ezinye izinto.

Yindawo emajadujadu esekela umsebenzi wokutjhumayela ngoMbuso. Umnqopho wawo woke amaBethel kukwenza iqiniso leBhayibhili lifumaneke ebantwini abanengi ngendlela okungakghoneka ngayo. Incwajana le isibonelo salokho. Yatlolwa ngaphasi kokunqophisa kweSihlopha Esibusako, yathunyelwa iinqhema ezinengi zokutjhugulula ephasini loke nge-elekthroniki, yagadangiswa ngobunengi emaBethel wokugadangisa, bese yathunyelwa emabandleni angaphezu kwe-100 000. Hlangana nayo yoke ikambiso le, iimndeni yeBethel inikela isizo eliqakathekileko emsebenzini orhaba ukuyidlula yoke​—⁠wokutjhumayela iindaba ezimnandi.​—⁠Markosi 13:⁠10.

• Bobani abakhonza eBethel, begodu ngiliphi ilungiselelo abenzelwa lona?

• Ngimuphi umsebenzi orhabako osekelwa ngiwo woke amaBethel?

Amalunga womndeni weBethel asebenza eemnyangweni ehlukahlukeneko, atlhogomela umsebenzi wokutjhumayela enarheni yinye namkha ezimbalwa. Angasebenza njengesiqhema esitjhugululako, ukugadangisa iincwadi, indawo ekubekwa kiyo iincwadi, ukurekhoda ama-CD nama-Video namtjhana ukutlhogomela ezinye izinto zendawo.

IKomidi Yegatja yongamela umsebenzi. ISihlopha Esibusako sikutjhiyela eKomidini Yegatja ukutjhejwa kwe-ofisi legatja ngalinye, okuyikomidi eyakhiwa badala abafanelekako abathathu namkha ngaphezulu. Ikomidi le iragela phambili ngobikela iSihlopha Esibusako ngetuthuko yomsebenzi owenziwa enarheni ngayinye ngaphasi kwegunya lekomidi neemraro engavela. Iimbiko enjalo isiza iSihlopha Esibusako siqunte bona ngiyiphi indaba okufuze icatjangelwe eencwadini ezilandelako, emihlanganweni yebandla nemihlanganweni yesifunda. Abajameli beSihlopha Esibusako babizwa bona babonisi bamagatja abathunyelwa bona bavakatjhele amagatja qobe begodu banikele amaKomidi wamaGatja isinqophiso ekutjhejeni izabelo zawo. (Iziyema 11:​14) Kuba nomhlangano okhethekileko onekulumo ebekwa mbonisi wamagatja bona akhuthaze abahlala esimini yegatja.

Kunikelwa isizo emabandleni wendawo. Abazalwana abanemithwalo yefanelo e-ofisini legatja baphasisa ukuhlelwa kwamabandla amatjha. Abazalwanaba banqophisa nomsebenzi wamaphayona, iinthunywa zevangeli, nababonisi besigodi abakhonza esimini yegatja. Bahlela imihlangano yesifunda neyesigodi, banqophisa ukwakhiwa kwamaWolo woMbuso amatjha, begodu bayaqiniseka bona iincwadi zithunyelwa emabandleni bona kutjhejwe iintlhogo zawo. Woke umsebenzi owenziwa e-ofisini legatja unesandla ekuhlelekeni komsebenzi wokutjhumayela.​—1 Korinte 14:​33, 40.

• AmaKomidi wamaGatja asisiza njani iSihlopha Esibusako?

• Ngimiphi imithwalo etjhejwa e-ofisini legatja?

Bona senze koke esingakwenza ngokutjhumayela “iindaba ezihle” kizo zoke iintjhaba, nemindeni, neenlimi, namakoro,” sikhiqiza iincwadi ngeenlimi ezingaphezu kwa-600. (ISambulo 14:⁠6) Sikghona njani ukufikelela umsebenzi ositjhitjhilo lo? Lokho sikwenza ngesizo lomsebenzi wephasi mazombe wokutlola izinto nangabatjhugululi abangaphezu kwee-⁠3 000–ababoFakazi BakaJehova.

Kulungiselwa isihloko samambala sesiNgisi. ISihlopha Esibusako sinqophisa umsebenzi woMnyango Wokutlola emzimkhulu wephasi loke. Umyango lo unqophisa izabelo zalabo abatlolako abakhonza emzimkhulu wephasi loke nakwamanye ama-ofisi wegatja. Ukuba nabantu abatlolako abanengi kusisiza bona sikghone ukutlola iindaba ezithinta abantu bazo zoke iinhlanga namasiko ngendlela efaneleko, ukwenzela bona iincwadi zethu zamukeleke ebantwini bazo zoke iihlanga.

Iindabezo zithunyelwa kubatjhugululi. Ngemva kobana ingcenye ethileko yendaba seyitloliwe bekwavunyelwana ngayo, ithunyelwa nge-elekthroniki eenqhemeni zabatjhugululi ephasini mazombe, ezitjhugulula, zihlahlube bezifundisise indaba leyo. Balinga ukukhetha “amezwi wamambala aliqiniso” azokuvumelana kuhle nawo woke umongo osesiNgisini nawutjhugululwela elimini elisetjenziswako.​—⁠UMtjhumayeli 12:⁠10.

Amakhomphyutha enza umsebenzi ube bulula. Ikhomphyutha angekhe yajamisela abatloli nabatjhugululi abababantu. Nokho, umsebenzi wabo ungaba bulula ngokusebenzisa iinhlathululi mezwi ze-elekthroniki, amahlelo wekhomphyutha, kunye neensetjenziswa zokurhubhulula. AboFakazi BakaJehova bahlela i-⁠Multilanguage Electronic Publishing System (MEPS) okusisetjenziswa sekhomphyutha esikwazi ukumumatha amagama amanengi ngamakhulu weenlimi, begodu lokho kungenziwa kukhambisana neenthombe, emaswapheleni bese kuyagadangiswa.

Kubayini sizikhandla kangaka, kukulapho ezinye iinlimi zikhulunywa babantu abambalwa kwaphela? Kungebanga lokuthi kuyintando kaJehova “othanda bona boke abantu baphuluswe balazi iqiniso.”​—⁠1 KuThimothi 2:​3, 4.

• Zitlolwa njani iincwadi zethu?

• Kubayini iincwadi zethu zitjhugululelwa eenlimini ezinengi kangaka?

Ihlangano yethu yenza beyirhatjhe iingidigidi zeencwadi ezisekelelwe eBhayibhilini qobe mnyaka ngaphandle kwembadelo. Yakha beyitjheje namaWolo woMbuso kunye nama-ofisi wegatja. Isekela iinkulungwana zamalunga weBethel neenthunywa zevangeli, inikela nesekelo ngeenkhathi zehlekelele. Yeke ungazibuza bona ‘Koke lokhu kusekelwa bunjani ngokwemmali?’

Asibhadelisi, asikukhiphi kwetjhumi namkha sithathe ikongozelo. Nanyana iindleko ezisekela umsebenzi wethu wokutjhumayela ziphakeme kangaka, asikolegi mali. Esikhathini esingaphezu kwekhulu leminyaka esadlulako, umagazini wesibili we-Sithalasokulinda watjengisa bona sithembele kuJehova njengomsekeli wethu nokuthi “angekhe sirabhele namkha sibawe umuntu bona asisekele”​—⁠nangambala kunjalo!​—⁠Matewu 10:⁠8.

Imisebenzi yethu isekelwa ngeminikelo yokuzithandela. Abantu abanengi bayawuthabela umsebenzi wethu wokufundisa ngeBhayibhili begodu bayanikela ngokuphathelene nawo. AboFakazi ngokwabo banikela ngokuzithandela ngesikhathi sabo, amandla, imali, nangezinye izinto malungana nokwenziwa kwentando kaZimu ephasini. (1 IMilando 29:⁠9) EWolweni LoMbuso, kunamabhoksi weminikelo ukwenzela bona labo abathanda ukunikela benze njalo. Ngokujayelekileko, iminikelo enjalo ivela kilabo abangakarhwebi kangako ngokwemmali, ngokufana patsi nomfelokazi uJesu akhuluma ngaye kuhle, owaphosela iinhlamvu eembili zemali ebhoksini lomnikelo etempeleni. (Luka 21:​1-⁠4) Yeke nanyana ngubani, qobe ‘angazibekela imali ngeqadi’ bona anikele ‘ngehliziyo ekhululekileko.’​—⁠1 Korinte 16:⁠2; 2 Korinte 9:⁠7.

Siyaqiniseka bona uJehova uzokuragela phambili aphehla iinhliziyo zalabo abafuna ‘ukumdumisa ngezinto zabo ezidurako’ ekusekeleni umsebenzi woMbuso ukwenzela bona intando yakhe izaliseke.​—⁠Iziyema 3:⁠9.

• Khuyini okwenza ihlangano yethu ihluke kwamanye amasondo?

• Zisetjenziswa njani immali ezinikelweko?

Njengombana ibizo elithi iWolo LoMbuso lizitjho, yindawo lapho kukhulunywa ngeemfundiso zeBhayibhili ezimalungana noMbuso kaZimu​—⁠okusihloko sekonzo kaJesu.​—⁠Luka 8:⁠1.

Ziindawo zokukhulekela kweqiniso emphakathini. Eendaweni ezinjalo, ukutjhunyayelwa kweendaba ezimnandi zoMbuso kukhamba phambili. (Matewu 24:​14) AmaWolo woMbuso ayahluka ngobukhulu nangendlela akheke ngayo, kodwana woke asebujamweni obuhle, amanye akheke ngendlela yokobana kuhlanganyele amabandla angaphezu kwelilodwa. Eemnyakeni yamuva, sekwakhiwe iinkulungwana zamaWolo woMbuso amatjha (isilinganiso esingaba ngesamaWolo amahlanu ngelanga) ukwenzela bona kube netuthuko emabandleni wethu. Lokhu kukghoneka njani?​—⁠Matewu 19:⁠26.

Akhiwa ngeminikelo eyenziwa ebandleni. EWolweni LoMbuso ngalinye, kunelinye godu ibhoksi Lomnikelo Wokwakhiwa Kwamanye AmaWolo WoMbuso. Iminikelo le ithunyelwa e-⁠ofisini legatja bona ikwazi ukusiza amabandla atlhoga ukwakha namkha ukuvuselela iWolo LoMbuso.

Akhiwa ziinsebenzi ezingabhadelwa zokuzithandela ezivela eendaweni ezihlukhahlukeneko. Eenarheni ezinengi, kuhlelwe Iinqhema Ezakha AmaWolo WoMbuso. Iinqhema zokwakha zamavolontiya, zisuka kwelinye ibandla ziye kwelinye ibandla enarheni, ngitjho neendaweni ezibomakhelwana, bona zidose phambili ekwenzeni umsebenzi nokubandula abazalwana bendawo ngomsebenzi loyo. Kwezinye iinarha, kukhethwa IKomidi Yokwakha Yesifunda bona itjheje isakhiwo begodu ivuselele amaWolo woMbuso eyabelwe wona. Abadala abanokuhlangabezanwe nakho kokwakha basiza amabandla kiyo yoke ikambiso yokwakha, nabakhi abanamakghono bavolontiya ngamakghono wabo. Kwenye nenye indawo okwakhelwa kiyo, amalungu webandla lendawo aneensebenzi zokuzithandela ezinengi. Umoya kaJehova kunye nokuzinikela kwabantu bakhe ngomphefumulo woke kwenza lokhu kughonakale.​—⁠IRhalani 127:⁠1; Kholose 3:⁠23.

• Kubayini indawo yethu yokukhulukela ibizwa bona yiWolo LoMbuso?

• Kwenzeka njani bona kwakhiwe amaWolo woMbuso ephasini loke?

IWolo ngalinye laboFakazi BakaJehova liphethe ibizo lakaZimu eligcwengileko. Ngalokho, sinomuzwa wokobana ukuba nengcenye ekuhlwengiseni isakhiwo, ukuqaleka kuhle kwaso, ukuba kwaso sebujamweni obuhle nokusilungisa, kuyilungelo nengcenye eqakathekileko yokukhulekela kwethu okucwengileko. Woke umuntu angahlanganyela ekwenzeni njalo.

Volontiya ukuhlwengisa ngemva kwemihlangano. Ngemva kwemihlangano, abazalwana nabodade ngethabo benza umsebenzi omncani wokuhlwengisa iWolo LoMbuso. Kanye ngeveke, kwenziwa umsebenzi ongeneleleko wokuhlwengisisa iWolo. Umdala namkha inceku ekhonzako idosa phambili ekunqophiseni umsebenzi lo, ngokujayelikeleko uqalisisa izinto okufuze zilandelwe. Kuye ngalokho okutlhogekako, omunye uvolontiya ukuthanyela, ukukorobha, nokuthintitha, ukubeka kuhle iintulo, ukuhlwengisa iindlwana zokuzithumela, ukuhlanza amafesdiri neempili, ukulahla iinzibi, ukuhlela kuhle izinto nokuhlwengisa ijarida. Okungenani kanye ngomnyaka, kukhethwa ilanga lokwenza umsebenzi ongeneleleko. Ngokubandakanya abantwana bethu emsebenzini lo, sibafundisa indlela yokuhlonipha indawo yethu yokukhulekela.​—⁠UMtjhumayeli 5:⁠1.

Siza ekulungiseni izinto. Qobe mnyaka, kuba nokuhlolisiswa ngokuzeleko kweWolo LoMbuso, ngaphandle nangaphakathi. Malungana nokuhlolisisokhu, kuba nomsebenzi owenziwako wokutjheja iWolo bona lisebujamweni obuhle na, ukwenzela bona sibalekele iindleko ezingatlhogekiko. (2 IMilando 24:​13; 34:​10) IWolo elihlanzekileko nelitjhejwa kuhle liba yindawo efanelekako yokudumisa uZimu. Ngokuba nengenye emsebenzini lo, sitjengisa bona uJehova utjhidele kangangani eenhlizweni zethu kubandakanye nendawo yethu yokukhulekela. (IRhalani 122:⁠1) Godu lokhu kuletha ithando ebantwini bendawo.​—⁠2 Korinte 6:⁠3.

• Kubayini kungakafaneli siliselele indawo yethu yokukhulekela?

• Ngimaphi amalungiselelo enziwako bona kuhlwengiswe iWolo loMbuso?

Ungakuthabela ukwenza irhubhululo bona uthuthukise ilwazi lakho ngeBhayibhili? Kunokukutshwenyako na ngomtlolo othileko namkha umuntu, indawo, nofana okuthileko okutlolwe eBhayibhilini? Namtjhana kungenzeka na bona khewazibuza ukuthi iLizwi lakaZimu lingakusiza njani ebujamweni okibo? Nakunjalo, vakatjhela ibulungelo eliseWolweni LoMbuso.

Linamathulusi alisizo wokurhubhulula. Kungenzeka awunazo zoke iincwadi ezisekelwe eBhayibhilini zaboFakazi BakaJehova ezifumaneka ngelimi lakho. Kodwana ibulungelo eliseWolweni loMbuso linazo pheze zoke iincwadi zamuva. Libuye libe nazo ngamalimi angaphezu kwelilodwa, kunye nezinye iincwadi ngokukhethekileko ezisetjenziselwa ukurhubhulula. Uvumelekile ukusebenzisa okusebulungelweni ngaphambi nangemva kwemihlangano. Nengabe kunekhomphyutha, kungenzeka ibe ne-Watchtower Library. Leli yithulusi le-elekthroniki elimumethe iwomakazi leencwadi zethu, begodu kubulula ukulisebenzisa, ngombana kunalapho utlola khona ibizo ofunisisa ngalo namkha umtlolo.

Lilisizo kubafundi beSikolo Sekonzo Sezulwini. Nengabe sewutlolisile esikolwenesi, uvumelekile bona ungalisebenzisa ngokunenzuzo ibulungelo eliseWolweni LoMbusweli bona ulungiselele izabelo zakho. Umbonisi wesikolo nguye ozokunikela imvumo yokwenza njalo. Kumthwalo wakhe ukuqinisekisa bona sezikhona iincwadi zamuva nokuthi sezihlelwe kuhle. Yena namkha loyo ofunda naye iBhayibhili angakutjengisa bona ungayifumana njani imininingwana oyitlhogako. Nokho, akunancwadi okufuze iphume eWolweni LoMbuso. Begodu, sifuna ukuziphatha kuhle iincwadezo, singazitloli.

IBhayibhili iyahlathulula bona ‘nesizakufumana ilwazi lakaZimu,’ kufuze sembe “kwanga sifuna umnotho ofihliweko.” (Iziyema 2:​1-⁠5) Ibulungelo eliseWolweni loMbuso lingakusiza bona uthome irhubhululo lakho.

• Ngimaphi amathulusi afumaneka ebulungelweni eliseWolweni loMbuso?

• Ngubani ongakusiza bona ulisebenzise ngokunenzuzo ibulungelweli?

UJesu watjela abalandeli bakhe: “Umkhanyo wenu kufanele ukhanye phambi kwabantu, khona bazabona izinto ezihle enizenzako badumise uBaba wenu osezulwini.” (Matewu 5:​16) Yeke, siyisebenzisa ngokunenzuzo itheknoloji yanamhlanjesi, kuhlanganise ne-Internet. I-⁠Web Site yethu, www.pr418.com, siphande senzinzolwazi esisemthethweni esimthombo wemininingwana yeenkolelo nemisebenzi yaboFakazi BakaJehova. Imumetheni?

Iimpendulo eziseBhayibhilini zeembuzo evame ukubuzwa. Ungafumana iimpendulo zeminye yeembuzo eqakathekileko abantu abakhe bazibuza yona. Esithandathu yayo, iphendulwa ephetjhaneni elithi, Ungathabela Ukulazi Iqiniso? ongalifumana esiphandenesi ngamalimi angaba ma-400. Godu ungafumana ne-New World Translation ngesibalo esithileko samalimi kunye nezinye ezinengi iincwadi zokufunda iBhayibhili, kuhlanganise nethi, Khuyini Kwamambala Okufundiswa YiBhayibhili? kunye nezamuva ISithalasokulinda ne-Phaphama! Ezinengi zeencwadezi ungakghona ukuzifunda nokuzilalela ku-Internet namkha uzidawnlowde ngehlobo elilalelwako, le-PDF, ne-EPUB. Ungakghona nokugadangisa amakhasi ambalwa ongawahlanganyela nomuntu onekareko ngelimi lakhe! Iincwadi ezibukelwako zelimi lezandla nazo zifumaneka ngamanengi wamalimi lawo. Ungakghona nokudawnlowda amadrama weBhayibhili afundwako, amadrama asekelwe eBhayibhilini, kunye nomvumo omnandi ongathabela ukuwulalela ngesikhathi sakho.

Imininingwana enembileko ngaboFakazi BakaJehova. Okhunye ongakufumana, mavidiyo amafitjhani neendaba zomsebenzi wephasi loke, izinto ezithinta aboFakazi BakaJehova, kunye nemizamo yethuthuko abayenzako. Ungafumana nezaziso zemihlangano yesigodi kunye nemininingwana yokuthinta ama-ofisi wegatja.

Ngokwenza lokhu, sikhanyisa umkhanyo weqiniso ngitjho neendaweni ezizikhethe zodwa zephasi. Kuzuza abantu bazo zoke iinarhakazi kuhlanganise ne-Antarctica. “Sithandazela, bona umlayezo weKosi wande msinyana” ephasini loke malungana nokuphazimulisa uZimu.​—⁠2 Tesalonika 3:⁠1.

• Isiphande esithi, www.pr418.com/nr sibasiza njani abantu abanengi bafumane iqiniso leBhayibhili?

• Khuyini ongathabela ukukubona ku-Web site yethu?