Abantu abanengi balisile ukuya emasondweni ngombana abazifumani iimpendulo zeembuzo eqakathekileko namkha induduzo. Ngalokho, kubayini kufuze uhlanganyele emihlanganweni ehlelwe boFakazi BakaJehova? Khuyini ozokufumana lapho?

Ithabo lokuba hlangana nabantu abathandanako nabakhathalelanako. Ekhulwini lokuthoma, amaKrestu bekahlelelwe ukuhlangana ndawonye emabandleni, begodu bekaba nemhlangano bona akhulekele uZimu, afunde iiMtlolo, nokobana akhuthazane. (Hebheru 10:​24, 25) Ukubuthana endaweni enethando, kwabenza bazizwa bahlangana nabangani beqiniso​—⁠abazalwana abangokomoya. (2 Tesalonika 1:⁠3; 3 Jwanisi 14) Silandela isibonelo sangekhulu lokuthoma begodu sifumana ithabo elifanako.

Inzuzo yokufunda indlela yokusebenzisa iinkambisolawulo zeBhayibhili. Njengombana bekuliqiniso ngeenkhathini zeBhayibhili, amadoda, abafazi, nabentwana bebahlangana ndawonye. Nanamhlanje, abafundisi abafanelekako basebenzisa iBhayibhili bona basisize sizwisise indlela yokusebenzisa iinkambisolawulo ekuphileni kwethu kwaqobe. (Duteronomi 31:​12; Nehemiya 8:⁠8) Boke bangahlanganyela ngokuphendula ekulumiswaneni nekuvumeni iingoma, okusivumela sizwakalise ithemba lethu lobuKrestu.​—⁠Hebheru 10:⁠23.

Isibusiso sokuqiniswa kwekholo lakho kuZimu. Umpostoli uPowula watjela elinye ibandla langesikhathi sakhe: “Ngiyanihlulukela kwamambala ngikhanukela ukuzonibona, . . . ze [sikhuthazane phakathi kwethu, omunye nomunye ngekholo lomunye, kokubili lenu nelami].” (Roma 1:​11, 12) Ukuhlanganyela qobe eemhlanganweni yebandla nesikholwa nabo kuqinisa ikholo lethu begodu kusenza sifune nokuphila ngendlela yobuKrestu.

Kubayini ungamukeli isimemwesi bona uzokuhlanganyela nathi imihlangano elandelako begodu uzibonele wena mathupha izintwezi? Uzokwamukelwa ngokufuthumeleko. Yoke iimhlangano isimahla​—⁠akuthathwa kongozelo.

• Imihlangano yethu yebandla ilandela siphi sibonelo?

• Singazuza njani ekubeni khona emihlanganweni le?

Ngitjho nanyana kungabizela bona sikhambe emahlathini namkha siqalane nobujamo obumbi bezulu, sihlanganyela qobe emihlanganweni yethu yobuKrestu. Naphezu kweentjhijilo zepilo nokudinwa ngemva kokusebenza, kubayini aboFakazi BakaJehova benza umzamo wokuzihlanganisa nabakholwa nabo?

Kuzuzisa ipilo yethu. UPowula wathi, “asitjhejaneni” akhuluma ngalabo esizihlanganisa nabo eemhlanganweni yebandla. (Hebheru 10:​24) Lokhu kutjho bona “sicabanga ngokudephileko,” okutjho ukwazana. Ngalokho amezwi kaPowula asikhuthaza bona sikhathalele abanye. Ngokwazi eminye iimndeni yamaKrestu, sifumana bona abanye baqalana ngokuphumelelako neentjhitjhilo ezifanako nezethu begodu bangasisiza nathi siphumelele.

Kuqinisa ubuhlobo bethu bobungani. Emihlanganweni, sibuthana ndawonye, ingasi nabangani, kodwana nesiqhema sabangani. Kezinye iinkhathi, sibanesikhathi sindawonye kwezokuzithabisa ezikarisako. Kuzuzisa ngani ukuzihlanganisokhu? Sifunda ukwamukela omunye nomunye khudlwana, begodu lokho kuqinisa ithando lethu. Ngalokho, nengabe abangani bethu baqalana neemraro, siyabasiza ngombana ubungani obuqinileko busuke sebakhekile. (Iziyema 17:​17) Ngokuzihlanganisa nabo boke emhlanganweni yebandla, sitjengisa bona “sisizana ngomoya munye.”​—⁠1 Korinte 12:​25, 26.

Sikukhuthaza bona ukhethe abangani abenza intando kaZimu. Abangani abanjalo uzobafumana kiboFakazi BakaJehova. Sibawa ungavumeli litho bona likuliye ekuzihlanganiseni nathi.

• Kubayini kusizuzisa ukubuthana ndawonye emihlanganweni?

• Ungathanda ukujwayelana nini nebandla lethu?

Imihlangano yamaKrestu yekhulu lokuthoma ngokuyihloko beyibandakanya iingoma, imithandazo, ukufunda, nokukhulumisana ngeMtlolo​​—⁠kanti bekunganamasiko alandelwako. (1 Korinte 14:​26) Ungalindela okufanako nemhlanganweni yethu.

Ifundo yakhona idzimelele eBhayibhilini begodu iyasebenza. Ngepela veke, ibandla ngalinye liyahlangana bona lizokulalela ikulumo yeBhayibhili yemizuzu ema-30, yokobana emaphilwenethu iMtlolo ihlobana njani nesikhathi esiphila kiso. Soke sikhuthazwa bona silandelele emaBhayibhilenethu. Ngemva kwekulumo, kune-Sifundo ‘Se-Sithalasokulinda’ okukulapho amalungu webandla aba nengcenye yokunikela iimpendulo ezisekelwe e-⁠Sithalenisokulinda. Ikulumiswano le isisiza bona sisebenzise iinkambisolawulo zeBhayibhili emaphilwenethu. Umagazini ofanako lo usetjenziswa nakwamanye amabandla angaphezu kwe-100 000 ephasini mazombe.

Sisizwa bona sithuthukise amakghono wethu. Godu sihlangana ndawonye ntambama phakathi neveke bona sibe neemhlangano emithathu. Ngemizuzu yokuthoma ema-30 kune-Sifundo SeBhayibhili Sebandla, okuyingcenye yemibuzo neemphendulo ethuthukisa ilwazi lethu lokuzwisisa iinkambisolawulo zeMitlolo nesiporofido seBhayibhili. Bese ngemizuzu ema-30 kuba Sikolo Sekonzo Sezulwini esithoma ngekulumiswano yamaphuzu weBhayibhili ibandla eliwalungiselele kusese ngaphambili. Abafundi abanengcenye esikolwenesi babeka iinkulumo ezifitjhani. Umragi wesikolo uzokunikela iseluleko ukwenzela bona asisize sithuthukise amakghono wethu wokufunda nokukhuluma. (1 Thimothi 4:​13) Emaswapheleni, ngemizuzu ema-30 kuba Mhlangano Wekonzo, oba neenkulumo, iimboniso, nemikhulumiswano begodu sifunda nendlela yokufundisa abanye ngeBhayibhili.

Newuhlanganyela iimhlangano yethu, akunakuzaza bona uzokuthatjiswa yizinga lefundo yeBhayibhili ozoyifumana.​—⁠Isaya 54:⁠13.

• Khuyini esingalindela ukukuzwa emihlanganweni yaboFakazi BakaJehova?

• Ngiyiphi imihlangano yepela veke ongathabela ukuhlanganyela kiyo?

Uyilemukile na, indlela aboFakazi BakaJehova abambatha kuhle ngayo nabaya emihlanganweni yebandla encwadini le? Kubayini sikutjheja kangaka ukumbatha kwethu nokuzilungisa?

Sihlonipha uZimethu. Kuliqiniso bona uZimu akaqali ingaphandle lomuntu. (1 Samuweli 16:⁠7) Ngalokho, nesihlanganako bona sikhulekele, iinhliziyo zethu ezinethabo zifisa ukutjengisa ihlonipho kokubili ngaye nangalabo esikhulekela nabo. Nengabe bekutlhogeka bona sijame hlanu komahluleli ekhotho, akunakuzaza bona besizoyitjheja indlela esiqaleka ngayo ukuthi itjengisa ihlonipho na. Ngendlela efanako, indlela esiqaleka ngayo ngaphandle itjengisa ihlonipho esinayo ‘ngomahluleli wephasi loke,’ uJehova uZimu, nangendawo esimkhulekela kiyo.​—⁠Genesisi 18:⁠25.

Sitjengisa iinkambisolawulo esiphila ngazo. IBhayibhili ikhuthaza amaKrestu bona ambathe izembatho ‘ezihloniphekako ezizawenza azothe’ njengalabo “abalotjha uZimu.” (1 Thimothi 2:​9, 10) Ukumbatha “ngesizotha” kutjho ukungambathi izambatho ezingakudosela amehlo ngokubukisa, ezivusa imizwa namtjhana eziveza umzimba. Godu “ukuba nehlonipho” kusisiza bona sikhethe nekuziwa ezambathweni zobudlapha namkha ezeqisako. Nokho, ikambisolawulo le ayisivimbi nekuziwa elungelweni lokuzikhethela. Nangaphandle kokukhuluma, ukuqaleka kwethu okuhle ‘kungahlobisa ifundiso yoMphulusi wethu, kudumise noZimu.’ (Titosi 2:​10, NW; 1 Pitrosi 2:​12) Ngokumbatha kuhle kwethu nesiya emihlanganweni yebandla, siba nomthelela endleleni abanye abakuqala ngayo ukukhulekela kwethu uJehova.

Nokho, izembatho zakho azingakwenzi bona usabe ukuza eWolweni LoMbuso. Akutlhogeki bona sibe nezembatho ezidurako namkha ezidumile bona sibe babantu abafanelekako, abahlanzekile nabasibonelo.

• Iqakatheke kangangani indlela esimbatha ngayo nesikhulekela uZimu?

• Ngiziphi iinkambisolawulo ezinqophisa ukukhetha kwethu endleleni esimbatha besizilungise ngayo?

Nengabe ufunda iBhayibhili nomunye waboFakazi BakaJehova, pheze ulinga ukulungiselela enizokufunda ngaphambi kwesinye nesinye isifundo. Bona uzuze ngokungeziweko, kuhle bona wenze ngendlela efanako ngaphambi kobana uye emihlanganweni yebandla. Singaba nemiphumela emihle nesihlala sikwenza lokhu.

Hlela bona uzokutaditjha nini begodu kuphi. Kunini lapho ungacabangisisa khona? Kusekuseni khulu, ngaphambi kobana uye emsebenzini, namkha ebusuku, ngemva kobana abantwana sele balele? Nanyana ungeze wafunda isikhathi eside, qunta bona sikhathi esingangani ozosibekela eqadi, begodu linga bona kungabi nezinto ezizokuthikazisa. Funa indawo ethulileko, ususe zoke iinthikaziso ngokucima umrhatjho, umabonakude, nofunjathwako. Ukuthandaza ngaphambi kobana ufunde kungakusiza wehlise ukutshwenyeka ngezinto zelanga ukwenzela bona ukwazi ukucabangisisa ngeLizwi lakaZimu.​—⁠Filipi 4:​6, 7.

Thalela, begodu ukulungele ukuhlanganyela. Thoma ngokuzwisisa indaba yoke yesihloko. Cabanga ngesihloko sendaba namkha isahluko, ucabange nangendlela isihlokwana esihlobana ngayo nesihloko, begodu uhlolisise esinye nesinye isithombe neembuzo etjengisa amaphuzu aqakathekileko. Ngemva kwalokho funda isigaba ngasinye, bese ufuna iimpendulo zeembuzo. Funda imitlolo ekhonjiweko, ucabange nangokuthi ihlobana njani nendaba le. (IZenzo 17:​11) Nasele ufumene iimpendulo, thalela amaphuzu ambalwa aqakathekileko namtjhana ingcenye ethileko esigabeni ezokukhumbuza iimpendulo. Eemhlanganweni, ungaphakamisa isandla sakho newufunako unikele ngependulo erhunyeziweko ngamezwakho.

Ngokuhlolisisa iingcenye ezihlukahlukeneko ekukhulunywa ngazo qobe veke emihlanganweni yebandla, uzokungezelela ilwazi “esilulwini serhwebo” sakho selwazi leBhayibhili.​—⁠Matewu 13:​51, 52, NW.

• Ngiyiphi indlela ongayisebenzisa ukulungiselela imihlangano yebandla?

• Ungazilungiselela njani bona uhlanganyelele ngeempendulo emihlanganweni yebandla?

Kusukela ngekhulu lokuthoma, uJehova bekafuna bona umndeni ngamunye ube nesikhathi ndawonye, ukhulise ubuhlobo obuqinileko naye begodu uqinise nobuhlobo bawo. (Duteronomi 6:​6, 7) Kungebangelo aboFakazi BakaJehova babekela eqadi isikhathi sokuba nokukhulekela komndeni evekeni​—⁠bakhulumisane bazigedlile ngezinto ezingokomoya ngokuya ngeentlhogo zabo. Nanyana uhlala wedwa, isikhathi esinjalo singasetjenziswa kuhle noZimu ngokuba nesifundo seBhayibhili somuntu mathupha salakho okukhethako.

Sikhathi sokutjhidela kuJehova. “Tjhidelani kuZimu, naye uzatjhidela kini.” ( Jakobosi 4:⁠8) Simazi ngcono uJehova ngokufunda ngobuntu bakhe nangendlela enza ngayo izinto emakhasini weLizwi lakhe elitloliweko. Indlela elula yokuthoma ukukhulekela komndeni kwakho kusebenzisa isikhathi nifunda iBhayibhili ndawonye ngokuzwakalako, mhlamunye nilandele irhelo laqobe veke leSikolo Sekonzo Sezulwini. Ilungu ngalinye lomndeni lingabelwa ukufunda ingcenye ethileko, ngemva kwalokho woke umndeni ungacoca ngalokho okufundwe eMitlolweni.

Sikhathi sokutjhidelana kwamalungu womndeni. Amadoda nabafazi, kubandakanye nababelethi nabantwana, bakhulisa ubuhlobo bomunye nomunye lokha nabafunda iBhayibhili njengomndeni. Kufuze kube sikhathi esithabisako esinokuthula, isikhathi woke umndeni osiqale ngabovu. Kuye ngeminyaka yabantwana babo, ababelethi bangakhetha isihloko esithileko bakhulumisane ngaso, mhlamunye ngokusebenzisa iinthombe ezisuselwe ku-Sithalasokulinda ne-Phaphama! Kungakhulunywa ngemiraro abantwana bakho abahlangabezana nayo esikolweni nangendlela abangayirarulula ngayo. Ningathabela ukuprakthiza iingoma ezizokuvunywa ngeveke leyo emihlanganweni yebandla begodu nithabele nokuselwako ndawonye ngemva kokukhulekela komndeni.

Isikhathi enisisebenzisa ndawonye qobe veke nikhulekela uJehova sizokusiza woke umndeni ufumane ithabo eLizwini lakaZimu, begodu uZimu uzowubusisa ngomzamo owenzako.​—⁠IRhalani 1:​1-⁠3.

• Kubayini sibekela eqadi isikhathi sokukhulekela komndeni?

• Ababelethi bangakwenza njani lokhu bona kuthatjelwe ngiwo woke umuntu emndenini?

Kubayini abantwaba babonakala bathabe kangaka? Bakeminye yemihlangano yethu. Njengeenceku zakaZimu zekadeni, egade ziyalwe bona zihlanganyele imihlangano kathathu ngomnyaka, nathi sihlala silulukela ukuhlangana njengesiqubuthu. (Duteronomi 16:​16) Qobe mnyaka, sinezenzakalo eentathu: umhlangano okhethekileko welanga elilodwa, umhlangano wesifunda wamalanga amabili, nomhlangano wesigodi wamalanga amathathu. Sizuza njani emihlanganweni le?

Iqinisa ubuzalwana bethu bobuKrestu. Njengombana nama-Israyeli athabela ukukhonza uJehova “hlangana newomakazi lebebakunye nabo,” nathi sithabela ukumkhulekela ndawonye ngeenkhathi ezikhethekileko. (IRhalani 26:​12; 111:⁠1) Iimbuthano le ivula amathuba wokuhlangana nokucocisana naboFakazi abakwamanye amabandla namkha bakwezinye iinarha. Emini, sithabela ukudla ndawonye emhlanganweni, okungezelela emoyeni wobungani ezenzakalweni ezingokomoyezi. (IZenzo 2:​42) Emihlanganweni emikhulu sizibonela mathupha ithando elihlanganisa ‘abantu bayo yoke imihlobo’ ephasini.​—⁠1 Pitrosi 2:⁠17.

Isisiza bona sikhule ngokomoya. Ama-Israyeli azuza ngokuthi ‘azwisise ilizwi’ elisemtlolweni egade ahlathululelwa lona. (Nehemiya 8:​8, 12) Nathi sithabela isiluleko esivela eBhayibhilini esisifumana emihlanganweni. Ingcenye ngayinye isekelwe eMtlolweni. Sifunda indlela yokwenza intando kaZimu emaphilwenethu ngeenkulumo ezikarisako, iinkulumo tjhiyelwano nangemiboniso. Sikhuthazwa ngokuhlangabezanwe nakho kwamaKrestu aqalana ngokuphumelelako neentjhijilo zepilo eenkhathini ezibudisezi. Emihlanganweni yesigodi, amadrama wabantu bekadeni enza ukulandisa kweBhayibhili kuphile begodu asifundisa neemfundo esingazisebenzisa. Kiyo yoke iimhlangano, kubhabhadiswa labo abafisa ukutjengisa ukuzinikela kwabo kuZimu.

• Kubayini imihlangano ikarisa kangaka?

• Ungazuza njani ngokubakhona emihlanganweni le?

Misinyana ngaphambi kokufa kwakhe, uJesu wathi: “Iindaba ezimnandi ngombuso kaZimu zizakutjhunyayelwa ephasisni loke, kube bufakazi eentjhabeni zoke.” (Matewu 24:​14) Kodwana umsebezi wephasi mazombe lo bewuzokwenziwa njani? Ngokulandela isibonelo uJesu asitjhiyela sona nekasese sephasini.​—⁠Luka 8:⁠1.

Silinga ukufikelela abantu emizini yabo. UJesu wabandula abafundi bakhe bona batjhumayele iindaba ezimnandi umuzi nomuzi. (Matewu 10:​11-13; IZenzo 5:​42; 20:​20) AmaKrestu wekhulu lokuthoma ebekazimisele anikelwa isabelo esikhethekileko sendawo okufuze atjhumayele kiyo. (Matewu 10:​5, 6; 2 Korinte 10:​13) Ngokufanako nanamhlanjesi, umsebenzi wethu wokutjhumayela uhlelwe kuhle, begodu ibandla ngalinye labelwe indawo okufuze litjhumayele kiyo. Lokhu kusenza sizalise umthetho kaJesu ‘wokutjhumayela iindaba ezimnandi ebantwini, sifakaze kibo.’​—⁠IZenzo 10:⁠42.

Silinga ukufikelela abantu kinanyana ngiziphi iindawo esingabafumana kizo. UJesu naye wasibekela isibonelo ngokutjhumayela ebantwini abasetjhatjhalazini, njengalabo abaseendaweni ezimagega nelwandle neendaweni zomphakathi okukhiwa amanzi kizo. (Markosi 4:⁠1; Jwanisi 4:​5-15) Nathi godu sikhuluma nabantu ngeendaba ezimalungana neBhayibhili ngendlela esingakghona ngayo​—⁠eendleleni, eentolo, emaphageni, nangokusebenzisa umtato. Godu nesifumana ithuba, sitjhumayela nakubomakhelwana, esisebenza nabo, esifunda nabo, kunye neenhlobweni. Yoke iimzamo le yenze iingidi zabantu ephasini loke zezwa ‘iindaba ezimnandi zephuluso.’​—⁠IRhalani 96:⁠2.

Ukhona na umuntu omcabangako ongathanda ukumtjela iindaba ezimnandi zoMbuso kaZimu, nokobana iindabezo zithini ngengomuso lakhe? Ungazibulungeli wena mathupha iindaba zethembezi. Zitjele nabanye msinyana ngendlela okungakghonakala ngayo!

• Ngiziphi iindaba eezimnandi okufuze sizitjhumayele?

• AboFakazi BakaJehova basilingisa njani isibonelo sakaJesu sokutjhumayela?

Ibizo elithi “phayona” kanengi liqalisele kilabo abavula amsimu amatjha begodu babekele nabanye isibonelo sokulingiswa. UJesu bekakhonza njengephayona, wathunyelwa ephasini bona azokwenza ikonzo enikela ukuphila, asivulele nendlela eyisa ekusindisweni. (Matewu 20:​28) Namhlanjesi abalandeli bakhe bayamlingisa ngokobana basenzise isikhathi sabo esinengi ekonzweni ngendlela abangakghona ngayo bona benze ‘abafundi.’ (Matewu 28:​19, 20) Abanye bakghone ukungenela ikonzo yesikhathi esizeleko esiyibiza ngokuthi yikonzo yokuphayona.

Iphayona mtjhumayeli wesikhathi esizeleko. Boke aboFakazi BakaJehova barhuweleli beendaba ezihle. Ngalokho, abanye bahlela ukuphila kwabo bona bakhonze njengamaphayona wesikhathi esizeleko, basebenza ama-iri ama-70 qobe nyanga batjhumayela. Nebazakwenza lokhu, abanengi bakhetha ukunciphisa isikhathi abasisebenza emesebenzini wokuziphilisa. Abanye babo bakhonza njengamaphayona akhethekileko eendaweni lapho kunetlhogeko khona yokutjhumayela ngoMbuso, basebenza ama-iri ali-130 namtjhana ngaphezulu qobe nyanga. Amaphayona athabela ukuphila okulula, anethemba lokobana uJehova uzokutlhogomela iintlhogo zawo zokuphila. (Matewu 6:​31-33; 1 Thimothi 6:​6-⁠8) Labo abangeze bakwazi ukuphayona isikhathi esizeleko, bangakhonza njengamaphayona wesigiyani nebakghonako, bandise umsebenzi wabo wokutjhumayela ube ma-iri ama-30 ukuya kwama-50 ngenyanga.

Iphayona litjhukunyiswa lithando ngoJehova nangabantu. NjengoJesu, siyabutjheja ubujamo obungokomoya abantu abanengi abazifumana bakibo namhlanjesi. (Markosi 6:​34) Kodwana kukhona esingabasiza ngakho esikhathinesi, sibanikele ithemba ngengomuso. Ithando ngabomakhelwana litjhukumisela iphayona bona linikele ngesikhathi namandla walo bona lisize abanye ngokomoya. (Matewu 22:​39; 1 Tesalonika 2:⁠8) Ngokujayelekileko, ikholo lakhe liyaqina, utjhidela khulu kuZimu, begodu ufumana ithabo elingeziweko.​—⁠IZenzo 20:⁠35.

• Ungalihlathulula njani iphayona?

• Khuyini eyatjhukumisela abanye bona babe maphayona wesikhathi esizeleko?

Ungathabela ukutjhiya umndenakho nendawo yekhenu bona uyokurhatjha iindaba ezimnandi kwezinye iindawo? Iinkulungwana zaboFakazi zikwenze ngokuphumelelako lokhu, eqinisweni zithi “Nangu mina! Thuma mina.” (Isaya 6:⁠8) Ngokwenza njalo balingise iSithunywa sevangeli esikhulu ukuzidlula zoke, uJesu Krestu.​—⁠Jwanisi 7:⁠29.

Yindlela yokulingisa isibonelo sakaJesu. UJesu wathunywa nguZimu asuka ezulwini bona eze ephasini azokuhlala hlangana nabantu abanesono. Nanyana abona ukungabi nabulungiswa, uJesu azange alinge ukutjhugulula umphakathi. Wadzimelela khulukhulu emsebenzinakhe “wokutjhumayela iindaba ezilungileko”—okuyipendulo eemrarweni yesintu. (Luka 4:​43) Iinthunywa ezithembekileko zamaKrestu zilandela esibonelo sakhe.

Yipilo yokuzidela. Isithunywa sevangeli kufuze siphile ngendlela ejayelekileko, sizivumelanise namasiko, ubujamo bezulu obuhlukileko nokudla okungaba ngokuhlukileko kilokho esikujayeleko. Esikhathini esinengi, kutlhogeka ukufunda elinye ilimi bona ukhulumisane nabantu abasendaweni okiyo. Kungabizela nokuthi usebenzise iinkhwelo zesikade ukuyokufika eendaweni ezikude. Nezizakwenza ukuzidela okunjalo, iinthunywa zevangeli kufuze zithande abantu ezitjhumayela kibo.

Kutlhogeka ukubandulwa okuhle. AboFakazi abanengi abakhonza njengeenthunywa zevangeli baya esikolweni esithatha iinyanga ezihlanu, ISikolo SeBhayibhili SeGiliyadi. Isikolwesi siqinisa ukuthembela kwabo kuJehova, eLizwini lakhe nehlanganweni yakhe. (Iziyema 3:​5, 6) Sibasiza bahlawulele iimfanelo ezingokomoya ezitlhogeka emsebenzini wabo wokuba ziinthunywa zevangeli, namakghono abasiza bona babe bafundisi abangcono beBhayibhili. Ngemva kwalokho bakufaneleka khudlwana ukutjhumayela ‘bekuyofika emaqintelweni wephasi.’​—⁠IZenzo 1:⁠8.

• Kutlhogekani bona ube sithunywa sevangeli?

• Ngiyiphi ifundo ekhethekileko efunyanwa ziinthunywa zethu zevangeli?