Ungatjhidela Njani KuZimu?

1. Kghani uZimu ulalela yoke iimthandazo?

UZimu umema abantu bazo zoke iintjhaba bona batjhidele kuye ngomthandazo. (IRhalani 65:2) Nokho, akayilaleli, namtjhana akayamukeli, yoke iimthandazo. Ngokwesibonelo, iimthandazo yendoda engaphathi kuhle umkayo ingavimbezeleka. (1 Pitrosi 3:7) Godu, ama-Israyeli nekaragela phambili ngobumbi, uZimu wabhala ukulalela iimthandazo yawo. Ngokukhanyako, umthandazo ulilungelo. Namtjhana kunjalo, uZimu uzoyilalela iimthandazo yezoni ezone khulu nengabe ziyaphenduka.—Funda u-Isaya 1:15; 55:7.

2. Kufuze sithandaze njani?

Umthandazo uyingcenye yokukhulekela kwethu, ngalokho kufuze sithandaze kwaphela kuMbumbi wethu, uJehova. (Matewu 4:10; 6:9) Godu, njengombana singakapheleli, kufuze sithandaze ebizweni lakaJesu ngombana wafela izono zethu. (Jwanisi 14:6) UJehova akafuni sibuyelele iimthandazo esiyibambe ngehloko namtjhana etlolwe phasi. Ufuna sithandaze ngokusuka ehliziyweni yethu.—Funda uMatewu 6:7; Filipi 4:6, 7.

UMbumbi wethu angasizwa ngitjho namtjhana sithandaza buthule. (1 Samuweli 1:12, 13) Usimema bona sithandaze nanyana kunini, njengekuthomeni nekupheleni kwelanga, nesidlako, ngitjho nalokha nesineemraro.—Funda iRhalani 55:22; Matewu 15:36.

3. Kubayini amaKrestu ahlangana?

Ukutjhidela kuZimu akusilula ngombana siphila hlangana nabantu abanganakholo kuZimu nabadelela isithembiso sakhe sephasi elinokuthula. (2 Thimothi 3:1, 4; 2 Pitrosi 3:3, 13) Ngalokho sitlhoga ubudlelwano obukhuthazako nesikholwa nabo, nabo bayasitlhoga.—Funda KumaHebheru 10:24, 25.

Ukuhlangana nabantu abathanda uZimu kuyasisiza bona sitjhidele kuZimu. Iimhlangano yaboFakazi BakaJehova isinikela amathuba amahle wokuzuza ekholweni labanye.—Funda KwebeRoma 1:11, 12.

4. Ungatjhidela njani kuZimu?

Ungatjhidela kuJehova ngokucabangisisa ngalokho okufunde eLizwini lakhe. Cabanga ngalokho okufunda emsebenzinakhe, esilulekweni sakhe, neenthembisweni zakhe. Umthandazo wokucabangisisa wakha ukuthokozela ehliziywenethu ngethando lakaZimu nokuhlakanipha kwakhe.—Funda uJoshuwa 1:8; iRhalani 1:1-3.

Ungatjhidela kuZimu kwaphela nengabe uyamthemba, unekholo kuye. Kodwana ikholo linjengento ephilako etlhoga ukondliwa. Kufuze wondle ikholo lakho ngaso soke isikhathi ngokubuyekeza isisekelo salokho okukholelwako.—Funda uMatewu 4:4; Hebheru 11:1, 6.

5. Ukutjhidela kuZimu kuzokuzuzisa njani?

UJehova uyabatlhogomela labo abamthandako. Angabavikela kinanyana ngikuphi okungabeka ikholo nethemba labo lokuphila okungapheliko engozini. (IRhalani 91:1, 2, 7-10) Uyasiyelelisa ngeendlela zokuphila ezingasongela ipilo nethabo lethu. UJehova usifundisa indlela engcono khulu yokuphila.—Funda iRhalani 73:27, 28; Jakobosi 4:4, 8.