UJesu Uyavuswa

Ngemva kokuthi uJesu sele ahlongakele, uJosefa wabawa isidumbu sakhe kuPilatu. UJosefa waphuthela isidumbeso ngetjhila lelineni wasizesa nangeenongo, wasibulunga ethuneni. Ngemva kwalokho wageda ilitje elikhulu wavala ngalo umnyango wethuna. Abaphristi abakhulu batjela uPilatu ukuthi: ‘Sisaba ukuthi abafundi bakhe bangeba isidumbu sakhe, bese bathi ebantwini sekavukile ekufeni.’ UPilatu wathi: ‘Valani ithunelo benibeke umlindi aligade.’

Ngemva kwamalanga amathathu ekuseni, kwaba nabafazi abakhamba bayokuhlola ithuna, nabafika khona balifumana livuliwe. Ngaphakathapho bekunengilozi eyathi: ‘Ningesabi. UJesu sekavusiwe. Nina-ke khambani niyokutjela abafundi bakhe bayomhlangabeza eGalile.’

Msinyana uMariya Magdalina wagijima wayokufuna uPitrosi noJwanisi, wafese wathi kibo: ‘Kukhona othethe isidumbu sakaJesu.’ Bagijima babuyela ethuneni, nabafikako balifumana linganamuntu, bajika babuyela emzinabo.

UMariya wabuyela ethuneni godu, wabona iingilozi ezimbili ngethuneni wathi kizo: ‘Bathethe iKosami angazi nokuthi bayisephi.’ Wabona kujame enye indoda, wacabanga ukuthi mlimi wamasimu, wathi: ‘Mnumzana ngitjela lapho omuse khona.’ Indoda le yathi kuye: “Mariya!” nayitjho njalo, wezwa ukuthi lo nguJesu nanyana kungathiwani. Warhuwelela wathi: ‘Mfundisi!’ Watjho wamsingatha. UJesu wathi: ‘Khamba uyokutjela abafowethu ukuthi ungibonile.’ Khonokho wasuka ngebelo wayokutjela abafundi bonyana ubone uJesu.

Entambama yamhlokho, abafundi ababili bebasuka eJerusalema baya emzini we-Emawusi. Kwavela indoda yakhambisana nabo, yababuza nokuthi bakhuluma ngani. Bathi: ‘Awukwezwa litho bekube nje?’ Emalangeni amathathu adlulileko, abaphristi abakhulu babulele uJesu. Nje abanye abafazi ababili bathi sekavukile.’ Indoda le yababuza ukuthi: ‘Kghani anikukholelwa okwatjhiwo baphorofidi nabathi uKrestu uzakufa bese uyavuswa?’ Waragela phambili nokubahlathululela imiTlolo. Nabafika emzini we-Emawusi, babawa indoda abakhambisana nayo le bonyana ingene nabo. Nabaqeda ukuthandazela ukudla kwantambama, kwabakhanyela ukuthi indoda le nguJesu. Wabe wanyamalala khonokho.

Abafundaba barhaba msinyana babuyela eJerusalema ebapostolini, bafika babahlathululela koke okwenzekile. Nabasahlezi njalo ngendlini, uJesu wabonakala kibo boke kwanjesi. Ekuthomeni abapostolaba bebangakholwa ukuthi nguJesu lo. Wathi kibo: ‘Qalani izandla zami; ngithintani nizizwele ngokwenu ngombana kwatlolwa phasi kwathiwa uKrestu uzakuvuka ekufeni.’