UJehoyada Waba Nesibindi

UJezebheli bekanendodakazi, ibizo layo kungu-Ataliya begodu beyikhohlakele ifuze unina. U-Ataliya lo bekatjhade nekosi yakwaJuda. Kuthe indodakwakhe nayihlongakalako, indodanakhe yathoma ukubusa. Kodwana ngemva kokuhlongakala kwendodanakhe, u-Ataliya wazenza umbusi wakwaJuda. Walinga ngamandla ukubulala woke umuntu webukhosini, khona kungeze kwaba nomuntu ozamehlisa esihlalweni sobukhosi. Wabulala ngitjho neenzukulwana zakhe. Bekasatjwa ngiwo woke umuntu.

UmPhristi oPhakemeko uJehoyada nomkakhe uJehotjheba, bebazi kuhle bona into eyenziwa ngu-Ataliya ayikalungi nakancani. Babeka amaphilwabo engozini ngokuthi bafihle isizukulwana saka-Ataliya, ebesinguJowatjhi ibizo laso. Bamkhulisela ethempelini.

UJowatjhi nakahlanganisa iminyaka elikhomba, uJehoyada wabiza woke amakhosana namaLevi, wathi kiwo: ‘Jamani eminyango yethempeli begodu ningavumeli namunye angene.’ Ngemva kwalokho, uJehoyada wenza uJowatjhi bona abe yikosi yakwaJuda wamthwesa nesihlohlo. Abantu bakwaJuda bathokoza bathi: ‘Bayede! Ikosi ayisiphilele!’

Indlovukazi u-Ataliya nayizwa itjhada elenziwa babantu, yagijimela ethempelini. Kuthe nayibona ikosi etja, yakhihla isililo yathi: ‘Bugirikitjani! Bugirikitjani!’ Amakhosana ambamba, akhamba naye ayombulala. Kodwana kuthiwani ngomoya wekohlakalo ebesele awufake esitjhabeni?

UJehoyada wasisiza isitjhaba ngokuthi enze isivumelwano noJehova, esivumelwaneneso abantu bathembisa ukuthi bazokulotjha uJehova yedwa. UJehoyada wabayala bona batshidlhe ithempeli lakaBhali kuhlanganise neethombe ebebazilotjha. Wabeka abaphristi namaLevi bona basebenze ethempelini khona abantu bazokwazi ukuyokulotjha khona godu. Wabeka nabalindi bona bagade amasango wethempelini bona kungangeni muntu ongakahlanzeki ngaphakathi. Nasele aqedile, uJehoyada namakhosana bathatha uJowatjhi batjhinga naye esigodlweni bambeka esihlalweni sobukhosi. Abantu bakwaJuda bathaba kwamambala. Besele bakwazi ukulotjha uJehova batjhaphulukile egandelelweni laka-Ataliya begodu balisa nokulotjha uBhali. Uyabona ukuthi isibindi sakaJehoyada sasiza abantu abanengi kangangani?