Iingilozi Zibikezela Ngokubelethwa KwakaJesu

Umbusi weRoma uKhesari Arhostosi, wathi amaJuda woke kufuze abuyele emakhabo bona ayokutloliswa. Yeke uJosefa noMariya babuyela eBhetlehema, okukulapho umndeni kaJosefa obuya khona. Isikhathi sokuthi uMariya afumane umntwana besele sitjhidele.

Nabafika eBhetlehema ukuphela kwendawo yokuhlala ebebangahlala kiyo kungesitebeleni. Kulapho-ke uMariya abelethela indodanakhe khona uJesu. Wayiphuthela ngamatjhila, wayilalisa ngekerebheni.

Abelusi bebangaphandle ebusuku bamhlokho, beluse umhlambi hlanu kweBhetlehema. Kungakabiphi, ingilozi yajama phambi kwabo, bazonjwa kukhanya kwephazimulo kaJehova. Nababona lokho bangenwa mamanzi emadolweni, ingilozi yathi kibo: ‘Ningathukwa. Nginiphathele iindaba ezimnandi. UMesiya ubelethiwe namhlanjesi.’ Ngesikhatheso kwavela nezinye iingilozi emkayini zaba zinengi zathi: ‘Idumo kuZimu phezulu nokuthula ephasini.’ Ngemva kwalokho iingilozi zanyamalala. Benzani abelusi?

Abelusi bathi komunye nomunye: ‘Singasariyada asikhambeni siye eBhetlehema njenganje.’ Khonokho bakhamba baya esitebeleni bayokufuna uJosefa noMariya nomntwanabo.

Woke umuntu ozwe okwatjhiwo ziingilozi bekararekile. UMariya wacabangisisa ngakho begodu akhenge akulibale. Abelusi babuyela emhlambinabo, bathokoza uJehova ngabakubonileko nabakuzwileko.