Khuyini Ukulotjha?

Ukulotjha kungahlathululwa “njengesenzo sokutjengisa ihlonipho nethando ngozimu.” EBhayibhelini ilimi lokuthoma nalikhuluma ngebizo elithi ‘ukulotjha’ lingadlulisela umqondo womuntu otjengisa ihlonipho edephileko namtjhana ukuzinikela ngokupheleleko entweni ethileko. (Mat. 28:9) Amezwi la angabuye atjho izenzo zokulotjha uZimu namkha isithombe esilotjhwako. (Jwa. 4:23, 24) Ummongo wendaba ngiwo ozokutjho ukuthi amabizo la kufuze siwazwisise njani.

NguJehova kwaphela uMbumbi noMbusi weNdawo yoke ofanelwe kukuthi simlotjhe ngeenhliziyo ezipheleleko. (IsAm. 4:10, 11) Silotjha uJehova ngokuhlonipha ilungelo lakhe lokubusa negama lakhe. (Rhu. 86:9; Mat. 6:9, 10) Iinhloko ezimbilezi—ilungelo lakaJehova lokubusa negama lakhe—kukhulunywa ngazo khulu encwadini kaHezekiyeli. Amagama athi, “IKosi ePhakemeko uJehova” asetjenziswe iinkhathi ezima-217 encwadini kaHezekiyeli kwaphela, umutjho othi “nazi ukuthi nginguJehova,” uvela iinkhathi ezima-55.—Hez. 2:4; 6:7.

Nanyana kunjalo, ukulotjha kwethu akusimumuzwa kwaphela, kunalokho kubandakanya nezenzo. (Jak. 2:26) Nasinikela ukuphila kwethu kuJehova, siyafunga ukuthi kizo zoke iingcenye zokuphila kwethu, sizomlalela njengeKosi ephakemeko sitjengise nehlonipho edephileko negameni lakhe. Khumbula ukuthi nakaphendula esilingweni sesithathu, uJesu wahlobanisa ukulotjha ‘nomsebenzi ocwengileko.’ (Mat. 4:10) Njengombana siziinceku zakaJehova, sizimisele ukumsebenzela.a (Dut. 10:12) Silotjha uZimethu nasenza imisebenzi ecwengileko nefuna sizidele. Ngimiphi imisebenzi leyo?

Imisebenzi ecwengileko iza ngeendlela ezihlukahlukeneko, yoke iligugu kuJehova. Senza umsebenzi ocwengileko nasitjhumayela kwabanye, siba nengcenye emihlanganweni, eWolweni lomBuso, begodu sitlhogomela besakhe iindawo esibambela kizo imihlangano. Ukungezelela kilokho, sinikela umsebenzi ocwengileko nasihlanganyela ekulotjheni komndeni, sisekela umsebenzi wokuhlangula ngokusiza abafowethu, ngokusiza emihlanganweni yesifunda, namkha ngokusebenza eBethel. (Heb. 13:16; Jak. 1:27) Nangabe ukulotjha kweqiniso kuza qangi eengqondweni neenhliziyweni zethu, sizokunikela “umsebenzi ocwengileko ubusuku nemini.” Kungebanga lokuthi siyakuthabela ukulotjha uZimethu, uJehova!—IsAm. 7:15.