Umhlangano oyiqophamlando wango-1919 watjengisa ubufakazi obunamandla bokuthi abantu bakaZimu batjhatjhululiwe eBhabhiloni eliKhulu
IBHOKSI LOKUFUNDISA 9B
Kubayini Sithi Ngo-1919?
Kubayini sithi abantu bakaZimu batjhatjhululwa ekubeni ziingqila eBhabhiloni eliKhulu ngo-1919? Nasicabangisisa ngesiphorofido seBhayibheli namaqiniso womlando, kusisiza sifinyelele isiphethweso.
Isiphorofido seBhayibheli kunye nomlando kutjengisa ngokukhanyako bona uJesu wathoma ukubusa ezulwini waba yiKosi ngo-1914, okutjho ukuthoma kokuphela kwamalanga wephasi lakaSathana. Khuyini uJesu ayenzileko nakaba yiKosi? Inga-kghani wazitjhaphulula ngesikhatheso iinceku zakhe ezisephasini ekugandelelweni yiBhabhiloni eliKhulu? Kghani wabeka “inceku ethembekileko nehlakaniphileko” ngo-1914 begodu yathoma nomsebenzi wokuvuna?—Mat. 24:45.
Ubufakazi butjengisa bona akhenge kube njalo. Khumbula, umpostoli uPitrosi waphefumulelwa ukuthi atlole ukuthi isahlulelo ‘besizokuthoma endlini kaZimu.’ (1 Pit. 4:17) Umphorofidi uMalaki naye wabikezela ngesikhathi uJehova ayokufika ngaso endlinakhe yokulotjhela akhamba “nesithunywa sesivumelwano,” iNdodana kaZimu. (Mal. 3:1-5) Leso bekuzokuba sikhathi sokuhlungwa nokulingwa. Kghani umlando uyavumelana neemphorofidwezo?
Iye uyavumelana! Hlangana kwaka-1914 kuya ekuthomeni kwaka-1919 bekusikhathi esibudisi khulu, isikhathi sokulingwa nokuhlungwa kwabaFundi beBhayibheli, abaziwa ngokuthi boFakazi bakaJehova namhlanjesi. Ngo-1914 abantu abanengi bakaZimu badana lokha isiphelo singafiki ngesikhathi ebebasilindele. Badana khulu ngo-1916, nakuhlongakala uCharles T. Russell, obekadosa phambili abantu bakaZimu ngetjiseko. Labo ebebamthanda ngokweqileko umFowethu uRussell akhenge bathande lokha nakujanyiswa umfowethu uJoseph F. Rutherford, owangena esikhundleni sakaRussell. Kwaba nokuhlukana okwapheze kwaphadlhula ihlangano phakathi ngo-1917. Kwathi ngo-1918, ngebanga labafundisi, umFowethu Rutherford nabakhambisani bakhe abalikhomba babekwa umlandu ongakabafaneli, bagwetjwa bebabotjhwa. UMzimkhulu weBrooklyn wavalwa. Kuyakhanya bona abantu bakaZimu bebangakatjhatjhululwa eBhabhiloni eliKhulu!
Kwenzekani ngo-1919? Izinto zatjhuguluka ngokuphazima kwelihlo! Nakuthoma umnyaka, uRutherford nabakhambisani bakhe batjhatjhululwa ngejele begodu babuyela emsebenzini! Msinyana, kwahlelwa umhlangano oyiqophamlando begodu kwahlelwa ukuthi kuzokugadangiswa umagazini omutjha, obizwa ngokuthi yiGolden Age, (nje owaziwa ngokuthi yiPhaphama!). Umagazini lo wenzelwa ijima lokutjhumayeza abantu. Ukungezelela kilokho, kwelinye nelinye ibandla kwabekwa umtlhogomeli bona ahlele bekathuthukise umsebenzi wokutjhumayela. Ngomnyaka loyo kwakhutjhwa iBulletin (nje eyaziwa ngokuthi Ipilo Nomsebenzi WobuKrestu) ukusiza ukuhlela umsebenzi wokutjhumayela.
Bekwenzekeni? Kuyakhanya bona uKrestu watjhaphulula abantu bakhe ekuthunjweni liBhabhiloni eliKhulu. Wajamisa incekwakhe ethembekileko nehlakaniphileko. Umsebenzi wokuvuna besele uthomile. Kusukela ngomnyaka loyo oqakathekileko ka-1919, umsebenzi waragela phambili ngezinga elikarisako.