IBhayibheli likhuluma khulu ngomBuso kaZimu. UJehova uzokusebenzisa umBuso loyo bona afezekise ihloswakhe yekuthomeni ngephasi. Uyini umBuso? Sazi njani bona sewuyabusa nje? Khuyini esele ukwenzile? Begodu uzokwenzani esikhathini esizako? Isifundwesi nezimbili ezilandelako zizokuphendula imibuzo le.

1. Uyini umBuso kaZimu begodu ngubani iKosawo?

UmBuso ngurhulumende ohlonywe nguJehova uZimu. IKosawo uJesu Krestu, ibusa isezulwini. (Matewu 4:17; Jwanisi 18:36) IBhayibheli lithi uJesu, “uzokuba yiKosi . . . ngokungapheliko.” (Lukasi 1:32, 33) Njengombana ayiKosi yomBuso kaZimu, uJesu uzokubusa boke abantu ephasini.

2. Ngubani obusa noJesu?

UJesu akabusi ayedwa. Abantu abavela “kizo zoke iinkoro, amalimi, abantu neentjhaba . . . bazokubusa njengamakhosi phezu kwephasi.” (IsAmbulo 5:9, 10) Bangakhi abozokubusa noKrestu? Njengombana uJesu eza ephasini, amamiliyoni wamaKrestu aba balandeli bakhe. Kodwana bazii-144 000 kwaphela abazokubusa noJesu ezulwini. (Funda IsAmbulo 14:1-4.) Woke amanye amaKrestu ephasini azokuba zizakhamuzi zomBuso.—IRhubo 37:29.

3. Kubayini umBuso kaZimu ungcono kunaborhulumende babantu?

Ngitjho nalokha ababusi babantu balinga ukwenza izinto ezihle, abanawo amandla wokwenza koke abakufunako. Ngokukhamba kwesikhathi bayasuswa, kube nabanye ababusi abanganandaba nabantu. Kodwana uMbusi womBuso kaZimu, uJesu, angekhe ajanyiselelwe ngomunye umuntu. UZimu “uzokubeka umbuso ongekhe utjhatjalaliswe.” (Danyela 2:44) UJesu uzokubusa ephasini loke begodu uzokuphatha abantu kuhle. Unethando, umusa nobulungiswa begodu uzokufundisa abantu bona baphathane ngendlela efanako, ngethando, ngomusa nangobulungiswa.—Funda u-Isaya 11:9.

4. Urhulumende onamandla uzokubusa ephasini loke

UJesu Krestu unamandla wokubusa ukudlula woke umbusi okhe waba khona. Funda uMatewu 28:18, bese nicoca ngombuzo lo:

• Ukubusa kwakaJesu kuhluke njani ekubuseni kwabantu?

Aborhulumende babantu bayatjhuguluka begodu umbusi ngamunye ubusa ingcenye ethileko kwaphela yephasi. Kuthiwani ngomBuso kaZimu? Funda uDanyela 7:14, bese nicoca ngemibuzo le:

• Kubayini kukuhle ukuthi umBuso kaZimu angekhe ‘utjhatjalaliswe’?

• Kubayini kukuhle ukuthi uyokubusa ephasini loke?

5. Ababusi babantu kufuze basuswe

Kubayini umBuso kaZimu kufuze ususe abarhulumende babantu? Dlala IVIDIYO, bese nicoca ngemibuzo elandelako.

IVIDIYO: Uyini UmBuso KaZimu?—Isiqetjhana (1:41)

• Ube yini umphumela wokubusa kwabantu?

Funda uMtjhumayeli 8:9, bese nicoca ngemibuzo le:

• Ucabanga ukuthi kufanele na bona umBuso kaZimu ususe aborhulumende babantu? Kubayini?

6. UmBuso kaZimu unababusi abasizwisisako

Ngebanga lokuthi iKosethu uJesu yaphila njengomuntu, ‘izwelana nokubogaboga kwethu.’ (Hebheru 4:15) Amadoda nabafazi abathembekileko abazii-144 000 abayokubusa noJesu, bakhethwe nguJehova “kizo zoke iinkoro, amalimi, abantu neentjhaba.”—IsAmbulo 5:9.

• Kuyakukhuthaza na bona uJesu nabo boke ayokubusa nabo bakhe baba babantu? Kubayini?

7. UmBuso kaZimu unemithetho engcono ukudlula yaborhulumende babantu

Aborhulumende babeka imithetho abacabanga bona izokuzusisa begodu ivikele izakhamuzi zabo. NomBuso kaZimu unemithetho izakhamuzi zawo ekufuze ziwulandele. Funda yoku-1 kwebeKorinte 6:9-11, bese nicoca ngemibuzo le:

• Ucabanga bona iphasi lizokuba njani woke umuntu nakalalela imithetho kaZimu?a

• Ucabanga ukuthi uJehova unelungelo lokulindela bona izakhamuzi zomBuswakhe zilandele imithetho le? Kubayini?

• Khuyini etjengisa bona abantu abangalandeli imithetho le bangatjhuguluka?—Funda ivesi 11.

ISIRHUNYEZO

UmBuso kaZimu ngurhulumende wamambala osezulwini ozokubusa iphasi loke.

Buyekeza

• Bobani ababusi bomBuso kaZimu?

• UmBuso kaZimu ungcono ngayiphi indlela kunaborhulumende babantu?

• Ngiziphi ezinye izinto uJehova azilindele ezakhamuzini zomBuswakhe?

HLOLA OKUNGENZASI

Funda ngalokho uJesu akufundisako ngokuthi umBuso lo ukuphi.

“Inga-kghani UmBuso KaZimu Usehliziywenakho?” (Isihloko esiku-jw.org)

Kubayini aboFakazi bakaJehova bakhetha ukuthembela emBusweni kaZimu kunokuthembela ekubuseni kwabantu?

Ukuzinikela EmBusweni KaZimu (1:43)

Hlolisisa okuhlathululwa yiBhayibheli ngabazii-144 000 uJehova abakhethe bona bayokubusa noJesu.

“Bobani Abaya Ezulwini?” (Isihloko esiku-jw.org)

UmBuso kaZimu wathoma ukubusa ezulwini ngo-1914. Kulapho imihla yokuphela kokubusa komuntu eyathoma khona. Sazi njani? Cabangisisa ngeemphorofido zeBhayibheli nangendlela abantu ebebaziphatha ngayo kusukela ngo-1914.

1. IBhayibheli labikezelani?

Incwadi yeBhayibheli kaDanyela yatjengisa bona umBuso kaZimu uzokuthoma ukubusa ekupheleni ‘kweenkhathi ezilikhomba.’ (Danyela 4:16, 17) Eminyakeni eminengi eyalandelako, uJesu waqalisela kiso isikhatheso wathi, ‘ziinkhathi ezibekiweko zeentjhaba’ bewafundisa ukuthi azikapheli. (Lukasi 21:24) Njengombana sizokubona, iinkhathi ezilikhomba ziphele ngomnyaka ka-1914.

2. Khuyini eyenzeka ephasini begodu abantu bebasolo baziphatha njani kusukela ngo-1914?

Abafundi bakaJesu bambuza bathi, “Sizokuba yini isibonakaliso sokuba khona kwakho nesokuphela kwephasi?” (Matewu 24:3) Nakaphendulako, uJesu wabikezela izinto ezinengi ebezizokwenzeka nakathoma ukubusa njengeKosi yomBuso kaZimu. Lokhu bekuhlanganisa ipi, ukutlhayela kokudla nokusikinyeka kwephasi. (Funda uMatewu 24:7.) IBhayibheli labikezela nokuthi indlela abantu abaziphatha ngayo “emihleni yokuphela” izokwenza ipilo ibe “budisi.” (2 Thimothi 3:1-5) Izinto ezenzekako nendlela abantu abaziphatha ngayo kwathoma ukubonakala khulu kusukela ngo-1914.

3. Kubayini iphasi lathoma ukuba limbi khulu kusukela umBuso kaZimu wathoma ukubusa?

Ngemva kobana uJesu abe yiKosi yomBuso kaZimu, walwa noSathana namadimoni ezulwini. USathana wahlulwa epini leyo. IBhayibheli lithi ‘waphoselwa phasi ephasini, neengilozi zakhe zaphoselwa phasi naye.’ (IsAmbulo 12:9, 10,12) USathana usilingekile ngombana uyazi ukuthi uzokubhujiswa. Yeke ubanga ubuhlungu nokutlhaga ephasini loke. Kungebangelo ubujamo bephasi bubumbi kangaka. UmBuso kaZimu uzokulungisa yoke imiraro le.

FUNDA NGOKUNGENELELEKO

4. Ukulandelana kwesikhathi seBhayibheli okuveza u-1914

IVIDIYO: UmBuso KaZimu Wathoma Ukubusa Ngo-1914 (5:02)

UZimu wabangela iKosi yeBhabhiloni lekadeni uNebukadinetsari bona ibhudange ngesiphorofido. Ibhudangwelo nehlathululo eyanikelwa nguDanyela itjengisa bona ibhudangwelo belimalungana nokubusa kwakaNebukadinetsari nomBuso kaZimu.—Funda uDanyela 4:17.a

Funda uDanyela 4:20-26, bese usebenzisa itjhadi ekuphenduleni imibuzo elandelako:

• (A) UNebukadinetsari wabonani ebhudangweni lakhe?—Funda ivesi 20 no-21.

• (B) Kuzokwenzekani ngomuthi?—Funda ivesi 23.

• (C) Kuzokwenzekani ekupheleni ‘kweenkhathi ezilikhomba’?—Funda ivesi 26.

Umuthi uhlangana njani nomBuso kaZimu?

ISIPHOROFIDO (Danyela 4:20-36)

Ukubusa

(A) Umuthi omkhulu

Ukubusa kwaphazamiseka

(B) “Quntani umuthi” bekudlule “iinkhathi ezilikhomba”

Ukubusa kuyavuselelwa

(C) “Umbuswakho uzokuba ngowakho godu”

Ukuzaliseka kokuthoma kwesiphorofidwesi . . .

• (D) Umuthi lo bewufanekisela bani?—Funda ivesi 22.

• (E) Ukubusa kwakhe kwaphazamiseka njani?—Funda uDanyela 4:29-33.

• (F) Kwenzekani kuNebukadinetsari ekupheleni ‘kweenkhathi ezilikhomba’?—Funda uDanyela 4:34-36.

UKUZALISEKA KOKUTHOMA

Ukubusa

(D) UNebukadinetsari iKosi yeBhabhiloni

Ukubusa kwaphazamiseka

(E) Ngemva kwaka-606 B.C.E uNebukadinetsari wahlanganelwa yihloko wabhalelwa kubusa iminyaka elikhomba

Ukubusa kuyavuselelwa

(F) UNebukadinetsari waqaquluka, wathoma ukubusa godu

Ukuzaliseka kwesibili kwesiphorofidwesi . . .

• (G) Umuthi bewufanekisela bani?—Funda yoku-1 yeenKronike 29:23.

• (H) Ukubusa kwabo kwaphazamiseka njani? Sazi njani bona ukubusokhu bekusaphazamisekile uJesu nakasephasina?—Funda uLukasi 21:24.

• (I) UmBuso lo wavuselelwa nini begodu kuphi?

UKUZALISEKA KWESIBILI

Ukubusa

(G) Amakhosi wakwa-Israyeli ajamiselele ukubusa kwakaZimu

Ukubusa kwaphazamiseka

(H) IJerusalema latjhatjalaliswa, okuphazamisa irhelo lokubusa kwamakhosi wakwa-Israyeli iminyaka ezii-2 520

Ukubusa kuyavuselelwa

(I) UJesu wathoma ukubusa ezulwini njengeKosi yomBuso kaZimu

5. Iphasi latjhuguluka kusukela ngo-1914

Dlala IVIDIYO.

IVIDIYO: Iphasi Latjhuguluka Kusukela Ngo-1914 (1:10)

UJesu wabikezela bona iphasi lizokuba njani ngemva kobana abe yiKosi. Funda uLukasi 21:9-11, bese nicoca ngombuzo lo:

• Kilokho esifunde ngakho, ngikuphi okubonileko namkha ozwe ngakho?

Umpostoli uPowula wahlathulula bona abantu bazokuba njani emihleni yokuphela yokubusa komuntu. Funda yesi-2 kaThimothi 3:1-5, bese nicoca ngombuzo lo:

• Ngimiphi imikghwa oyibonileko ebantwini namhlanjesi kileyo esifunde ngayo?

6. Ukubusa komBuso kaZimu kufuze kusikhuthaze

Funda uMatewu 24:3, 14, bese nicoca ngemibuzo le:

• Ngimuphi umsebenzi oqakathekileko otjengisa bona umBuso kaZimu uyabusa nje?

• Ungahlanganyela njani emsebenzini lo?

UmBuso kaZimu uyabusa nje begodu ilanga lokuthi ubuse ngokupheleleko ephasini litjhidele. Funda amaHebheru 10:24, 25, bese nicoca ngombuzo lo:

• Khuyini soke ekufuze siyenze njengombana ‘sibona ilanga litjhidela’?

ISIRHUNYEZO

Iimphorofido zeBhayibheli, irhelo lokulandelana kwazo nezinto ezenzeka ephasini zitjengisa bona umBuso kaZimu uyabusa. Sitjengisa bona siyakukholelwa lokhu ngokutjhumayela ngakho nokuya emihlanganweni yebandla.

Buyekeza

• Khuyini eyenzekako ekupheleni kweenkhathi ezilikhomba okwakhulunywa ngazo encwadini yeBhayibheli kaDanyela?

• Khuyini ekuqinisekisako bona umBuso kaZimu uthome ukubusa ngo-1914?

• Ungatjengisa njani bona uyakholelwa ukuthi umBuso uyabusa nje?

HLOLA OKUNGENZASI

Funda indlela isiphorofido esikuMatewu 24:14 esathinta ngayo ipilo yenye indoda.

“Bengithanda I-Baseball Ukudlula Nanyana Yini!” (IsiThala No. 3 2017)

Sazi njani bona isiphorofido esitlolwe kuDanyela isahluko 4 sikhuluma ngomBuso kaZimu?

“UmBuso KaZimu Wathoma Nini Ukubusa? (Ingcenye 1)” (IsiThala, Oktoba 1, 2014)

Yini etjengisa bona iinkhathi ezilikhomba okukhulunywa ngazo kuDanyela isahluko 4 zaphela ngo-1914?

“UmBuso KaZimu Wathoma Nini Ukubusa? (Ingcenye 2)” (IsiThala, Novemba 1, 2014)

UmBuso kaZimu sewuyabusa. Kungasikade uzokwenza amatjhuguluko amakhulu ephasini. Akhesicoce ngezinye izinto ezihle esingaqala phambili kizo nasekubusa umBuso kaZimu.

1. UmBuso kaZimu uzokuletha njani ukuthula nobulungiswa ephasini?

UJesu iKosi yomBuso kaZimu, uzokutjhabalalisa abantu abakhohlakeleko naborhulumende ngepi ye-Arimagedoni. (IsAmbulo 16:14, 16) Ngesikhatheso, kuzokuzaliseka isithembiso esiseBhayibhelini esithi: “Sekusele kancani ukuthi abakhohlakeleko bangasaba khona.” (IRhubo 37:10) UJesu uzokusebenzisa umBuso ukuqinisekisa bona iphasi loke linokuthula nobulungiswa.—Funda u-Isaya 11:4.

2. Ipilo izokuba njani nakwenziwa intando kaZimu ephasini?

Nakubusa umBuso kaZimu, “abalungileko bazokufumana iphasi njengelifa begodu bazokuhlala kilo ngokungapheliko.” (IRhubo 37:29) Akhuzicabange uphila ephasini elinabantu abalungileko, abathanda uJehova nabathandanako! Akunamuntu ozokugula begodu woke umuntu uzokuphila ngokungapheliko.

3. UmBuso kaZimu uzokwenzani ngemva kokuthi kutjhatjalaliswe abantu abakhohlakeleko?

Ngemva kokuthi abakhohlakeleko batjhatjalalisiwe, uJesu uzokubusa njengeKosi iminyaka eyi-1 000. Ngesikhatheso, yena nabazii-144 000 abayokubusa naye, bazokusiza abantu ephasini bona bangasabi nesono. Nakuphela isikhatheso, iphasi lizokuba yipharadesi elihle elizele abantu abathabileko abazuza ngokulalela umthetho kaJehova. Ngemva kwalokho uJesu uzokubuyisela umbuso kuBabakhe, uJehova. ‘Igama [lakaJehova] lizokucwengiswa.’ (Matewu 6:9, 10) Kuzabe sekubonakele bona uJehova Mbusi olungileko onendaba nabantu bakhe. UJehova uzokubhubhisa uSathana, amadimoni nabanye abakhetha ukuvukela umbuswakhe. (IsAmbulo 20:7-10) Izinto ezihle ezilethwe mBuso kaZimu zizokuhlala unomphela.

FUNDA NGOKUNGENELELEKO

4. UmBuso KaZimu uzokuqeda boke aborhulumende babantu

“Ngesikhathi umuntu abusa omunye kwaba kulimala kwakhe.” (UMtjhumayeli 8:9) UJehova uzokusebenzisa umBuswakhe ukulungisa umonakalo obangelwe kungabi nobulungiswa.

Funda uDanyela 2:44 neyesi-2 kwebeThesalonika 1:6-8, bese nicoca ngemibuzo le:

• UJehova nendodanakhe uJesu, bazokwenzani ngaborhulumende babantu nalabo ababalandelako?

• Lokho okufundileko ngoJehova noJesu kukuqinisekisa njani bona izenzo zabo zizokuba ngezilungileko nezinobulungiswa?

5. UJesu yiKosi ephuma phambili

NjengeKosi yomBuso kaZimu, uJesu uzokusiza abantu ephasini ngeendlela ezinengi. Dlala IVIDIYO ubone ukuthi uJesu utjengise njani bona unesifiso namandla awaphiwe nguZimu wokusiza abantu.

IVIDIYO: UJesu Waveza Lokho UmBuso KaZimu Ozokwenza (1:13)

Izinto uJesu azenza nakasephasini zisibonelo salokho umBuso ozokwenza. Ngiziphi iimbusiso ezitlolwe la oqale phambili ukuzibona? Funda imitlolo ekhambisana neembusiswezo.

6. UmBuso kaZimu uzokuletha ingomuso elihle

IVIDIYO: Qala Okuzokwenzeka Ephasini Elitjha (4:38)

Funda iRhubo 145:16, bese nicoca ngombuzo lo:

• Kukwenza uzizwe njani ukwazi bona uJehova uzokwanelisa “iimfiso zakho koke okuphilako”?

ISIRHUNYEZO

UmBuso kaZimu uzokwenza lokho uZimu afuna ukuthi ukwenze. Uzokwenza iphasi lizale ngabantu abalungileko abazokulotjha uJehova ngokungapheliko.

Buyekeza

• UmBuso kaZimu uzolicwengisa njani igama lakaJehova?

• Kubayini siqiniseka ukuthi umBuso kaZimu uzokuzalisa iinthembiso zeBhayibheli?

• Ezintweni ezizokwenziwa mBuso kaZimu ngiyiphi oqale phambili ukuyibona?

HLOLA OKUNGENZASI

Fumana bona iyini i-Arimagedoni.

“Iyini Ipi Ye-Arimagedoni?” (Isihloko esiku-jw.org)

Tjheja okuzokwenzeka hlangana nokubusa kwakaJesu kweminyaka eyi-1 000 nekupheleni kwayo.

“Luyini Usizi Olukhulu?” (Isihloko esiku-jw.org)

Qala indlela imindeni engazindla ngayo ndawonye ngeembusiso ezizako zomBuso.

Zibone UsePharadesi (1:50)