Inga-kghani Yoke Iminyanya Iyamthabisa UZimu?

UJehova ufuna sithabele ipilo begodu sizithabise ngezinye iinkhathi. Kodwana inga-kghani yoke iminyanya namaholideyi ayamthabisa? Singatjengisa njani bona siyamthanda uJehova endabeni le?

1. Kubayini iminyanya eminengi ingamthabisi uJehova?

Bewazi na bona iminyanya eminengi isekelwe eemfundisweni ezingasuki eBhayibhelini, nokuthi zisuka ebantwini abangamlotjhi uJehova? Iminyanya enjalo ihlobene nekolo yamanga. Kungenzeka ihlobene nemimoya nekolelweni yokuthi umphefumulo awufi. Eminye iminyanya isekelwe emangeni nekolelweni yetjhudu. (Isaya 65:11) UJehova uyelelisa abantu abamlotjhako, uthi, “Nizihlukanise . . . nilise ukukghwatha into engakahlwengeki.”—2 Korinte 6:17.a

2. UJehova uzizwa njani ngeminyanya ehlonipha abantu khulu?

UJehova usiyelelisa ngokuthi singaweli esithiyweni ‘sokuthembela ebantwini.’ (Funda uJoromiya 17:5.) Amanye amaholideyi ahlonipha ababusi namkha amasotja. Amanye ahlonipha itshwayo lenarha namkha itjhaphuluko. (1 Jwanisi 5:21) Kuthi kusesenjalo, eminye iminyanya isekela zepolotiki namkha zokulwela amalungelo wabantu. UJehova angazizwa njani nasihlonipha khulu umuntu namkha ihlangano ethileko, khulukhulu ethuthukisa ifundiso ephikisana nehloswakhe?

3. Kuziphatha okunjani okungenza iminyanya ingamukeleki?

IBhayibheli liyakwala ‘ukurhamula khulu, iminyanya engalawulekiko, namaphaliswano wokurhamula.’ (1 Pitrosi 4:3) Eminye iminyanya inabantu abangakghoni ukuzilawula, abangakghoni ukuzibamba nabangaziphathi kuhle. Bona sihlale sibangani bakaJehova, kufuze sikubalekele ukuziphatha kumbi okunjalo.

FUNDA NGOKUNGENELELEKO

4. Gegeda amaholideyi angamhloniphi uJehova

Funda u-Efesu 5:10, bese nicoca ngemibuzo le:

• Khuyini ekufuze siqiniseke ngayo nasiqunta bona sizoligidinga na iholideyi elithileko?

• Ngimaphi amaholideyi ajayelekileko lapha uhlala khona?

• Ucabanga bona amaholideyi lawo ayamthabisa uJehova?

Ngokwesibonelo, khewazibuza na bona uZimu uzizwa njani ngokugidinga amalanga wokubelethwa? IBhayibheli alikhulumi ngomuntu olotjha uJehova agidinga ilanga lokubelethwa, kunalokho likhuluma ngokugidingwa kwamalanga wamabeletho wabantu ababili ebebangamlotjhi. Funda uGenesisi 40:20-22 noMatewu 14:6-10. Bese nicoca ngemibuzo le:

• Khuyini okufanako ekugidingeni kokubili kwamalanga wokubelethwa la?

• Ngokuya ngokwemitlolo le, ucabanga bona uJehova uzizwa njani ngamalanga wokubelethwa?

Ungazibuza, ‘Inga-kghani uJehova unayo na indaba nangigidinga amalanga wokubelethwa namkha eminye iminyanya engakasekelwa eBhayibhelini?’ Funda u-Eksodusi 32:1-8. Ngemva kwalokho dlala IVIDIYO, bese nicoca ngemibuzo elandelako.

IVIDIYO: Amaholideyi Neminyanya Engamthabisi UZimu (5:07)

• Kubayini kufuze siqiniseke ngalokho okwamukelekako kuJehova?

• Singakwenza njani lokho?

Singazi njani bona iminyanya ethileko ayimthabisi uZimu?

• Kghani isekelwe eemfundisweni ezingakasekelwa emtlolweni? Bona ufumane lokho funisisa ngemisuka yayo.

• Inga-kghani ihlonipha abantu ngokudluleleko, iinhlangano namatshwayo weentjhaba? Sihlonipha uJehova kikho koke begodu sithembele kuye bona ararulule imiraro yephasi.

• Inga-kghani okwenziwa eminyanyeni leyo kuphikisana neenkambiso zeBhayibheli? Kufuze sihlale sihlanzekile ngendlela esiziphatha ngayo.

5. Siza abanye bahloniphe okukholelwako

IVIDIYO: Hlathulula Iinkolelo Zakho Ngomusa (2:01)

Funda uMatewu 7:12, bese nicoca ngemibuzo le:

• Ngokuya ngokweveseli, kufanele na bona utjele amalunga womndenakho angakholwako bona akukafuzi agidinge amaholideyi?

• Khuyini ongayenza bona uqinisekise umndenakho bona nanyana ungeze ugidinge nawo uyawuthanda begodu unendaba nawo?

6. UJehova ufuna sithabe

UJehova ufuna sithabele iinkhathi ezimnandi nomndenethu nabangani. Funda uMtjhumayeli 8:15, bese nicoca ngombuzo lo:

• Iveseli litjengisa njani bona uJehova ufuna sithabe?

UJehova ufuna abantu bathabe begodu babeneenkhathi ezimnandi ndawonye. Dlala IVIDIYO ubone ubufakazi balokho emhlanganwenethu weentjhabatjhaba.

IVIDIYO: Ukutjengisa Umusa Emhlanganweni Wentjhabatjhaba (6:10)

Funda kwebeGalatiya 6:10, bese nicoca ngemibuzo le:

• Kghani kufuze sigidinge amaholideyi adumileko bona senze “okuhle” kwabanye?

• Khuyini engakwenza uthabe khudlwana, kukupha ngombana kulindeleke bona uphe ngebanga leholideyi elithileko namkha kukupha ngombana ufuna ukwenza njalo?

• AboFakazi abanengi ngeenkhathi ezithileko bahlelela abantwana babo okuthileko baze babaphe nezipho. Nangabe unabantwana ngiziphi izinto ezikhethekileko ongabenzela zona?

ISIRHUNYEZO

UJehova ufuna sithabele ukuba nesikhathi nomndeni nabangani. Kodwana ufuna sigegede iminyanya engamthabisiko.

Buyekeza

• Ngimiphi imibuzo esingayibuza bona sifumane ukuthi iminyanya ethileko ayimthabisi uJehova?

• Singawusiza njani umndeni nabangani bethu bazwisise iinqunto zethu ezimalungana namaholideyi?

• Wazi njani bona uJehova ufuna uthabe begodu wenze izinto ezikuthabisako?

HLOLA OKUNGENZASI

Cabangela amaholideyi athileko amaKrestu okungakafuzi awagidinge.

“Kubayini AboFakazi BakaJehova Bangawagidingi Amanye Amaholideyi?” (Isihloko esiku-jw.org)

Funda ngamabanga amane asenza sikholwe bona ukugidinga amalanga wokubelethwa akumthabisi uJehova.

“Kubayini AboFakazi BakaJehova Bangagidingi Amalanga Wokubelethwa?” (Isihloko esiku-jw.org)

Qala indlela abantwana abancani abathanda uJehova abangamthabisa ngayo ngesikhathi samaholideyi.

Uqakathekile KuJehova (11:35)