Inga-kghani Ukulungele Ukubhajadiswa?

Sele ufunde izinto ezinengi ngoJehova njengombana ufunda iBhayibheli. Kungenzeka kunamatjhuguluko owenzileko bona usebenzise okufundileko. Kodwana kungaba nento ekwenza uzizwe ungakakulungeli ukuzinikela kuJehova begodu ubhajadiswe. Isifundwesi sizokucoca ngeenqabo ezijayelekileko zokubhajadiswa nokuthi ungazihlula njani.

1. Kunengi kangangani ekufuze ukwazi ngaphambi kobana ubhajadiswe?

Bona ubhajadiswe kufuze ‘ufikelele elwazini elinembileko leqiniso.’ (1 Thimothi 2:4) Lokho akutjho bona kufuze wazi koke abakubuza khona ngeBhayibheli ngaphambi kobana ubhajadiswe. Ngitjho namaKrestu esele kukade abhajadiswa asaragela phambili afunda. (Kolose 1:9, 10) Kodwana kufuze uzwisise iimfundiso zeBhayibheli ezisisekelo. Abadala bebandla bazokusiza wazi bona unelwazi elaneleko na.

2. Ngimaphi amanye amagadango ekufuze uwathathe ngaphambi kobana ubhajadiswe?

Ngaphambi kobana ubhajadiswe, kufuze ‘utjhuguluke, ubuye.’ (Funda izEnzo 3:19.) Lokhu kutjho ukuthi uzisola khulu ngezono ozenzileko bese ubawa uJehova akulibalele. Ulwela ukulisa ukwenza okumbi begodu uzimisele ukuphila ngendlela ethabisa uZimu. Ukungezelela kilokho, uthoma ukuya esifundweni nokutjhumayela nebandla njengomtjhumayeli ongakabhajadiswa.

3. Kubayini kungakafuzi uvumele ukusaba kukubambe?

Abanye basaba ukuthi angekhe bakghona ukwenza lokho abakuthembise uJehova. Iqiniso kukuthi ngezinye iinkhathi uzokwenza imitjhapho njengombana kwenzeka emadodeni nebafazini ekukhulunywe ngabo eBhayibhelini. Kodwana uJehova akakalindeli bona abantu abamlotjhako bangenzi imitjhapho. (Funda iRhubo 103:13, 14.) Uyathaba nawenza koke ongakwenza! Uzokusiza. Kuhlekuhle uJehova usiqinisekisa ngokuthi akunanto “engakghona ukusihlukanisa nethando [lakhe].”—Funda kwebeRoma 8:38, 39.

FUNDA NGOKUNGENELELEKO

4. Mazi ngcono uJehova

Kufuze umazi kuhle kangangani uJehova ngaphambi kobana ubhajadiswe? Kufuze umazi kuhle kangangobana ufune ukumthanda nokumthabisa. Dlala IVIDIYO bona ubone ukuthi abafundi beBhayibheli benze njani ephasini loke. Bese nicoca ngombuzo olandelako.

IVIDIYO: Indlela Etjhinga Ekubhajadisweni (3:56)

• Evidiyweni le, yini eyasiza abanye bazilungiselela ukubhajadiswa?

Funda kwebeRoma 12:2, bese nicoca ngemibuzo le:

• Unakho na ukuzaza ngalokho iBhayibheli ekufundisako namkha ngendlela aboFakazi bakaJehova abafundisa ngayo iqiniso?

• Nangabe kunjalo, kufuze wenzeni ngalokho?

5. Hlula iinqabo ezingakwenza bona ungabhajadiswa

Nasiqunta ukunikela ukuphila kwethu kuJehova sibhajadiswe, soke siqalana neentjhijilo. Nawufuna ukubona isibonelo salokho, dlala IVIDIYO, bese nicoca ngemibuzo elandelako.

IVIDIYO: Ithando NgoJehova Lisisiza Sihlule Iinqabo (5:22)

• Evidiyweni le, ngiziphi iintjhijilo uNarangerel okwatlhogeka bona alwisane nazo bona alotjhe uJehova?

• Ithando lakhe ngoJehova lamsiza njani bona ahlule iintjhijilwezo?

Funda izAga 29:25 neyesi-2 kaThimothi 1:7 bese nicoca ngombuzo lo:

• Khuyini esipha isibindi sokulwisana neentjhijilo esiqalana nazo?

6. Thembela esizweni lakaJehova

UJehova uzokusiza bona umthabise. Dlala IVIDIYO, bese nicoca ngemibuzo elandelako.

IVIDIYO: UJehova UZimu Uzokusiza (2:50)

• Evidiyweni, khuyini eyenza umfundi weBhayibheli angabhajadiswa?

• Khuyini eyamsizako bona athembe uJehova?

Funda u-Isaya 41:10, 13, bese nicoca ngombuzo lo:

• Kubayini ungaqiniseka bona uzosizalisa isithembiso sakho sokuzinikezela?

7. Tjengisa bona uyalithabela ithando lakaJehova

Nawusolo ucabanga ngendlela uJehova akuthanda ngayo, uzokuthokoza khulu begodu lokho kuzokwenza ufune ukumlotjha ngokungapheliko. Funda iRhubo 40:5, bese nicoca ngombuzo lo:

• Ngiziphi iimbusiso ezivela kuJehova ozithanda khulu?

Umphorofidi uJoromiya bekathanda uJehova nelizwi lakhe, bekalithanda ilungelo lokubizwa ngegama lakhe. Wathi: “Ilizwi lakho laba lithabo kimi begodu lathabisa ihliziywami, . . . ngombana igama lakho libizwe kimi.” (Joromiya 15:16) Phendula imibuzo le:

• Kubayini kulilungelo elikhethekileko ukuba ngomunye waboFakazi bakaJehova?

• Inga-kghani uyafuna ukubhajadiswa njengomunye waboFakazi bakaJehova?

• Kghani ikhona into ekukhandela bona wenze njalo?

• Ucabanga bona khuyini ekufuze uyenze bona ubhajadiswe?

ISIRHUNYEZO

Ungahlula nanyana ngisiphi isiqabo esingakuvimba bona ubhajadiswe ngesizo lakaJehova.

Buyekeza

• Kufuze ulazi kangangani iBhayibheli ngaphambi kobana ubhajadiswe?

• Ngimaphi amatjhuguluko ekufuze uwenze ngaphambi kobana ubhajadiswe?

• Kubayini kungakafuzi uvumele ukusaba kukuvimbe?

HLOLA OKUNGENZASI

Cabangisisa ukuthi khuyini ekufuze ikwenze ufune ukubhajadiswa.

“Sewukulungele Na Ukubhajadiswa?” (IsiThala, Matjhi 2020)

Funda ngokuthi ungazihlula njani iinqabo ezithileko.

“Khuyini Engivimbela Bona Ngibhajadiswe” (IsiThala, Matjhi 2019)

Qala indlela indoda ethileko ehlule ngayo iinqabo ezithileko bona ibhajadiswe.

Kubayini Uriyada Ukubhajadiswa? (1:10)