Lithini IBhayibheli Ngokusebenza Nangemali?

Wakhe wazizwa ugandeleleka nawucabanga ngomsebenzi namkha ngemali? Kungaba budisi ukuzitlhogomela nokulotjha uJehova ngendlela ayifunako. IBhayibheli lisinikela iseluleko esingasisiza.

1. Lithini iBhayibheli ngomsebenzi?

UZimu ufuna siwuthabele umsebenzi esiwenzako. IBhayibheli lithi ‘ayikho into engcono kunokuthi umuntu . . . athatjiswe msebenzakhe obudisi.’ (UMtjhumayeli 2:24) UJehova usebenza budisi, nathi nasimlingisako sisebenze budisi siyamthabisa begodu sizizwa kamnandi ngesikwenzileko.

Umsebenzi uqakathekile. Kodwana akukafuzi siwuvumele uqakatheke ukudlula ukulotjha kwethu uJehova. (Jwanisi 6:27) UJehova usithembisa ukuthi nasimbeka qangi ekuphileni kwethu, uzositlhogomela.

2. Kufuze siyiqale njani imali?

Nanyana iBhayibheli lithi ‘imali isivikelo’ lisiyelelisa nangokuthi imali iyodwa angeze yasithabisa. (UMtjhumayeli 7:12) Nje-ke, sikhuthazwa bona singayithandi imali kodwana ‘saneliseke ngezinto ezikhona.’ (Funda amaHebheru 13:5.) Nasaneliseka ngalokho esinakho, angeze sigandeleleke ngebanga lokuthi sicabanga bona sitlhoga ezinye izinto. Asenzi iinkolodo ezingatlhogekiko. (IzAga 22:7) Sibalekela iingozi zokugembula namarhwebo asithembisa bona singenza imali msinya.

3. Singaphana njani ngemalethu?

UJehova nguZimu ophanako begodu simlingisa ngokulungela “ukuhlanganyela izinto nabanye.” (1 Thimothi 6:18) Singasebenzisa imalethu bona sisekele ibandla, sisize abanye, khulukhulu abafowethu nabodadwethu. UJehova akanandaba nokuthi sipha kangangani, okuqakathekileko kukuthi kubayini sipha. Nasipha ngokusuka ehliziyweni, sizokuthaba begodu sithabise noJehova.—Funda izEnzo 20:35.

FUNDA NGOKUNGENELELEKO

4. Dumisa uJehova ngendlela osebenza ngayo

IVIDIYO: Sebenzela UJehova Ngomphefumulo Woke (4:39)

• Evidiyweni le, yini oyithandileko ngendlela uJason aqala ngayo umsebenzi nendlela aziphatha ngayo emsebenzini?

• Khuyini ayenzileko bona abeke umsebenzi endaweni efaneleko?

Funda kwebeKolose 3:23, 24, bese nicoca ngombuzo lo:

• Kubayini iqakathekile indlela esiqala ngayo umsebenzi?

Umsebenzi uqakathekile kodwana akukafuzi siwuvumele uqakatheke ukudlula ukulotjha kwethu uJehova

5. Ukwaneliseka kusiza thina

Abantu abanengi balwela ukuba nemali enengi ngendlela abangakghona ngayo. IBhayibheli lisinikela iseluleko esihlukileko. Funda yoku-1 kaThimothi 6:6-8, bese nicoca ngombuzo lo:

• IBhayibheli lisikhuthaza bona senzeni?

IVIDIYO: ‘Yaneliswani Ngeninakho’ (3:20)

• Nanyana imindeni le inemali encani, yini eyenza ithabe?

Kodwana kuthiwani nange sinokunengi bese sifuna okhunye? UJesu watjengisa ubungozi balokhu. Funda uLukasi 12:15-21, bese nicoca ngombuzo lo:

• Ufundeni emfanekisweni kaJesu lo? (Funda ivesi 15.)

Funda begodu umadanise izAga 10:22 neyo-1 kaThimothi 6:10. Ngemva kwalokho nicoce ngemibuzo le:

• Ucabanga ukuthi khuyini okuqakatheke khulu? Kukuba nobungani noJehova namkha kukuba nemali enengi? Kubayini utjho njalo?

• Ngimiphi imiraro ebangwa kugijimisa imali?

6. UJehova uzositlhogomela

IVIDIYO: UJehova Uzositlhogomela (6:21)

• Evidiyweni le, ngimiphi imiraro umfowethu lo aqalana nayo?

• Khuyini ayenzileko bona akghone ukuqalana nemiraro leyo?

Funda uMatewu 6:25-34, bese nicoca ngombuzo lo:

• Khuyini uJehova athembisa ukuyenzela labo abambeka qangi?

ISIRHUNYEZO

Umsebenzi nemali kuqakathekile, kodwana akukafuzi kusithikameze ekulotjheni uJehova.

Buyekeza

• Khuyini engakusiza bona uqale umsebenzi ngendlela efaneleko?

• Ukwaneliseka kungakusiza njani?

• Ungatjengisa njani bona uyasithemba isithembiso sakaJehova sokuthi uzokutlhogomela abantu bakhe?

HLOLA OKUNGENZASI

Hlolisisa ukuthi inga-kghani iBhayibheli lithi imali ayikalungi.

“Inga-Kghani Imali Imsuka Wazo Zoke Izinto Ezilimazako?” (Isihloko esiku-jw.org)

Funda ukuthi singayisebenzisa njani imalethu bona sithabise uZimu.

“Lithini IBhayibheli Ngokupha?” (Isihloko esiku-jw.org)

Qala bona yini esize indoda ebeyigembula begodu ilisela yatjhentjha ukuphila kwayo.

“Bengikuthanda Khulu Ukubheja Iimpera” (IsiThala, Novemba 1, 2011)