ISIFUNDO 41
IBhayibheli Lithini Ngomseme?
Abantu abanengi abakuthandi ukukhuluma ngomseme. Nanyana kunjalo, iBhayibheli nalikhuluma ngomseme, likhuluma ngendlela etjhaphulukileko kodwana enesithunzi. Elikutjhoko kuyazuzisa begodu kunengqondo ngombana uJehova Mdalethu. Yeke uyakwazi okusilungeleko. Usifundisa indlela esingamthabisa ngayo ngezenzo zethu begodu usisiza sithabele ukuphila ngokungapheliko.
1.Uthini uJehova ngomseme?
Umseme sisipho esivela kuJehova. Ufuna sithatjelwe yindoda nomfazi abatjhadileko. Isiphwesi asenzi abatjhadikazi babe nabantwana kwaphela kodwana sibenza batjengisane ithando ngendlela ethabisako. Kungebangelo iliZwi lakaJehova lithi: ‘Thaba ngomfazi wobutjha bakho.’ (IzAga 5:18, 19) UJehova ulindele bona amaKrestu atjhadileko athembeke komunye nomunye, ukwenzela bona angafebi.—Funda amaHebheru 13:4.
2. Kutjho ukuthini ukuziphatha kumbi ngokomseme?
IBhayibheli lithi “Labo abaziphatha kumbi ngokomseme . . . angekhe balizuze ilifa lomBuso kaZimu.” (1 Korinte 6:9, 10) Abatloli beBhayibheli abatlole ngesiGirigi basebenzise ibizo elithi por·neiʹa ukuhlathulula ukuziphatha kumbi ngokomseme. Ibizweli lihlanganisa (1) ukuya emabhayinia kwabantu abangakatjhadi, (2) kwabantu bobulili obufanako, nokuya (3) emabhayini nesilwana. Sithabisa uJehova begodu sizizuzisa thina ‘nasigegeda ukuziphatha kumbi ngokomseme.’—1 Thesalonika 4:3.
FUNDA NGOKUNGENELELEKO
Funda ngokuthi ungakubalekela njani ukuziphatha kumbi ngokomseme nokuthi ungazuza njani ngokuziphatha kuhle.
3. Balekela ukuziphatha kumbi ngokomseme
Indoda ethembekileko uJosefa, yalwela ukuhlala ithembekile. Funda uGenesisi 39:1-12, bese nicoca ngemibuzo le:
Khuyini eyenza uJosefa wabaleka?—Funda ivesi 9.
Ucabanga ukuthi uJosefa wenza isiqunto esihle? Kubayini?
Abantu abatjha bangamlingisa njani uJosefa babalekele ukuziphatha kumbi ngokomseme? Dlala IVIDIYO.
UJehova ufuna soke sale ukuziphatha kumbi. Funda yoku-1 kwebeKorinte 6:18, bese nicoca ngemibuzo le:
Khuyini engabangela bona umuntu aziphathe kumbi ngokomseme?
Ungakubalekela njani ukuziphatha kumbi?
4. Ungakubalekela ukulingwa
Khuyini engakwenza kube budisi ukubalekela ukuziphatha kumbi ngokomseme? Dlala IVIDIYO, bese nicoca ngombuzo olandelako.
Evidiyweni le, khuyini umfowethu ayenzako nakalemuka bona imicabango nezenzo zakhe zingambangela ukuthi angathembeki kumkakhe?
Ngitjho namaKrestu athembekileko alwela ukuhlala acabanga ngezinto ezihlwengekileko. Ungakugegeda njani ukucabanga ngezinto ezonakeleko? Funda kwebeFilipi 4:8, bese nicoca ngemibuzo le:
Kufuze sicabange ngezinto ezinjani?
Ukufunda iBhayibheli nokuhlala simajadu emsebenzini kaJehova kungasisiza njani sibalekele ukulingeka bona sone?
5. Iinkambiso zakaJehova ziyasizuzisa
UJehova uyazi bona khuyini esilungeleko. Usitjela bona singaziphatha njani kuhle nokuthi lokho kusizuzisa njani. Funda izAga 7:7-27 namkha dlala IVIDIYO, bese nicoca ngemibuzo elandelako.
Elinye isokana lawela njani esonweni? —Funda IzAga 7:8, 9.
NgokwezAga 7:23, 26, ukuziphatha kumbi ngokomseme kungaba nemiphumela ebuhlungu. Ngimiphi imiraro esingayibalekela nasihlala siziphatha kuhle?
Ukuziphatha kuhle kungasisiza njani sithabele ukuphila ngokungapheliko?
Abantu abanengi bacabanga bona lokho iBhayibheli elikutjhoko ngabantu bobulili obufanako abahlanganyela amabhayi akutjengisi ithando. UJehova nguZimu wethando begodu ufuna woke umuntu athabele ukuphila ngokungapheliko. Kodwana bona senze njalo, kufuze siphile ngeenkambiso zakhe. Funda yoku-1 kwebeKorinte 6:9-11, bese nicoca ngombuzo lo:
Ngokombono kaZimu, kghani yikanuko yabantu bobulili obufanako kwaphela engakalungi?
Nasifuna ukuthabisa uZimu, soke kufuze senze amatjhuguluko. Kuqakathekile na ukwenza njalo? Funda iRhubo 19:8, 11, bese nicoca ngemibuzo le:
Inga-kghani kuyakghonakala bona umuntu aphile ngeenkambiso zakaJehova? Kubayini?
UJehova usize abantu abanengi bona baphile ngemithethwakhe yokuziphatha. Angakusiza nawe
ABANYE ABANTU BATHI: “Ukutjhinga emsemeni kulungile ikani abantu ababili nabathandako.”
Wena ungathini?
ISIRHUNYEZO
Ukuhlanganyela umseme sisipho esivela kuJehova begodu ufuna indoda nomkayo basithabele.
Buyekeza
Ukuziphatha kumbi ngokomseme kuhlanganisa ini?
Khuyini ezosisiza sibalekele ukuziphatha kumbi ngokomseme?
Sizuza njani nasilandela iinkambiso zakaJehova zokuziphatha?
HLOLA OKUNGENZASI
Funda bona kubayini uJehova athi indoda nomfazi abafuna ukuhlala ndawonye kufuze batjhade.
“Lithini IBhayibheli Ngokuhlala Ndawonye Ningakatjhadi?” (Isihloko esiku-jw.org)
Funda ngokuthi kubayini iBhayibheli lithi ukuziphatha kweentabani kumbi kodwana akukafuzi sizihloye.
Funda bona imithetho kaZimu malungana nomseme isivikela njani.
“Inga-kghani ukumunyana izitho zobulili kukuya emabhayini kwamambala?” (Isihloko esiku-jw.org)
a Izenzwezi ezingafunekiko zihlanganisa ukutjhinga emabhayini, ukumunyana izitho zobulili, ukulalana esidunwini, nokudlala ngezitho zomuntu zobulili.