Yenza Kube Nokuthula Ebandleni

Nasinabantu esilotjha nabo sizizwa njengeKosi uDavida eyathi, “Qala bona kuhle, kuthabisa kangangani bona abantu bahlale ndawonye ngobunye!” (IRhubo 133:1) Ubunye bethu abuzenzakaleli. Soke sidlala indima ekwenzeni bona kube nobunye.

1. Khuyini eyenza abantu bakaZimu bahluke?

Nange uya esifundweni kwenye indawo, kungenzeka ungalizwisisi ilimu elikhulunywa lapho, kodwana uzozizwa usekhaya. Kubayini? Ngombana sifunda iBhayibheli sisebenzisa iincwadi ezifanako, silwela nokuthandana. Nanyana kukuphi lapha sihlala khona, ‘sibiza igama lakaJehova, bona simlotjhe ngobunye.’—Zefaniya 3:9.

2. Khuyini ongayenza bona uthuthukise ubunye?

“Thandanani khulu ngokusuka ehliziyweni.” (1 Pitrosi 1:22) Ungasisebenzisa njani iselulekwesi? Kunokobana siqale imitjhapho yabanye, siqala ubuntu babo obuhle. Kunokobana uzibandakanye nabantu abathanda izinto ozithandako kwaphela, linga ukwazi abafowethu nabodadwethu abavela eenzindeni ezihlukahlukeneko. Singasebenza budisi bona sisuse amazizo webandlululo okungenzeka sinawo.—Funda yoku-1 kaPitrosi 2:17.a

3. Uzokwenzani nawuzithola ungazwani nomKrestu okunye naye?

Sibumbene kodwana sinemitjhapho. Ngezinye iinkhathi siyadanisana namkha sizwisane ubuhlungu. Yeke, iliZwi lakaZimu lisitjela bona ‘siragele phambili silibalelana ngokutjhaphulukileko,’ nalingezelelako lithi, “Njengombana uJehova anilibalela ngokutjhaphulukileko nani kufuze nenze okufanako.” (Funda kwebeKolose 3:13.) Nathi sizwise uJehova ubuhlungu iinkhathi ezinengi, nanyana kunjalo usilibalele. Yeke ulindele bona silibalele abafowethu. Nange ubona ukuthi uzwise umuntu ubuhlungu, tjhinga kuye ulungise indaba.—Funda uMatewu 5:23, 24.b

FUNDA NGOKUNGENELELEKO

4. Hlula ibandlululo

Sifuna ukuthanda boke abafowethu. Kodwana kungaba budisi ukwamukela umuntu ohlukileko kunathi. Khuyini engasisiza? Funda izEnzo 10:34, 35, bese nicoca ngemibuzo le:

• UJehova wamukela yoke imihlobo yabantu bona ibe boFakazi bakhe. Singamlingisa njani endleleni esizizwa ngayo ngabantu abahlukileko kunathi?

• Ngiliphi ibandlululo elidumileko endaweni yangekhenu ofuna ukulibalekela?

Funda yesi-2 kwebeKorinte 6:11-13, bese nicoca ngombuzo lo:

• Ungatjhidelana njani nabafowethu nabodade abavela esizindeni esingafani nesakho?

5. Libalela ngokutjhaphulukileko begodu wenze ukuthula

UJehova usililabela ngokutjhaphulukileko ngitjho nanyana angatlhogi bona thina simlibalele. Funda iRhubo 86:5, bese nicoca ngemibuzo le:

• Usilibalela kangangani uJehova?

• Kubayini kukuthabisa ukuthi uyasilibalela?

• Ngibuphi ubujamo obungenza kube budisi bona sibe nokuthula nabanye?

Singamlingisa njani uJehova besihlale sinobunye nabafowethu nabodadwethu? Funda izAga 19:11, bese nicoca ngombuzo lo:

• Umuntu nakakusilingako namkha akuzwisa ubuhlungu, khuyini ongayenza bona wenze ubujamo bube ngcono?

Ngezinye iinkhathi nathi sizwisa abanye ubuhlungu. Nakwenzekako lokho, kufuze senzeni? Dlala IVIDIYO, bese nicoca ngombuzo olandelako.

IVIDIYO: Ukuba Nokuthula Kuletha Iimbusiso (6:01)

• Evidiyweni, khuyini udadwethu ayenzileko bona enze ukuthula?

6. Qala okuhle kubafowenu nabodadwenu

Nasithoma ukwazi abafowethu nabodadwethu, sithoma ukwazi ubuntu babo obuhle nokubogaboga kwabo. Singahlala njani sidzimelele ebuntwini babo obuhle? Dlala IVIDIYO, bese nicoca ngombuzo olandelako.

IVIDIYO: Zwisisa Bewamukele Abanye! (5:10)

• Khuyini engakusiza ubone ubuntu obuhle babafowenu nabodadwenu?

UJehova uqala ubuntu bethu obuhle. Funda yesi-2 yeenKronike 16:9a, bese nicoca ngombuzo lo:

• Ukwazi bona uJehova uqala ubuntu bakho obuhle kukwenza uzizwe njani?

ISIRHUNYEZO

Ungasiza ngokuthi wenze ubunye ebandleni ngokulibalela nokuthanda boke abafowenu nabodadwenu.

Buyekeza

• Ukungakuhlula njani ukubandlulula?

• Khuyini ongayenza nawungazwani nomKrestu okunye naye?

• Kubayini ufuna ukulingisa uJehova nawulibalela abanye?

HLOLA OKUNGENZASI

Qala ukuthi omunye umfanekiso kaJesu ungasisiza njani sibalekele ukwahlulela abanye.

Khupha Isigodokazi (6:56)

Inga-kghani kufuze sibawe ukulitjalelwa nakunganalitho elimbi esilenzileko?

“Ukubawa Ukulitjalelwa Yipengu Yokwenza Ukuthula” (IsiThala, Novemba 1, 2002)