Khetha Abangani Bakho Ngokuhlakanipha

Abangani basenza sithabe lokha izinto nazikhamba kuhle begodu bayasiqinisa nasiqalene nokugandeleleka. Kodwana iBhayibheli liyasiyelelisa bona akusingiwo woke umuntu ongaba mngani omuhle. Alo, ungabakhetha njani abangani abahle? Cabanga ngemibuzo elandelako.

1. Abangani obakhethako bangaba nomthelela onjani kuwe?

Kanengi siba njengabantu esizihlanganisa nabo. Lokhu kungaletha umphumela omuhle namkha omumbi, ngitjho nanyana sizihlanganisa nabo bunqopha namkha kezokuthintana. IBhayibheli lithi: “Okhamba nabahlakaniphileko uzokuhlakanipha, kodwana osebenzelana neendlhandlha [labo abangathandi uJehova] kuzomkhambela kumbi.” (IzAga 13:20) Abangani abathanda bebalotjhe uJehova bangakusiza uhlale utjhidelene naye bewuthathe iinqunto ezihle. Kodwana abangani abangathandi uJehova bangasenza sibe kude naye. Kungebangelo iBhayibheli lisikhuthaza bona sikhethe abangani bethu ngokuhlakanipha! Nasinabangani abathanda uZimu bazokuba nomthelela omuhle kithi, nathi sizokuba nomthelela omuhle kibo. Sikghona ‘ukuhlala sikhuthazana begodu sakhana.’—1 Thesalonika 5:11.

2. UJehova uzizwa njani ngabangani obakhethako?

UJehova ubakhetha kuhle abangani bakhe. “Utjhidelene nabalungileko.” (IzAga 3:32) UJehova uzozizwa njani nasikhetha abangani abangamthandi? Kungamdanisa khulu lokho! (Funda uJakopo 4:4.) Ngakelinye ihlangothi, uJehova uzokuthaba begodu uzosikhetha bona sibe bangani bakhe nasingakhethi abangani abambi begodu sitjhidele kuye nakilabo abamthandako.—IRhubo 15:1-4.

FUNDA NGOKUNGENELELEKO

3. Tjheja abangani abambi

Abantu abangathandi uZimu neenkambisolawulo zakhe babangani abambi. Dlala IVIDIYO, bese nicoca ngombuzo olandelako.

IVIDIYO: Funda Ukwala Abangani Abambi (6:17)

• Singazihlanganisa njani nabangani abambi singakatjheji?

Funda yoku-1 kwebeKorinte 15:33, bese nicoca ngemibuzo le:

• Mumuntu onjani ongeze abe mngani omuhle kuwe? Kubayini?

Funda iRhubo 119:63, bese nicoca ngombuzo lo:

• Ungabona ngani ukuthi unomngani olungileko?

4. Abantu abahlukileko kithi bangaba bangani abahle

IBhayibheli likhuluma ngamadoda amabili wakwa-Israyeli wekadeni, uDavida noJonathani. UJonathani bekamkhulu kuDavida begodu bekayindodana yekosi kodwana bebabangani abakhulu. Funda yoku-1 kaSamyela 18:1, bese nicoca ngombuzo lo:

• Kubayini kungakafuzi sibe nabangani abalingana nathi kwaphela namkha abaphila njengathi?

Funda kwebeRoma 1:11, 12, bese nicoca ngombuzo lo:

• Abangani abathanda uJehova bangakhuthazana njani?

Evidiyweni le, qala bona umfowethu osesemutjha ubafumene njani abangani eendaweni ezingakalindeleki. Dlala IVIDIYO, bese nicoca ngemibuzo elandelako.

IVIDIYO: Fumana Abangani Eendaweni Ezingakalindeleki (5:06)

• Evidiyweni le, kubayini ababelethi baka-Akil bebatshwenyekile ngabangani anabo esikolweni?

• Khuyini emenze wafuna ukuba nobungani nabo?

• Ukuhlule njani ukuba nesizungu?

5. Ungabafumana njani abangani abahle?

IVIDIYO: Ungamfumana Njani Umngani Weqiniso? (4:14)

Funda izAga 18:24 no-27:17, bese nicoca ngemibuzo le:

• Abangani beqiniso basizana njani?

• Unabo na abangani abanjalo? Nangabe awunabo khuyini ongayenza bona ube nabo?

Funda kwebeFilipi 2:4, bese nicoca ngombuzo lo:

• Nawuzakuba nabangani abahle, nawe kufuze ube mngani omuhle. Ungakwenza njani lokho?

ISIRHUNYEZO

Nasikhetha abangani ngokuhlakanipha sithabisa uJehova begodu sizisiza thina.

Buyekeza

• Kubayini uJehova anendaba nokuthi sikhetha abangani abanjani?

• Bangani abanjani okufuze sibagegede?

• Ungabakha njani ubungani nabantu abalungileko?

HLOLA OKUNGENZASI

Funda ngendlela abangani abahle abangasisiza ngayo ngeenkhathi ezibudisi.

“Yakha Ubungani obuqinileko Ngaphambi Kokufika Kwesiphelo” (IsiThala, Novemba 2019)

Khuyini okufuze uyazi ngokuba nabangani kezokuthintana?

Sebenzisa Zokuthintana Ngendlela Efaneleko (4:12)

Esihlokweni esithi, “Bengilulukela Ukuba Nobaba,” funda ngalokho okwenza indoda ethileko yatjhentjha abangani bayo.

“IBhayibhili Itjhugulula Amaphilo” (IsiThala, Apreli 1, 2012)