Umndenakho Ungathaba Njani?—Ingcenye 2

Abantwana basisipho esivela kuJehova. Ufuna ababelethi basitlhogomele kuhle isiphwesi. Kungebangelo abanikela iseluleko esihlakaniphileko esingabasiza bona bakghone ukwenza njalo. Iseluleko sakhe sitjengisa nalokho abantwana abangakwenza bona kuthabise ekhaya.

1. Ngisiphi iseluleko uJehova asinikela ababelethi?

UJehova ufuna ababelethi bathande abantwana babo begodu baziphe isikhathi sabo. Ufuna ababelethi bavikele abantwana babo begodu basebenzise iinkambisolawulo zeBhayibheli bona bababandule. (IzAga 1:8) Uthi kibobaba: ‘Ragelani phambili nibakhulisa [abantwana benu] . . . ngesinqophiso sakaJehova.’ (Funda kwebe-Efesu 6:4.) UJehova uyathaba lokha ababelethi nabalandela isinqophiso sakhe nabakhulisa abantwana babo begodu bangadluliseli umthwalwabo komunye umuntu.

2. Ngisiphi iseluleko uJehova asinikela abantwana?

UJehova uthi ebantwaneni: “Lalelani ababelethi benu.” (Funda kwebeKolose 3:20.) Abantwana nabahlonipha begodu balalele ababelethi babo, bathabisa uJehova nababelethi babo. (IzAga 23:22-25) UJesu wabeka isibonelo esihle khulu lokha nakamntwana. Nanyana bekanganasono, wahlonipha bewalalela ababelethi bakhe.—Lukasi 2:51, 52.

3. Ningatjhidela njani kuZimu nimndeni?

Nangabe umbelethi, akunakuzaza bona ufuna abantwana bakho bathande uJehova njengombana nawe umthanda. Ungakwenza njani lokho? Ngokwenza lokho iBhayibheli elikutjhoko: “Uwabuyelele [amezwi kaJehova] emadodanenakho, uwakhulume nanihlezi endlinakho, nanikhamba endleleni.” (Duteronomi 6:7) ‘Ukubuyelela’ kutjho ukufundisa into amahlandla ambalwa. Kungenzeka uyazi ukuthi kanengi kufuze ubuyelele into ebantwaneni bakho ukwenzela bona bayikhumbule. Nje-ke umtlolo lo utjho ukuthi kufuze uhlale ufuna amathuba wokukhuluma nabantwana bakho ngoJehova. Yintwehle bona umndeni ubekele isikhathi eqadi sokulotjha uJehova qobe veke. Nanyana ninganabo abantwana, kuzonizuzisa ukubekela isikhathi eqadi sokufunda iliZwi lakaZimu qobe veke.

FUNDA NGOKUNGENELELEKO

4. Bandula abantwana bakho ngethando

Kungaba budisi ukubandula umntwana. Alo iBhayibheli lingasiza njani? Funda uJakopo 1:19, 20, bese nicoca ngemibuzo le:

• Ababelethi bangatjengisa njani bona bayabathanda abantwana babo lokho nabakhuluma nabo?

• Lokha umbelethi nakasilingekileko akukafuzi akhalimele umntwana, kubayini kunjalo?a

5. Vikela abantwana bakho

Bona uvikele abantwana bakho kuqakathekile bona ukhulume nomntwana ngamunye ngezomseme. Lokhu kungaba budisi. Dlala IVIDIYO, bese nicoca ngemibuzo elandelako.

IVIDIYO: Vikela Abantwana Bakho Ekohlakalweni (2:58)

• Kubayini kubudisi ngabanye ababelethi bona bakhulume nabantwana ngezomseme?

• Ngiyiphi enye indlela abanye ababelethi abayisebenzisileko bona bahlathululele abantwana babo ngezomseme?

Njengombana kwaphorofidwa, iphasi lakaSathana liba limbi khulu. Funda yesi-2 kaThimothi 3:1, 13, bese nicoca ngombuzo lo:

• Abanye abantu abambi okukhulunywa ngabo evesini 13 batlhorisa abantwana ngokomseme. Nje-ke kubayini kuqakathekile ngababelethi bona bafundise abantwana babo ngezomseme nokuthi bangazivikela njani kilabo ababatlhorisako?

Kghani bewazi?

AboFakazi bakaJehova bakhuphe iincwadi ezinengi namavidiyo bona basize ababelethi bafundise abantwana ngezomseme begodu bona babavikele bangatlhoriswa. Isibonelo salokho ngilokhu okulandelako:

• Vikela Abantwana Bakho (ividiyo)

• Funda KuMfundisi Omkhulu, izahluko 10 no-32

• “Ukufundisa Umntwanakho Ngezomseme” (Phaphama! No. 5 2016)

6. Hlonipha ababelethi bakho

IVIDIYO: Kufuze Ngikhulume Njani Nababelethi Bami? (2:19)

• Kubayini kuqakathekile ngomntwana bona akhulume ngehlonipho nababelethi bakhe?

• Umntwana angakhuluma njani nababelethi bakhe ngehlonipho?

Funda izAga 1:8, bese nicoca ngombuzo lo:

• Khuyini umntwana okufuze ayenze lokha ababelethi bakhe nabamtjela bona enzeni?

7. Lotjhani uJehova nimndeni

Imindeni yaboFakazi bakaJehova ibekela isikhathi eqadi qobe veke bona ilotjhe uJehova ndawonye. Ukulotjha komndenokhu kunjani? Dlala IVIDIYO, bese nicoca ngemibuzo elandelako.

IVIDIYO: Ukulotjha Komndeni—Iintjhijilo Nemiphumela Emihle (8:04)

• Ungaba njani nehlelo lokuLotjha koMndeni qobe?

• Khuyini umbelethi angayenza bona ukulotjha komndeni kuthabise?—Qala isithombe esisekuthomeni esifundwenesi.

• Yini engenza kube budisi ngomndenakho ukufunda ndawonye?

Ekadeni ngeenkhathi zama-Israyeli, uJehova bekalindele bona imindeni ikhulume qobe ngemiTlolo. Funda uDuteronomi 6:6, 7, bese nicoca ngombuzo lo:

• Ungayisebenzisa njani ikambisolawulo le?

Izinto eningazenza ekulotjheni komndeni:

• Lungiselelani imihlangano yebandla.

• Fundani begodu nicoce ngendaba ethileko eseBhayibhelini umndenakho ongayithabela.

• Nange kunabantwana emndenini, dowunloda namkha uphrinthe okungasetshenziselwa ukutadisha ku-jw.org.

• Nange kunabantu abatjha emndenini, cocani ngesihloko esenzelwe abantu abatjha ku-jw.org.

• Lingisani indaba ethileko eseBhayibhelini nabantwabenu.

• Bukelani ividiyo ku-jw.org begodu nicoce ngayo.

ISIRHUNYEZO

UJehova ufuna ababelethi bathande abantwababo, bababandule begodu babavikele; ufuna abantwana bahloniphe ababelethi babo begodu babalalele; ufuna imindeni imlotjhe ndawonye.

Buyekeza

• Ababelethi bangababandula bebabavikele njani abantwana babo?

• Abantwana bangatjengisa njani bona bayabahlonipha ababelethi babo?

• Kusiza ngani ukubekela isikhathi eqadi qobe veke bona umndeni ulotjhe ndawonye?

HLOLA OKUNGENZASI

Funda ngeenluleko iBhayibheli ezinikela labo abatlhogomela ababelethi esele baluphele.

“Lithini IBhayibheli Ngokutlhogomela Ababelethi Esele Baluphele?” (Isihloko esiku-jw.org)

Qala bona indoda ebeyingakwazi ukukhulisa abantwana ibe njani ngubaba ongcono.

Safundisa NguJehova Indlela Yokukhulisa Abantwabethu (5:58)

Qala ukuthi abobaba bangatjhidelana njani namadodanabo.

“Abobaba Bangahlala Njani Batjhidelene Namadodanabo?” (IsiThala, Janabari 1, 2012)