Kubayini Kuqakathekile Ukuthi Simbathani Nokuthi Siqaleka Njani?

Soke kunendlela esithanda ukumbatha nokuzilungisa ngayo. Nasikhetha ukulalela iinkambisolawulo zeBhayibheli sizokumbatha esikuthandako begodu sithabise uJehova ngalokho. Akhesicoce ngezinye zeenkambisolawulwezo.

1. Khuyini engasisiza siqunte bona sizokumbathani nokuthi sizokuqaleka njani?

Kufuze ‘sizikghabise ngezambatho ezifaneleko, ngokuhlonipheka nangokwahlulela okuhle,’ begodu sihlale sihlwengekile bona abanye balemuke ukuthi ‘sizinikele kuZimu.’ (1 Thimothi 2:9, 10) Cabangela iinkambisolawulo ezine ezilandelako: (1) Indlela esimbatha ngayo kufuze ‘ifaneleke.’ Njengombana ubonile esifundweni, aboFakazi bakaJehova bathanda izinto ezingafaniko kodwana indlelethu yokumbatha neyokulungisa iinhluthu zethu itjengisa bona sihlonipha uZimu esimlotjhako. (2) Ukumbatha “ngokuhlonipheka” kutjho ukumbatha ngendlela engabangeli abanye imicabango engakalungi, namkha ezosidosela amehlo. (3) Sitjengisa ‘ukwahlulela okuhle’ ngokungalandeli indlela edumileko yokumbatha nokuzilungisa. (4) Indlela esiqaleka ngayo kufuze itjengise bona ‘sizinikele kuZimu’ nokuthi silotjha uZimu weqiniso.—1 Korinte 10:31.

2. Indlela esiqaleka ngayo ibathinta njani abafowethu nabodadwethu?

Ngitjho nanyana sinekululeko yokukhetha ukuthi sizokumbathani, indlela esiqaleka ngayo iyabathinta abanye. Senza koke okusemandlenethu bona singaphathi abanye kabuhlungu, kunalokho ‘senze okuhle kumakhelwanethu, bona simakhe.’—Roma 15:1, 2.

3. Indlela esiqaleka ngayo ingabadosa njani abantu bona bafunde ngoJehova?

Ngitjho nanyana simbatha kuhle ngaso soke isikhathi kodwana sitjhejisisa khulu nasiya esifundweni nesimini. Sifuna ukuqiniseka ukuthi abantu abaphazanyiswa yindlela esiqaleka ngayo nasibalethela iindaba ezimnandi. Kunalokho, indlela esiqaleka ngayo ingadosela abanye eqinisweni begodu ‘ikghabise ifundiso yoMsindisethu.’—Titosi 2:10.

FUNDA NGOKUNGENELELEKO

4. Nasiqaleka kuhle sitjengisa bona sihlonipha uJehova

Ngiliphi ibanga eliqakatheke khulu elenza sibe nendaba ngendlela esiqaleka ngayo? Funda iRhubo 47:2, bese nicoca ngemibuzo le:

• Ukwazi bona sijamele uJehova kufuze kuyithinte njani indlela esimbatha ngayo?

• Ucabanga bona kuqakathekile na ukuthi sitshwenyeke ngokuqaleka kwethu nasiya esifundweni nalokha nasiya esimini? Kubayini?

5. Singazenza njani iinqunto ezihle ngokumbatha nokuzilungisa?

Dlala IVIDIYO.

IVIDIYO: “Koke Kwenzeleni Iphazimulo KaZimu” (10:18)

Kungakhathaliseki bona izembatho zethu ziyadura namkha aziduri kodwana kufuze zihlwengeke begodu zifaneleke ebujamweni obuhlukahlukeneko esizifumana sikibo. Funda yoku-1 kwebeKorinte 10:24; neyoku-1 kaThimothi 2:9, 10. Bese nicoca ngokuthi kubayini kungakafuzi simbathe izembatho . . .

• ezibudlabha namkha ezingakahleleki.

• ezisibambako, eziveza umzimba namkha ezenza banye babe nemicabango engakalungi.

Ngitjho nanyana amaKrestu angasi ngaphasi komThetho kaMosi kodwana angafunda okunengi kiwo endleleni uJehova acabanga ngayo. Funda uDuteronomi 22:5, bese nicoca ngombuzo lo:

• Kubayini kufuze sigegede ukumbatha nokuzilungisa ngendlela eyenza abobaba baqaleke njengabomma namkha abomma baqaleke njengabobaba?

Funda yoku-1 kwebeKorinte 10:32, 33 neyoku-1 kaJwanisi 2:15, 16, bese nicoca ngemibuzo le:

• Kubayini kufuze kusitshwenye ukwazi ukuthi indlela esimbatha ngayo ingabaphatha kumbi abanye abantu emphakathini namkha ebandleni?

• Ngiyiphi indlela yokumbatha nokuzilungisa ejayelekileko endaweni ohlala kiyo?

• Ucabanga bona ezinye zeendlelezi kungenzeka na zingafaneleki emuntwini omKrestu? Kubayini?

ISIRHUNYEZO

Nasenza iinqunto ezihle malungana nendlela esiqaleka ngayo sitjengisa bona sihlonipha uJehova nabanye abantu.

Buyekeza

• Kubayini indlela esimbatha nesizilungisa ngayo iqakathekile kuJehova?

• Ngiziphi ezinye iinkambisolawulo ekufuze zinqophise iinqunto zethu ngendlela esiqaleka ngayo?

• Ukuqaleka kwethu kungayithinta njani indlela abanye abaqala ngayo ukulotjha kweqiniso?

HLOLA OKUNGENZASI

Qala ukuthi abanye bangacabangani nababona indlela ombethe ngayo.

“Ngiqaleka Njani?” (Isihloko esiku-jw.org)

Funda bona kubayini kukuhlakanipha ukucabanga ngaphambi kobana uzigwale emzimbeni.

“IBhayibheli Lithini Ngokuzigwala Emzimbeni?” (Isihloko esiku-jw.org)

Cabangela iinkambisolawulo ezingeziweko ezinganqophisa indlela esenza ngayo iinqunto.

“Indlela Ombatha Ngayo Iyamdumisa Na UZimu?” (IsiThala, Septemba 2016)