I-Amagedoni​—Abanye Bathi Iyini?

“Yababuthelela endaweni ngesiHebheru ebizwa bona yi-Amagedoni.”—ISAMBULO 16:16, English Standard Version.

UCABANGANI newuzwa ibizo elithi “Amagedoni”? Kungenzeka kufika iinthombe zehlekelele ekulu engqondwenakho. Nanyana livela kanye kwaphela eBhayibhilini, ibizweli libuyelelwa kanengi ngabezeendaba nabadosiphambili bekolo.

Iimbono evamileko nge-Amagedoni iyavumelana na nalokho okufundiswa yiBhayibhili? Kuqakathekile ukwazi ipendulo. Kubayini kunjalo? Ngombana iqiniso nge-Amagedoni lingakutjhaphulula ekusabeni okungatlhogekiko, likhanyise indlela oqala ngayo ikusasa, begodu lithinte nendlela ocabanga ngayo ngoZimu.

Cabanga ngeembuzo eemthathu elandelako, bese umadanise iimbono evamileko nge-Amagedoni nalokho kwamambala okufundiswa yiBhayibhili.

1. I-AMAGEDONI YIHLEKELELE EBANGELWA BABANTU?

Iimbikiindaba nabarhubhululi kanengi basebenzisa ibizo elithi “Amagedoni” ukuhlathulula iinhlekelele ezibangelwa babantu. Isibonelo, Ipi yePhasi I neyesi II bezibizwa ngokobana yi-Amagedoni. Ngemva kwezipezo, isintu sitshwenyeke ngokobana i-United States neSoviet Union zizokusahlelana ngeenkhali ze-athomu. Iimbikindaba zibiza ipi ye-athomu leyo ngokobana yi-Amagedoni. Namhlanjesi, abarhubhululi abasaba bona ukusilaphazwa kwephasi kuzokubangela amatjhuguluko amakhulu ebujamweni bezulu ephasini bayelelisa “ngobujamo bezulu obuyi-Amagedoni” obuzokufika esikhathini esingaphelisi ihliziyo.

Khuyini okutjhiwo yihlathululwabo: Abantu banamandla wokulawula ingomuso lephasi nokuphila okukilo. Nengabe urhulumende uyabhalelwa ukwenza ngokuhlakanipha, iphasi lizokutlhaga ngokungapheliko.

Lokho okufundiswa yiBhayibhili: UZimu angekhe avumele isintu bona sitjhabalalise iphasi. IBhayibhili isiqinisekisa bona uJehovaa “ongakhange alibumbele ilize” iphasi. Kunalokho, walibumbela “bona kuhlalwe kilo.” (Isaya 45:18) Kunokobana avumele iphasi bona litjhatjalaliswe babantu, uZimu ‘uzokutjhabalalisa labo abatjhabalalisa iphasi.’—ISambulo 11:18.

2. I-AMAGEDONI YIHLEKELELE ENGOKWEMVELO NA?

Iimbikindaba ngezinye iinkhathi zisebenzisa ibizo “Amagedoni” njengetshwayo lehlekelele yemvelo ekulu. Isibonelo, ngo-2010, omunye umbiko wakhuluma “‘nge-Amagedoni’ yeHaiti.” Bewuhlathulula ukutlhaga, umonakalo, nokulahleka kwamaphilo okwabangelwa kusikinyeka kwephasi okwathusa iphaselo. Iimbikindaba nabenzi bamafilimu basebenzisa igamelo ingasi esehlakalweni esenzekileko kwaphela kodwana godu nakulezo abacabanga bona zizokwenzeka. Isibonelo, basebenzisa ibizo “Amagedoni” bona bahlathulule iimphumela ecatjangelwako yeplanethi encani etjhabalalisa iphasi.

Khuyini okutjhiwo yihlathululwabo: I-Amagedoni sisehlakalo esenzeka ngengozi ngokungakhethi esibulala abongazimbi abanganamlandu. Kuncani ongakwenza ukuzivikela kiyo.

Lokho okufundiswa yiBhayibhili: I-Amagedoni akusiso isehlakalo esenzeka ngengozi esibulala abantu ngokungakhethi. Kunalokho, hlangana ne-Amagedoni, ngabambi kwaphela abazokutjhatjalaliswa. IBhayibhili ithembisa bona msinyana “omumbi angekhe asaba khona; ngokuqinisekileko uyoyihlola indawakhe, begodu angekhe asafumaneka.”—IRhalani 37:10.

3. UZIMU UZOKUTJHABALALISA IPHASI E-AMAGEDONI?

Abantu abanengi beenkolo bakholelwa bona kuzokuba nepi yamaswaphelo hlangana nabantu abalungileko nabangakalungi okuzokuphumela ekupheleni kweplanethi yethu. Ukuhlola okwenziwa yi-Princeton Survey Research Associates e-United States yafumana bona amaphesenti ama-40 wabantu abakhulu akholelwa bona iphasi lizokuphela ‘epini ye-Amagedoni.’

Lokho okutjhiwo yifundiswabo: Abantu bebangakabunjelwa ukuphila ephasini ngokungapheliko, ngitjho nephasi bona lihlale ngokungapheliko. UZimu wabumba abantu ngomnqopho wokobana boke bafe ngesikhathi esithileko.

Lokho okufundiswa yiBhayibhili: IBhayibhili itjho ngokukhanyako bona uZimu “ujamise iphasi phezu kwesisekelo salo, angeze belatjhidiswa.” (IRhalani 104:5) Malungana nezakhamuzi zephasini, iBhayibhili ithi: “Abalungileko bazokudla ilifa lephasi bahlale kilo ngokungapheliko.”—IRhalani 37:29.

Ngokukhanyako, iBhayibhili iphikisana neembono evamileko nge-Amagedoni. Manje, ngiliphi iqiniso?

[Umtlolo waphasi]