Tjhidela Kuzimu
“Mina Jehova, UZimakho, Ngibambe Isandla Sakho Sokudla”
“BAMBA isandla sami,” kutjho ubaba endodanenakhe encani njengombana balungele ukweqa indlela ephithizelako. Isandla sakayise esinamandla sibambe iminwanakhe emincani, umsanyana lo uzizwa alondekile, angasabi. Wakhe wakhanuka bona kube nomuntu okubamba isandla akurhole ngokuphepha ematshwenyekeni wokuphilokhu? Nengabe kunjalo, uzokufumana induduzo emezwini atlolwe ngu-Isaya.—Funda u-Isaya 41:10, 13.
U-Isaya wanqophisa amezwakhe ku-Israyeli. Nanyana uZimu gade aqala isitjhabeso ‘njengepahlakhe ekhethekileko,’ besibhodwe manaba. (Eksodosi 19:5) Ama-Israyeli bekufuze asabe na? UJehova wasebenzisa u-Isaya bona adlulise umlayezo oqinisekisako. Njengombana sihlola amezwi layo, asikhumbuleni bona asasebenza nebakhulekelini bakaZimu namhlanjesi.—KwebeRoma 15:4.
“Ungasabi,” kutjho uJehova. (Ivesi 10) La, akusiwo amezwi angatjho litho. UJehova uyahlathulula bona kubayini abantu bakhe kungakafuzi basabe: “Ngombana nginawe.” Akasiwo umthombo wesizo ojamele kudanyana, othembisa ukusiza kwaphela ngeenkhathi atlhogeka ngazo. Ufuna abantu bakhe bazi bonyana unabo—kwanga useqadi kwabo—uhlala akulungele ukubasekela. La, kwamambala mamezwi athoba ihliziyo.
UJehova uragela phambili aqinisekisa abakhulekeli bakhe, uthi: “Ungaqali ngapha nangapha.” (Ivesi 10) Ibizo lesiHebheru elisetjenziswe la lingaqalisa kilabo “abaqala ngapha nangapha ukubona bona ayikho into engabalimaza.” UJehova uyahlathulula bona kubayini abantu bakhe kungakafuzi baqale ngapha nangapha ngokusaba: “Ngombana nginguZimakho.” Khuyini engaqinisekisa ukudlula lokho? UJehova ‘uNgophakemeko,’ ‘uMninimandla woke.’ (IRhalani 91:1) BanoJehova njengoZimabo onawo woke amandla, kubayini kufuze basabe?
Alo-ke, khuyini abakhulekeli bakaJehova ekufuze bayilindele kuye? Uyathembisa: “Kwamambala ngizokubamba ngesandla sami sokudla sokulunga ngikuqinise.” (Ivesi 10) Godu uthi: “Mina Jehova uZimakho, ngibamba isandla sakho sokudla.” (Ivesi 13) Ucabangani newuzwa amezwi la? Enye incwadi yathi: “Nahlangeneko, amavesi amabili la aveza isithombe esinamandla sombelethi nomntwana.” “[Ubaba] akajameli eqadi bona avikele, kodwana yena ngenyama unomntwana; angekhe avume ukuhlukaniswa nomntwana.” Akhe ucabange—uJehova angekhe avumele abantu bakhe bahlukaniswe naye, ngitjho nebujamweni obubonakala bubudisi khulu ekuphileni kwabo.—KumaHebheru 13:5, 6.
Abakhulekeli bakaJehova namhlanje bangathola induduzo ekulu emezwini atlolwe ngu-Isaya. ‘Eenkhathini ezibudisi kwamambalezi,’ ngezinye iinkhathi ungazizwa udisibezwa miraro yokuphila. (2 KuThimothi 3:1) Kodwana akukafuzi siqalane nobudisobu sisodwa. UJehova uzimisele ukulalamela abambe isandla sethu. Njengabantwana abanethemba, singakakarela esandleni sakhe esinamandla, sinethemba lokobana uzosidosela ehlangothini elilungileko begodu asisize ngesikhathi esimtlhoga ngaso.—IRhalani 63:7, 8.